JUAN 11:19-55

¹⁹No ndal men-Israel wa wanino Mart yrup Mart Mli por ne wet Laser bzaan men.

²⁰Chene waknan Mart ne le Jesus che mer ydxiin, wruu Mart watsëlnëz Mart Jesus, le Mli wyan ruyuu.

²¹Lex re Mart lo Jesus: ―Dechey, belne nako ne ka de nee, nyetet bzaan noo.

²²Per che nan noo ne mase orree slaa Dëdyuzh yrandxee ne ynab de lo Ne.

²³Wke Jesus, re Jesus: ―Sban bzaan de.

²⁴Orguin re Mart: ―Che nan noo ne sban men chene yban mengut chene che lultim dxe.

²⁵Lex re Jesus: ―Noo nak men ne rneban mengut no noo ke nak men ne rseleedx gyelembán lo mén. Mén ne rlaleedx noo, mase guet men, per sbán ke men.

²⁶Yrandxee mén ne mbán, belne rlaleedx men noo, nunk guetet men. ¿Pe rlaleedx de neree?

²⁷Wke Mart, re Mart: ―Rlaleedx noo we Dechey; rlaleedx noo ne laa de nak Crist ne rap degne chiid gyëzlyu, laa de nak XPee Dëdyuzh.

²⁸Wluzh re Mart zeree lo Jesus, lex wa men waluu men diiz lo Mli bël men, ngueedxendxee re men lo Mli: ―Le Maxter che wlenza, laa de rbëz Maxter.

²⁹Zegne won Mli zenga, wzuligue men za men lo Jesus.

³⁰Gardet tee Jesus lenlgyëz, benak zu Ne ledne wtsëlo Mart Ne.

³¹Chene wii yra men-Israel ne ndxinnino Mli ruxyuu Mli ne noze ryob rdxiintee za Mli, wrunal men Mli; nuu lextoo men pazer ruxbaa bzaan Mli za Mli goon Mli.

³²Chene wdxiin Mli ledne zu Jesus, wzuzhib Mli lo Ne, re men: ―Dechey, belne nako ne ka de nee, nyetet bzaan noo.

³³Ne wii Jesus ne roon Mli no ne roon yra men-Israel ne zanal Mli, axtegue nandet Ne pe wuu lextoo Ne, wdenles lextoo Ne;

³⁴lex wnabdiiz Ne lo men, re Ne: ―¿Pazh wguu de men? Orguin re men: ―Dechey, gutaa tsa be wii gante.

³⁵Woonegue Ne.

³⁶Lex re men-Israel: ―Gukwii gante pezee ryaan men Laser.

³⁷Per le gwrol men re: ―Ménree nga wlaa ne wyenii bzalo menngwlëë, ¿pe bet wakdet nlaa men chen nyetet Laser?

³⁸Kesentyent wdenles lextoo Jesus ste, wbig Jesus ruxbaa Laser; te bluu nako, te gye zemzëë we.

³⁹Lex re Jesus: ―Gugyitxee gye gwa rubaa. Orguin re Mart bzaan mengut guin: ―Dechey, pazer che ndxiin rree men, porke che wluzh tap gbiz ne wet men.

⁴⁰Wke Jesus, re Jesus: ―¿Pe let che nadet noo lo de ne belne rlaleedx de noo, swii de xgyelenzoon Dëdyuzh?

⁴¹Orguin wgyitxee men gye guin. Lex wlis lo Jesus wii Ne gyeybaa, re Ne: ―Dëde, dexkyizhtee de ne wkagyedyag de xdiiz noo.

⁴²Che nan noo ne syemper rkagyedyag de xdiiz noo, per na noo we por yra ménree ne ndxin nee, chen ylaleedx men ne laa de wxaal noo.

⁴³Chene wluzh re Ne zenga, wkarëz Ne, re Ne: ―¡Laser, guruu wa!

⁴⁴Orguin wruu Laser, noze nrëldíp lër nii nyatee men no le lo men. Lex re Ne lo yra mén guin: ―Guchil lër gwa led men, gudee si gya men.

⁴⁵Yra men-Israel ne zanal Mli, ne wii men ne wneban Jesus Laser, ndalyaa men wlaleedx Ne.

⁴⁶Per le gwrol men wa lo men ne nak farisew, wa gue men neguin ne wlaa Ne.

⁴⁷Lex wa yra fxuz ne rnebééy lo yra fxuz yra men men ne nak farisew wtop men xtis-Israel, re men: ―¿Pezee ylaa be? Porke ndal gyelmilaguer kalaa mén gwa.

⁴⁸Belne ydeer be si ylaa men zegwa, yrandxee mén ylaleedx men, no schiid xtis-Roma yluzh men xeydoo XDëdyuzh be no yluzh men xnacion be.

⁴⁹Lad ke men yra men nuu te men ne la Caifás ne nak fxuz ne mazre nondee iz guin, lex re fxuz guin: ―Laa de yra de bet nandet de,

⁵⁰ni ryenden de ne wendee guet tebegue mén por yra men-Israel ke ne luzh yrandxee men-Israel.

⁵¹Per let nozdet lextoo Caifás wzaa ne re men zenga, sinke, kom laa men nak fxuz ne mazre nondee iz guin, por neguin wguu Dëdyuzh diiz guin lextoo men ne re men ne guet Jesus por yrandxee men-Israel,

⁵²no let nozdet por yra men-Israel, sinke no por ne gaktes yra men ne nak xpén Dëdyuzh, yra men men ne nuu ydendxee gyëzlyu.

⁵³Kwlotee cheguin wyan xtis-Israel diiz ne yket men Jesus.

⁵⁴Por neguin wkanyoodetre Jesus lad men-Israel, lex wruu Ne nga za Ne te gyëz ne la Efraín ne nak guex denbidx. Nga wkaa Ne yra Ne xpén Ne.

⁵⁵Kom che wyob pask lni ne rlaa men-Israel, ndal mén ne nuu yrandxee gyëz ra Jerusalén chen ylaa men zegnak xkoxtumber men ne rakndaa men nes lo Dëdyuzh antes ne ydxiin pask.