1Yoáca beꞌro trigo bʉcʉatuꞌajari cura Sansón cʉ̃ nʉmorẽ ĩꞌagʉ̃ waꞌagʉ, niꞌcʉ̃ cabracãrẽ miacʉ niwĩ. Topʉ ejagʉ, aꞌtiro ni wãcũcʉ niwĩ: “Yʉꞌʉ nʉmo ya tucũpʉ sãjãagʉ̃ti”, nicʉ nimiwĩ. Co pacʉ peꞌe cʉ̃rẽ sãjãadutiticʉ niwĩ.
2Aꞌtiro nicʉ niwĩ: —Yʉꞌʉ aꞌtiro wãcũwʉ̃. Yʉꞌʉ macõrẽ ne ʉatisami, nimiwʉ̃. Tojo weegʉ mʉꞌʉ meꞌrãcjʉ̃rẽ core oꞌowʉ. Co acabijo co yʉꞌrʉoro añugõ nimo. Co peꞌere miaña, nicʉ niwĩ.
3Sansón cʉ̃rẽ yʉꞌticʉ niwĩ: —Niꞌcãrõacã pũrĩcãrẽ filisteo masãrẽ ñaꞌarõ wéégʉ, buꞌiri moogʉ̃saꞌa.
4Tojo weegʉ cʉ̃ trescientos zorra, diayia weronojõ bajurãrẽ ñeꞌe, pʉarẽrã na ye pĩcõrĩrẽ dʉꞌtecũucʉ niwĩ. Te cʉ̃ dʉꞌteꞌcaropʉ ope tĩarĩ õꞌocʉ niwĩ.
5Te tĩarĩrẽ sĩꞌayoo, filisteo masã na otese cʉoropʉ zorrare duꞌuoꞌocʉ niwĩ. Nipeꞌtise trigo na tʉ̃ꞌrẽcũuꞌque mesãrĩ, ʉꞌse weseri, olivo weseri ʉ̃jʉ̃ñeꞌepeꞌtia waꞌacaro niwʉ̃.
6Filisteo masã tere ĩꞌarã, “¿Noa tojo weeapari?” ni, aꞌmerĩ sẽrĩtiñaꞌcãrã niwã. “Sansón, Timnacjʉ̃ buji tojo weecʉ niami. Cʉ̃ nʉmorẽ cʉ̃ meꞌrãcjʉ̃rẽ oꞌoꞌque buꞌiri tojo weecʉ niami”, ni werenoꞌcãrã niwã. Tere tʉꞌorã, filisteo masã core, co pacʉre ʉ̃jʉ̃acõꞌacãrã niwã.
7Beꞌro Sansón narẽ nicʉ niwĩ: —Mʉsã tojo weeꞌque wapa yʉꞌʉ mʉsã meꞌrã tojo aꞌpepũrĩnuꞌcũgʉ̃saꞌa. Téé mʉsãrẽ aꞌméca beꞌropʉ añugʉ̃saꞌa, nicʉ niwĩ.
8Ʉpʉtʉ uatjĩagʉ̃, na meꞌrã aꞌmewẽjẽ, pãjãrãrẽ wẽjẽcʉ niwĩ. Tojo weetuꞌajanʉꞌcõ, ʉ̃tãgã Etam wãmeticja nirĩ tutipʉ buꞌa, topʉ niseticʉ niwĩ.
9Beꞌro filisteo masã Judá diꞌtapʉ majãa, topʉ nerẽcãrã niwã. Téé Lehi pʉꞌtopʉ tuustenʉꞌcãcãrã niwã.
10Judácjãrã narẽ sẽrĩtiñaꞌcãrã niwã: —¿Deꞌro weerã ʉ̃sã meꞌrã aꞌmewẽjẽrã aꞌtiati? Na yʉꞌticãrã niwã: —Ʉ̃sã Sansṍrẽ ñeꞌerã aꞌtirã weeapʉ. Ʉ̃sãrẽ cʉ̃ ñaꞌarõ weeꞌcaronojõta cʉ̃rẽ aꞌmerãti, nicãrã niwã.
11Tere tʉꞌorã, iꞌtiati mil ʉmʉa Judácjãrã ʉ̃tãgã Etam wãmeticja nirĩ tutipʉ buꞌacãrã niwã. Sansṍrẽ aꞌtiro nicãrã niwã: —¿Mʉꞌʉ masĩweti? Filisteo masã marĩrẽ dutirã, marĩ nemorõ tutuarã nima. ¿Deꞌro weegʉ ʉ̃sãrẽ tojo weeati? Narẽ yʉꞌticʉ niwĩ: —Na yʉꞌʉre weeꞌcaronojõta yʉꞌʉ quẽꞌrã mejãrõta weeapʉ.
12Cʉ̃ tojo nicã tʉꞌorã, cʉ̃rẽ aꞌtiro nicãrã niwã: —Filisteo masãrẽ wiarãtirã, mʉꞌʉrẽ dʉꞌterã aꞌtirã weeapʉ. Sansón narẽ yʉꞌticʉ niwĩ: —Õꞌacʉ̃ wãme meꞌrã wãmepeo, “Mʉꞌʉrẽ wẽjẽsome”, niña, nicʉ niwĩ.
13Cʉ̃ tojo nicã tʉꞌorã, “Jaʉ”, nicãrã niwã. “Mejõ mʉꞌʉrẽ dʉꞌte, filisteo masãrẽ wiarãti. Mʉꞌʉrẽ wẽjẽsome”, nicãrã niwã. Tojo weerã pʉa da pũnʉꞌmo dari, maꞌma dari meꞌrã cʉ̃rẽ dʉꞌtecãrã niwã. Dʉꞌte, cʉ̃rẽ ʉ̃tã tutipʉ níꞌcʉre miiwijaacãrã niwã.
14Cʉ̃ Lehipʉ ejari curare filisteo masã cʉ̃rẽ ĩꞌarã, pũrõ eꞌcatise meꞌrã caricũwãꞌcãticãrã niwã. Na tojo weecã, Espíritu Santu tutuaro meꞌrã cʉ̃pʉre sãjãacʉ niwĩ. Cʉ̃pʉre sãjãcã, cʉ̃rẽ dʉꞌteꞌque dari lino ʉ̃jʉ̃ꞌque caꞌbise dari weronojõ waꞌacaro niwʉ̃. Tojo weero te dari surustedijacaro niwʉ̃.
15Beꞌro burro ʉséca õꞌa, bopoticureri õꞌarẽ boca, ti õꞌa meꞌrã mil ʉmʉarẽ wẽjẽcʉ niwĩ.
16Beꞌro Sansón nicʉ niwĩ: “Burro ʉséca õꞌa meꞌrã wẽjẽ, narẽ pʉa mesã seeneocũuapʉ. Burro ʉséca õꞌa meꞌrã mil ʉmʉarẽ wẽjẽcãꞌpʉ”, nicʉ niwĩ.
17Cʉ̃ tojo níca beꞌro ti õꞌarẽ cõꞌacãꞌcʉ niwĩ. Cʉ̃ aꞌmewẽjẽꞌcarore Ramat-lehi wãmeyecãrã niwã.
18Cʉ̃ aꞌmewẽjẽca beꞌro pũrõ acowʉocʉ niwĩ. Tojo weegʉ Õꞌacʉ̃rẽ ʉpʉtʉ sẽrĩcʉ niwĩ: “Yʉꞌʉ mʉꞌʉrẽ daꞌracoꞌtegʉ niꞌi. Mʉꞌʉ yʉꞌʉre filisteo masã meꞌrã aꞌmewẽjẽcã, narẽ docaqueꞌacã weeapʉ. ¿Niꞌcãrõacãma acowʉose meꞌrã wẽrĩgʉ̃sari? ¿Tojo nicã ãꞌrã mʉꞌʉrẽ ẽjõpeotirã tiropʉ wẽrĩgʉ̃sari?” nicʉ niwĩ.
19Cʉ̃ tojo nicã tʉꞌogʉ, Õꞌacʉ̃ niꞌcã cope aco wijacã weecʉ niwĩ. Ti pe wijasepʉre Sansón aco sĩꞌrĩcʉ niwĩ. Sĩꞌrĩtoja, mejãrõta tutuagʉ waꞌacʉ niwĩ tja. Tojo weero aco wijari pe En-hacore wãmeyenoꞌcaro niwʉ̃. Topʉ Lehipʉ aco wijari pe nidecotiꞌi yujupʉ.
20Filisteo masã na duticaterore Sansón veinte cʉ̃ꞌmarĩ Israe curuacjãrãrẽ sʉꞌori niseticʉ niwĩ.
