João 13:22-38

²²Aituo xina âzedyly. Toenzepa xina âseguâdâdyly, ânguy agueho xina nutuba tawylygue.

²³Urâ Jesus toenzepa inwyneguyly iwaguepa ani iopay ekadybyem wawyly.

²⁴Simão Pedro PUK PUK idyly, ânguy wâgâ Jesus aguely awyly auguehoem.

²⁵Aituo ago Jesus iopaji udâly, kampâiguehoem: — Pymâ, ânguyka ise âdysedonro modo emaxi igameim? — uguely.

²⁶Jesus in-hoguly: — Mâkâ pão ikuiby kâunduhobyry — kely. Aituo pão SAGAI ietyby nhanâdyly, inkuily prato odanogue, Judasram nhuduly, Simão Queriote donro imeryram.

²⁷Judas pão nhemakely. Ilâenlâ Satanás emaxi idyly, Satanás “Aiekâ” kehobyry anhetoem. Aituo Jesus eyam aguely: — Amânhedyse mato inepa aiekâ — kely.

²⁸Xina mesa wogonro modo nutuwâbyra akâwâm âdaituo Jesus arâ aguely awyly.

²⁹Judas dinheru etary eni awylygue ani xina ewy tyangahu oday aguely: Tâlâ pylâ wakeim modo: — Jesus gâlâ keanra Judas pyni nhanâdyse âtyem warâ? — keim. Eagonro modo aguely: — Âdy pebaom modoram âdylâ nhuduen-honly lâgâlâ keanra Jesus — warâ kely.

³⁰Pão emakeimbyryem, inepa kehoem Judas idâly. Iamu odaylâ egasely, kopae awylygue.

³¹Judas âxiguebygueduo Jesus xinaram aguely: — Iwaguepa urâ Uguondo Kaynâpa Âetyby yigueho. Yigueday ise won-honru, koendâ wawyly, Deus koendâ awyly, eon-honru warâ kâenehonly.

³²Deus koendâ awyly, eon-honru warâ enehonze urâ. Alâpylâ awâkâ, koendâ wawyly, won-honru warâ enehonze. Inepa ise awârâ aidyly.

³³Tâjiunwym tymery inwynedo ara lâpylâ âwynedylymo. Âdiempa kulâ ise agâmo wawyly. Udâpygueduo, uize âmaemo. Judeu domodo iwymârydoam uguemy myara olâ âyanmo auguely: “Udâhobyryam mydâpa olâ ise âmaemo.”

³⁴Iwelo tâzezewenry ise xirâ: “Mâkâ agâ, mâkâ agâ warâ âpynedaungâ, âwynedylymo ara.”

³⁵Mâpynedylymo-ro watay, idânârâ kurâdo xutuze ynynonro mawylymo — kely.

³⁶Aituo ani Simão Pedro Jesus nhapâiguely: — Âdyanka ise mydâly, Pymâ? — kely. Aituo Jesus in-hoguly: — Iwerâma ise âmâ udâhobyryam mydâpa. Iweâkuba ise mydâly — kely.

³⁷Pedro nhapâigueondyly: — Âdaituoka iwerâ mydâhoram, udâpa wawyly? Kâmayno amaymba imakeze iguein-em kâdutuly! — kely.

³⁸Aituo Jesus eyam aguely: — Âkeaka? Xirâ enanâguegâ. Xirâ kopae, aukuma igâtudyly iraynâ, azagâ tokalâ warâ ise “Jesus kâuntuwâbyra urâ” myguely — kely.