Yohani 13:22-38

²²Vandundami vayilola veni kwa veni, vamanya ha akumuwomba ghani.

²³Paveli na ndundami yumu Yesu yamtamili aveli kayikala pambali yaki.

²⁴Simoni Petili akamukupisheyi kwa mawoku pawomba, “Mudashi akumudeta ghani?”

²⁵Ndundami yula kaselela pabehi na Yesu kamudasha, “Bambu ghani ayu?”

²⁶Yesu kayangula, “Yula yindimupa chipandi cha libumunda chinikishilili ndi mweni. Pambeli katola chipandi cha libumunda kalikishila, kamupa Yudasi mwana wa Simoni Sikaliyoti.”

²⁷Yuda patolili libumunda lila, tepu, Lijangavandu limwingila. Yesu kamuwombela, “Chiwudayila kugola goli kalopu.”

²⁸Kwa hela mundu yayikalili pamesa yamanyili kucha wuli kamuwombela wula.

²⁹Yudasi aveli mkola mbiya, vamu vamanyili kucha Yesu akumuwombela mweni akahemeli findu fya lihungu awu kuvagayila vagaju findu.

³⁰Tepu hela Yuda payangili hela libumunda lila, kafuma panji. Ndayiva pamihi.

³¹Yuda pawukili kala, Yesu kawomba, “Topi ukomi wa Mwana wa Mundu wukuwoneka, ponopa ukomi wa Chapanga akuwoneka kupitila mweni.

³²Kucha ukomi wa Chapanga ukuwoneka kupitila mweni, topi mweni Chapanga dagoli ukomi wa Mwana wa Mundu wuwoneki, tepu dagoli afi.

³³Vana vangu dandivi na yumwi padokwa, damunzaki, kucha ndivawombilili Vayawudi, nguvawombela ponopa, ‘Kunyenda, damufiki ha.’

³⁴Lilawu lya shonu nguvagayila, muyitami yumwi kwa yumwi, kucha ndivadayilili nenga, ponopa muyitami yumwi kwa yumwi.

³⁵Naha vandu vosi davamanyi kucha yumwi muva vandundami va nenga, mani mkuyitama yumwi kwa yumwi.”

³⁶Simoni Petili kamudasha, “Bambu, ukuyenda koti?” Yesu kamuyangula, “Kunyenda nenga dauweshi kungovekela ha. Dawungovikeli pambeli.”

³⁷Petili kadasha, “Bambu, wuli nenga dangweshi ng'odu kukukovikela ponopa? Nenga danyasi unofu wangu kwanongwa ya yuwi.”

³⁸Pambeli Yesu kamyangula, “Nakaka yuwi daumalili unofu waku kwanongwa ya nenga? Nakaka nguvawombela kandi njowolu akali kuvika yuwi daunemi nenga myanja mitatu!”