Zone 13:22-38

²²Ke vari doṉoi sari na disaepeli, meke pupuhu beto nia dia sapu esei si gunia Sa.

²³Ba keke ri kasa disaepeli sapu tataru hola nia Zisu, si habotu kapae nana koa Sa.

²⁴Ke sipua Pita si asa meke zama, “Nanasia ko, esei si gunia Sa?”

²⁵Ke rizu tata valeana la koe Zisu sa disaepeli asa meke nanasa, “Baṉara esei si gunia Goi?” gua si asa.

²⁶Meke olaṉa la ia Zisu si asa, “Kote poṉa ia Rau sa bereti, meke ponia koasa tie asa.” Ke hena ia Sa si keke kali bereti, meke poṉa ia Sa, meke vala nia Sa koe Ziudasi, sa tuna e Saimone Isikarioti.

²⁷Sipu hena tugo Ziudasi sa bereti, si nuquria mo Setani, ke zama la ia Zisu si asa, “Ego, ture tavetia tu sapu hiva nia goi!” gua si Asa.

²⁸Ba lopu keke koari kasa pa tevolo si hite gilania, sapu gua zama nia Zisu koa sa.

²⁹E Ziudasi sina tie kopu poata, ke balabala ia rina disaepeli sapu gina tozi nia Zisu si asa, pude la holui kaiqa toṉa, sapu hiva ni rini pude tanisa inevaṉa, babe poni sari na tie habahuala, gua.

³⁰Sipu hena ia Ziudasi sa bereti si vura taloa si asa, na ele boṉi sa totoso asa.

³¹Sipu ele taloa tu se Ziudasi si zama se Zisu, “Kamahire si tava lavata sa Tuna na Tie meke sa Tamasa si tava lavata koa Sa.

³²Meke be tava lavata sa Tamasa koasa Tuna, si kote va lavatia sa Tamasa sa Tuna meke kote tuturei va lavatia Sa.

³³Kasa tuqu, lopu kaqu koa va seunae koa gamu si Rau. Kote hatau gamu si Rau, ba maqu tozini gamu kamahire gua sapu tozia Rau koari na koimata tadi na tie Ziu, sapu guahe: ‘Lopu kaqu boka la ia gamu sa vasina pu korapa la ia gua Rau.’

³⁴Ke kamahire si ponini gamu Rau si keke tinarae vaqurana: Mi koa varitatarue, gua tugo sapu tataru guni gamu Rau, si mi koa vari tatarue gua tugo asa.

³⁵Be guana koa vari tatarue si gamu, si kote gilania ri doduru tie, sapu gamu sina Qua disaepeli.”

³⁶Meke nanasa la ia Pita si Asa, “Baṉara, pavei si korapa la Goi?” Meke olaṉa se Zisu, “Kamahire si lopu kaqu boka luli Au goi vasina sapu korapa la ia Rau, ba koari na rane pu mae kote boka luli mae Au goi,” gua se Zisu.

³⁷Meke nanasa pule se Pita, “Baṉara, na vegua ke lopu kaqu boka luli Go tu rau kamahire? Na ele va namanama mo si rau, pude mate nigo,” gua si asa.

³⁸Meke olaṉa se Zisu, “Vegua, hinokara sapu va namanama valeana si goi, pude mate Nau? Maqu tozi va hinokara nigo, sipu lopu ele kabo sa kokorako si kaqu oso Nau goi ka ṉeta totoso.