Kölfel 29:1-10

¹Echö än Tafit köl. Ämi chon läng kana, oupwe mwareiti ewe Samol mi Lapalap, oupwe mwareiti an ling me manaman.

²Oupwe mwareiti lingen iten ewe Samol mi Lapalap. Oupwe fel ngeni i fän üf mi pin.

³Aramas ra rongorong möngüngün ewe Samol mi Lapalap won ekewe matau. Ewe Kot mi ling a apüngü chopulap. Möngüngün ewe Samol mi Lapalap a tittiriis me won ekewe matau.

⁴Möngüngün ewe Samol mi Lapalap a manaman. Möngüngün ewe Samol mi Lapalap a fokun amwarar.

⁵Möngüngün ewe Samol mi Lapalap a kupi ekewe irä setar, a kupi ekewe irä setar mi nom won Lepanon.

⁶A föri pwe ewe chuk Lepanon a mwetemwet usun eman nienifön kow, nge ewe chuk Hermon a mwetemwet usun eman nienifön ätemwänin kow.

⁷Möngüngün ewe Samol mi Lapalap a afifi inefi.

⁸Möngüngün ewe Samol mi Lapalap a achechecha ewe fanüapö, a achechecha ewe fanüapön Kates.

⁹Möngüngün ewe Samol mi Lapalap a amäräkulu ekewe irä ook o wichikätiu chön irän ewe wöllap. Nge lon imwan imwenfel meinisin ra kökkö, “Kot a ling.”

¹⁰Ewe Samol mi Lapalap a nemenem won ekewe lölö. A nemenem, pun i a king tori feilfeilachök.