Jon 13:22-38

²²Ma kana kivikivina ivi kitavonevoneyana ma nuwanuwasi ivivi tetei da iyi weni berana ina berai.

²³Ma kana kivikivina sago na Yesu ina nuwaviina ghamana. Ma tuna wawayina na ririnai imakamakai,

²⁴ma Saimon Pita gayamina irutawei kurina ma ivona bo, “Kevi tarakiiyanei da iyi evonavonei.”

²⁵Ma tomowina ivi rugwabi Yesu kurina ma ivonei bo, “Bada, wawayina na iyai?”

²⁶Yesu ivonapotei bo, “Weni parawina ku redu ana kiikutuvi na wawaya sago ana verei. Wawayina na tuna.” Nani murinai parawa iviiya ikiikutuvi ma Saimon natuna Judas Iskariyot iverei.

²⁷Ma Judas parawa iviiviini na Seitan itowatepani da ivi badei. Ma Yesu ivona bo, “Kevi yaghiyaghina. Aviyavisina kenotanotai da kuta berai na wekarakava keberai.”

²⁸Ma nani kamna kamonai ke sago iyi itakovi da avi kubiine Yesu weni nakanani Judas ivonei.

²⁹Viya inotai da Yesu ivonei da vavai ita gimara bo wawaya moyamoyakisi mane ita veresi, iyamna Judas na i mane kana koyakoyagha.

³⁰Ma vaghina Judas parawa ivopotei ma numa ikiibutawei da ku nubakutuva irui.

³¹Judas ikiibau inae ma nani murinai Yesu ivona bo, “Marana inekiibau da taku Wawaya Natusi kaku kadara ani debei. Ma bade aviyavisina ina tupuwa kuriku na God kana kadara ini debei.

³²Ma nani berasi wekarakava ina tupuwa na bade taku God Natuna kaku kadara ini debei.

³³Natunatuku, ke mara gurina ma ana kuyowemi. Ma Jiu babadisi ikikava avonesi na tami bade nakanani avonavonemi. Kona kita kaviku iyamna mike ana nae na tami ke kovokovoghina da kona kiviniku.

³⁴Tuna kubiine sisiya bagibagina vuna avereveremi. Kovi nuwaviinavivirana. Ikikava taku nuwanuwami aviiviiya, tami bade nakanani kovi nuwaviinavivirana.

³⁵Ma kamomiyai koni nuwaviina na wawaya peyarisi inakovi da tami na kaku kivikivina.”

³⁶Ma Saimon Pita ivi tarakiiyana bo, “Bada, mike kenenae?” Ma Yesu ivonapotei bo, “Mike anenae na tam wekarakava ke kovokovoghina da kuna kiviniku. Ma karakava da kuna kiviniku.”

³⁷Ma Pita ivi tarakiiyana bo, “Bada, avi kubiine ke wekarakava ana kivinim? Aku yawasa anuwatawei da tam kubiim ana rabobo.”

³⁸Ma Yesu ivonapotei bo, “Vona bubuna bo kegha da am yawasa kuna nuwatawei kubiiku? Vonavaghata avonavonem, muriyai da kokoreko ina tou na tam mara aroba kuni bero da ke kutakoviku.”