SAN JUAN 13:22-38

²²Sya, mbui' myen' xin' mté'th Jesús loo thìb xtàa myen' no loo tedib xtàa myen' tac ne'nda'de myen' cuent chó myen' nac co' ta'xù' Jesús loo mèn.

²³Per thìb myen' xin' mté'th Jesús co' más mque' lezo' ñèe Jesús, myen'a nzo bda' lad Jesús co'se' ngue yuhua rsè Jesús con myen'.

²⁴Sya, mbli Mon Pedr señ loo myen'a par ñibdi's myen'a loo Jesús chó myen' nac myen' co' ndxab Jesús le' myen' ta'xù' Jesús loo mèn.

²⁵Sya, sate más mxyo'f bda' gax myen'a loo Jesús par ñibdi's myen' loo Jesús. Ndxab myen': ―Tad, ¿chó nu'i, à'?

²⁶Jesús mcàb loo myen'a. Ndxab Jesús: ―Hui' nexa. Daa tegaz thìb le' pan le'n cald. No loo xa' co' tan thìb le' pana, xa'ai. Tataaque' mbli Jesús. Mtegaz Jesús thìb le' pan le'n cald. No mda' Jesús pana loo Jud Iscariot, xgan' Mon.

²⁷Le' sya, texal nduhua Jud thìb ro pana, ndoole' Mebizya ngulàa Mebizya le'n lezo' Jud. Sya, ndxab Jesús loo Jud: ―Con' co' nzo lezo'l par lil, lueg lueg blii.

²⁸Per nec thìb myen' co' nzi yuhua no Jesús loo mes, ne'ñeede myen' no ne'ta'de myen' cuent chonon ale tataa ndxab Jesús loo Jud.

²⁹Ndxep myen' mbli xtùuz por nzo ya' Jud bols co' ndxòosua' tmi, por cona mbli myen' xtùuz tataa ndxab Jesús loo Jud: Fxi con' naquin na' co'se' gáal lni, o: Fta' ndxep centav càa mèn prob.

³⁰Texal ngolo nduhua Jud thìb ro pana, xexte ngro' Jud par fuer. Hor co'se' ngro' Jud par fuer, hora nde làale' yál' izlyo' huiza.

³¹Texal ngolo ngro' Jud, Jesús ndxab loo myen' xin' mté'th Jesús: ―Nalle' nac tiemp co'se' lu'en con' roo con' xèn co' nac cón chenen, daa co' mbal yáal loo izlyo' ndxè' xalque' ndxáal chol mèn loo izlyo' ndxè'. No li Diox gàc con' roo con' xèn cón che'n Diox loon.

³²No chele' daa, co' mbal yáal loo izlyo' ndxè' xalque' ndxáal chol mèn loo izlyo' ndxè', lu' con' roo no con' xèn cón che'n Diox loo mèn nalle', le' sya, Diox, ne, lu' loo mèn con' co' nac con' roo no con' xèn co' nac cón che'npe' daa co' nac xgan'pe' Diox. Naba'leque' lu' Diox loo mèn con' co' nac con' roo no con' xèn co' nac cón chenen.

³³Gu' co' nac xal xin' bix daa, thidtene niin loo gu' nalle': Ya ne'tolode go non gu'. Gu' cua'n daa. Per xalque' nac di's co' ndxaben loo mèn co' ñibe', no co' ndyoo ner, no co' ndyoo naa loo mèn nación Israel, leque di'sa ngue niin loo gu' nalle': Co'te' biin, gu' ne'gácte yòo nalle'que'.

³⁴Daa ngue tan' tedib di's co' ngue ñibe'en loo gu' co' nac yalñibe' cub co' ngue ñibe'en loo gu' par li gu'i: Fque' lezo' gu' gunèe gu' thìb xtàa gu' no tedib xtàa gu' xalque' mque'que' lezon ñèen gu', ndee. Tataaque' ndlyazen fque' lezo' gu' ñèe gu' thìb xtàa gu' no tedib xtàa gu' xalque' ngue lezo' gu' ñèe gu' gu', ndee.

³⁵Chele' gu' nque'que' lezo' ñèe gu' thìb xtàa gu' no tedib xtàa gu', sya, ryete mèn izlyo' ta'que' cuent le' gu' nac xin' mté'th daa.

³⁶Sya, mnibdi's Mon Pedr loo Jesús. Ndxab Mon: ―Tad, ¿páxe' ya U'? ¿Chonon tatua' mbez U', à'? Jesús mcàb loo Pedr. Ndxab Jesús: ―Co'te' biin, lùu yende mod tyoo nque xísen nalle'. Per yiloa lùu tyoo nqueque' xísen.

³⁷Sya, ndxab Pedr loo Jesús: ―Tad, ¿chonon ngue li U' xtùuz ne'gácte daa too nque'en xís U' nalle', à'? Daa ngòc nable' par gath daa por cón che'n U' chele'i naquin, Tad.

³⁸Per Jesús le'le' mcàb loo Mon Pedr. Ndxab Jesús: ―¿Ché', lìcque', mnibe'l loo lezo'l gathl por daa, cà', Pedr? Lìcpe' ba'i, na ngue nii lool: Ndoore' cuezèe nguiidtee lé' nguiidtee yál' nal yál', lùu cà di's daa son vez loo mèn nal yál'.