Yohane 13:22-38

²²Iwanang'ina wake tsawelolesa na ng'awamanyile bae yang'ali yomlonga nani.

²³Imwanang'ina yumwe, iyanoghelighwe na Yesu, tsakakala habehi naye.

²⁴Simoni Petiri kampfinyighitsa na kulonga, “Mghutse yomlonga nani.”

²⁵Imwanang'ina ayo kasoghela habehi na Yesu, kamghutsa, “Imtwatsa, umlonga nani?”

²⁶Yesu kamwidika, “Imunu yula iyanimwing'a chihande che chighate chanipfabika mwibakuli, ayo iyo yeye.” Kuya kasola chihande che chighate, kachipfabika, kamwing'a Yuda, imwana wa Simoni Isikarioti.

²⁷Bahala Yuda hayasolile chighate, Setani kamwingila. Kuya Yesu kamlongela, “Tenda himahima chaubama kutenda!”

²⁸Lekeni mna iwanu wala iwang'ali wakuja tsahaduhu imunu iyamanyile ule Yesu tsakamlongela pfino.

²⁹Kwaapfila Yuda tsakakala mkinda mkoba ghwa sendi, iwanang'ina wangi wapfikitsa Yesu yang'ali yomlongela Yuda yaghende kughula ipfinu ipfibamighwa mne Ichihungo, au kuweng'a chinu iwahingwa.

³⁰Bahala Yuda hayasolile chighate, kalawa kunze. Tsaikala nechilo.

³¹Yuda hayokile, Yesu kalonga, “Lelo utunitso we Imwana we Imunu woneka, na utunitso we Imulungu woneka kubitila yeye.

³²Ka utunitso we Imulungu ughubulighwa kubitila yeye, kuya Imulungu imwenyegho katsoughubula utunitso we Imwana we Imunu, na baho katsomtunya.

³³Wanangu, nitsokala namwe chidodo. Mtsombama, lekeni sambi nowalongela achila chaniwalongele Wayahudi, ‘Kwanighenda ng'amdaha kutsa bae.’

³⁴Lelo noweng'a laghitso lya sambi. Mwinoghele. Ka pfaniwanoghele, namwe mwinoghele pfipfo.

³⁵Mng'enoghela, iwanu wose watsomanya mwemwe mwa iwanang'ina wangu.”

³⁶Simoni Petiri kamghutsa, “Imtwatsa, ughenda kwani?” Yesu kamwidika, “Ng'udaha bae sambi kuniwinza hanu hanighenda, lekeni hambele kutsoniwinza.”

³⁷Petiri kamghutsa, “Imtwatsa ule sidaha kukuwinza sambi? Nene nitsokulapfila ughima wangu.”

³⁸Kuya Yesu kamwidika, “Ghweghwe kodaha kundapfila nene ughima wako? Nokulongela ghendo, jogholo ng'ana yeke bae kutsonibela mala ndatu!