Jon 13:22-38

²²Jisas agai te po obaso, te aga wali pabo bidi augwa hasi deli deligo augwa hasi tonono pai. Augwaligo konebeo, Jisas agai debolo wabowe, te homu yai.

²³Te augwali tomode bidi me deli te Jisasgo aga dali dwagi yai homu eyu tama mu godola pabo, te bidi aga pąde bidai.

²⁴Te bidibolo Saimon Pita agai “Nago agabolo hanalu wao, agai debolo te po waliwe?” te po wabo tiwai Pitago te bidibolo guni midigilali.

²⁵Tibaso, te bidi me Jisas tigiba kisa sagaselama, Jisas dali te po hanalu wai, “Genuai Bidi, nago mena bidide te po obawe?” wali.

²⁶Tama Jisasgo po wei ponoyu, te po wai, “Eno e tubo nai bret dagego te poude elalubo tubo nai meba selama, tama bidi me deli mawaibao. Te bidi te tama dao.” Tilama, Jisasgo bret naigo te poude elalubo nai meba selama, tama Judasbolo mawai. Te bidi Judas, aga aya nogi Saimon, aga bulu nogi Keriot dao.

²⁷Judasgo te nai sai, tama tamadi tama te dwai haubo mobo bidi nogi Satan agai Judasgo homude dwai po mu muai. Jisasgo agabolo te po wai, “Nago te sę yai wida, te nago polo yao,” Jisasgo te po Judas dali wai.

²⁸Te nai tuyu dulaluali bidi dabe augwaligo Jisasgo Judasbolo wali po page konebeo.

²⁹Judas agai augwaligo masigi bubo honoli tonalubo bidi dao. Tama tibaso, mebago te homu yai, Jisasgo Judasbolo olo bidibo side tubo nai abelabo po agabolo wabo, te homu yai. Mebago te nai meni yai bidi dabe maiabo nai po wabo, te homu yai.

³⁰Tialima, Judas Jisasgo mani nai agai sai, tama polo Judas aga te be buluba pai. Tama bulu hulia sai.

³¹Te Judas te be buluba pai digi, tama Jisasgo te po wai, “Megi tama te Godigo Bidi Mu aga genuai bomo dali genuai nogi dali te we bidi augwaligo koneaibao. Tama Godigo Bidi Mu agai Godigo genuai bomo dali genuai nogi dali augwalibolo ola mawaibao.

³²Tama Godigo nogi te Godigo Bidi Mude siyu da, teda Godigo te Bidi Mu nogi ugwaba saibao, tamadi tama te sę yaibao.

³³Abagi dede, dwasianu sogo ena dage dali bidaibao. Tama dagego ena gegebo sę yaibao. Tama eno Juda bagebolo wali po gilama, tama megi eno dagebolo me obao, dage ena pabo buluba me pogobeo.

³⁴Eno dagebolo gesi bomo yai po mobao, dagego duga hasi dali dwagi yai homu eyu, augwali godolo mu yao. Eno dage dali dwagi yai homu eyu, godolo mu yali gilama, tilama duga hasi dali me dwagi yai homu eyu, augwali godolo mu yao.

³⁵Tama dagego duga hasi dali dwagi yai homu eyu, augwali godolo mu eyu da, teda tigidali we bidigo sulama, koneaibao, dage da ena wali pabo bidi da waibao,” Jisasgo te po aga bidi dabe dali wai.

³⁶Te Jisasgo te po augwalibolo olama, tama Saimon Pitago agabolo te po wai, “Genuai Bidi, nage mena paiwe?” Jisasgo Pitabolo po wei ponoyu, te po wai, “Ena pabo bulu nago ena wali megi pogobeo. Tialima, nosali da, nago ena wali asaibao,” wali.

³⁷Pitago agabolo te po wai, “Genuai Bidi, magi baso eno nage megi wali pogobewe? Eno nage tau somainogo ena isiyu da, te usu yaibao,” Pitago te po wai.

³⁸Jisasgo po wei ponoyu, te po wai, “Mu dawe? Ena tobade nage ena tau siyu, isabo sisi ebawe? Menio. Eno mu po nagebolo obao, be posisiąbadi, te ba kakaruk po wasiąbadi, sela sogo nago eno nogi dualaibao,” Jisasgo te po wai.