SAN JUAN 13:22-38

²²ꞌBa ꞌbatsaꞌen nga jngu jngu xutare kiskutsejenꞌa xinkjin, ngatꞌa bi be ꞌyá= xi titsure Jesús.

²³ꞌBa kio tijñatꞌa tiñare Jesús xutare xi ꞌñu tjore, nga ñatjen tikjentꞌako yamixo.

²⁴Kui kjuañu Simón Pedro ꞌekunire nga kui skuiningiyare Jesús ꞌyá= xi titsure.

²⁵ꞌBa ꞌbatsaꞌen xutare ꞌñu kitsitiñatꞌa ngisare Jesús ꞌba kitsure: —¿ꞌYá= niñu, naꞌen?

²⁶ꞌBa Jesús kitsingojore: —Sikaꞌnyicha̱ niñuxtila ꞌba kui xi sja_ra̱, kui. ꞌBa ꞌbatsaꞌen kitsikaꞌnyi niñuxtilo ꞌba kitsjare Judas Iscariote, kiꞌndire Simón.

²⁷ꞌBa kionga Judas kikaꞌere niñuxtilo, jaꞌasꞌenjinre chanayiu. ꞌBa Jesús kitsure Judas: —Kitsa tiꞌen mé= xi siꞌen.

²⁸Tunga nijnguú xi tjindutꞌa yamixo kuankjinre ánñu ꞌba kitsunire.

²⁹Tjin= xi kitsikjaꞌetsjen nga Jesús kitsure Judas nga tjinnere kuatse mé= xi machjen sꞌiu asa sjare ton xuta ni̱ma̱, ngatꞌa Judas ꞌbejñatjo ton.

³⁰ꞌBa kionga kikaꞌere niñuxtilo Judas, taꞌa fani ꞌetju ngandetsian. ꞌBa kui chubabiu je jñu yaꞌa.

³¹ꞌBa kionga je kiji Judas, Jesús kitsu: —Ngandaꞌe xiare kjuajere Kiꞌndire Xuta xiꞌiun, ꞌba=nde xiare kjuajere Naꞌenchana ngatꞌare Kiꞌndiu.

³²Tsa ꞌyare kjuajere Naꞌenchana ngatꞌare Kiꞌndiu, ꞌba=nde tsaꞌen Naꞌenchana kuakutsejen kjuajere Kiꞌndiu, ꞌba je ꞌba saꞌen xati.

³³Jun kiꞌndina̱, tojo kuatejñajin ngichi_nuu̱. kuijnyisjainuu̱, tunga ña kjuia̱ bi ku̱an kjuechu. ꞌBa nde texin_nuu̱ ngandaꞌe jo kixin_ra̱ xuta judío.

³⁴Jngu kjuatexuma xatse sja_nuu̱: timijón xingiu. Jotsaꞌen tsimején_nuu̱ jun, ꞌba=nde tsaꞌen timijon xingiu ngayeje.

³⁵ꞌBa ꞌba=tsaꞌen skue ngatsiꞌi xuta nga jun= ñu xi xutana̱, tsa simejénkaño xingiu.

³⁶ꞌBa Simón Pedro kitsure: —¿Ñá=ñu kꞌuin, naꞌen? ꞌBa Jesús kitsingojore: —Bi ku̱an sjennginaa̱ ngandaꞌe ña kjuia̱, tunga jaskan sjennginaa̱.

³⁷ꞌBa Pedro kitsu ngani: —Naꞌen, ¿ánñu bi ku̱an sjennginira̱ ngandaꞌe nde? Tjijngu kakua̱n nga kueyantjaira̱.

³⁸ꞌBa Jesús kitsingojore: —¿A tjijngu kakuin nga kueyantjainaa̱? Kjuakixi= xi texinra̱. Je ján ndiya kikeꞌmotaꞌennaa̱ kionga kje kjiꞌndajín chaxicho.