Juan 13:22-38

²²Pegdineg te menge tinoledaan din kenyan, nepela dan aw migpetengtengay dan, so wedà dan ketegahi aw sinu se nepeselowan te inikagi din sìyan.

²³Se timangkil ki Jesus, yan se tinoledaan ontò nedekelan i Jesus te pedowan.

²⁴Kimapay si Pedro kandin, aw minikagi, “Insai si Jesus aw sinu otawi se nepeselowan te inikagi din.”

²⁵Yan minonsalig sikandin ki Jesus aw mig-insà, “Pengolo, sinu lay otawi diyà kenami se megtolok kamno?”

²⁶Timaba si Jesus, “Yan se otaw begayan ko te pan tapay imbawog diyà te lipong.” Penga niyan, migbawog si Jesus te pan, aw imbegay din ki Judas, batà i Simon Iscariote.

²⁷Penga te pegkinawà i Judas te pan, dimateng si Satanas diyà kandin. Minikagi si Jesus, “Eyasi se inangen nikaw.”

²⁸Meneng se menge doma tinoledaan kidoen te lemisa, wedà dan ketegahi aw eden se tod te inikagi i Jesus diyà ki Judas.

²⁹Si Judas se egtonggò te kwarta te kedita dan, aw yan se doun te mig-aneng-aneng dan te insogò sikandin amon mayad te menge kelidoan dan tepad te pista. Mig-aneng-aneng se doma te insogò sikandin amon memegay te kwarta diyà te menge otaw sagkep.

³⁰Na, penga te pegkaen i Judas te pan imbegay i Jesus kandin, limowà te balay, aw delem den.

³¹Penga te pegkesayo i Judas, minikagi si Jesus, “Ipekità den te siak se Timanem Migpekeotaw, aw pineokit kanak ipekità heman te melangkaw se Timanem.

³²Aw ipekità te melangkaw se Timanem pineokit kanak, sikandin heman se megpekità te melangkaw a, aw yan se ipekità din te eked den kenamay.

³³“Menge batà ko, eked den kenamay se pegdoma ko kenyo. Penga niyan, pengkey pemehaen a niyo, meneng onawa se kagi ko kenyo te inikagi ko kedengan diyà te menge obanen te Judiyo, te eked kaw pa pekedoton te dotonan ko.

³⁴Doen den kaling punù ko kenyo seini. Pegpedekelay kaw te pedowan. Keilangan megpedekelay kaw te pedowan iling te kedakel te pedowan ko kenyo.

³⁵Aw megpedekelay kaw te pedowan, yan se pengilala amon metaga-taga se kedita te otaw te menge tinoledaan ko sikiyo.”

³⁶Mig-insà si Pedro, “Pengolo, kenan ka lay doton?” Timaba si Jesus, “Eked ka pa pekedoma kanak doton te dotonan ko. Meneng tomelokon ka kanak te modi aldaw.”

³⁷Minikagi si Pedro, “Pengolo, nengà lay eked a den pekedoma kamno? Neketagad a den pengkey imetayan a tandà te pegtaking ko kamno.”

³⁸Timaba si Jesus, “Eden no aw neketagad ka den imetayan tandà te pegtaking no kanak. Eneng-enengi se kagi ko kamno. Te eked pa pegkolaak se manok te iselem, ibolon a nikaw te meketelo.”