Jon 11:19-55

¹⁹Kawaajoŋ Juuda ejemba mamaganoŋ Marta Maria naaŋgara komurotiwaajoŋ ‘Soŋgoŋ iriiboŋa,’ jeŋ kaŋ ragi.

²⁰Ragi Martanoŋ “Jiisas kaja,” jegi moma miri mesaoŋ kananoŋ kema mokolooroto, Marianoŋ mirinoŋ raro.

²¹Kananoŋ mokolooŋ kokaeŋ ijoro, “Poŋ, gii kokanoŋ laligonagati eeŋ, naaŋnanoŋ mono mende komunaga.

²²Mende komunagato, giinoŋ kambaŋ kokaamba kaaŋiadeeŋ Anutuwaajoŋ iwoi mombaajoŋ qama kooliwaati eeŋ, ii kuuya saanoŋ moma gono mokoloowaga, iikaaŋ mojeŋ.”

²³Qaa ii moma Jiisasnoŋ ijoro, “Goo naaŋganoŋ mono gbiliŋ waabaa.”

²⁴Ii moma Martanoŋ jero, “Balombaa kambaŋ tetegoyanoŋ koomuya yoŋonoŋ waabuti, iinoŋ mono kambaŋ somata iikanoŋ gbiliŋ waabaati, ii moma yagojeŋ.”

²⁵Kaeŋ jero Jiisasnoŋ ijoro, “Koomunoŋga waawaataa Toya ii niinoŋ koloojeŋ. Neeno Laaligo kotigaa Toya koloojeŋ. Iikawaajoŋ moŋnoŋ nii moma laariŋ nonji, iinoŋ komuwaato, kileŋ toroqeŋ laligoŋ kotiiŋ laligowaa.

²⁶Moŋnoŋ moŋ namonoŋ laligoŋ moma laariŋ nombaati eeŋ, iinoŋ mono kambaŋ moŋnoŋ koomu kom-bombaŋa mende komuwaa. Qaago. Qaa ii moma laarijaŋ me qaago?”

²⁷Martanoŋ qaa ii moma jero, “Oo Poŋ, ii moma laarijeŋ. Giinoŋ Anutuwaa Meria koloojaŋ. Hamoqeqe Toya Kraist namonoŋ asugiwaatiwaa jegiti, giinoŋ mono ii koloojaŋ. Kaeŋ moma laarijeŋ.” Kiaŋ.

²⁸Martanoŋ qaa kaeŋ jeŋ mirianoŋ eleema kema koga Mariawaajoŋ oloŋ jero goraayanoŋ karo ijoro, “Boinoŋ kaŋ kananoŋ nama goojoŋ endu kema iibagiwaajoŋ jeja.”

²⁹Kaeŋ jero Marianoŋ qaa ii moma iikanondeeŋ ii mesaoŋ Jiisaswaanoŋ keno.

³⁰Kenoto, Jiisasnoŋ miri sombenoŋ mende kouro endu Martanoŋ kana somatanoŋ mokolooŋ iiroti, iikanondeeŋ nano.

³¹Juuda ejemba yoŋonoŋ Mariawo miri uutanoŋ uuta meŋ saoliwombaajoŋ ragi Marianoŋ uulaŋawo waama seleeŋgeŋ kamaaŋ keno iima kokaeŋ romoŋgoŋ jegi, “Iinoŋ mono qasirinoŋ kema saabaa.” Kaeŋ jeŋ iwaa gematanoŋ otaaŋ keŋgi.

³²Marianoŋ kema Jiisas nanotinoŋ keuma iima kanianoŋ usugoŋ kamaaŋ kokaeŋ ijoro, “Oo Poŋ, giinoŋ koi laligonagati eeŋ, naaŋnanoŋ mono mende komunaga.”

³³Kaeŋ jeŋ silama qama saaro Juuda ejemba iwo kaŋ naŋgoŋ motooŋ saagiti, Jiisasnoŋ ii iima basusuya kolaano jaaya kaliliŋgoro kana boria jeneŋawo ororo.

³⁴Jeneŋawo ororo qisiŋ oŋono, “Ii dakanoŋ aŋgi eja?” Qisiŋ oŋono jegi moro, “Poŋ, kokaeŋ kaŋ iiba!”

³⁵Kaeŋ jegi Jiisasnoŋ saaro.

³⁶Saaro Juuda ejemba yoŋonoŋ iima jegi, “Yei! Mono aliaajoŋ siiŋ mamaga eŋ muro laligoŋkeja’

³⁷Kaeŋ jegito, tosianoŋ qaa ii qeŋ kokaeŋ jegi, “Jaagoo ejemba jaagia metooŋ laligoroti eeŋ, mono saanoŋ Lazarus jero mende komunaga me?” Kiaŋ.

³⁸Kaeŋ tondu jegi Jiisaswaa wosoya mombo popoliiro jaaya kaliliŋgoro qasirinoŋ keno. Qasirinoŋ kema iwoi kokaeŋ iiro: Jamo oota urorooŋ qamoya iikawaa uutanoŋ ama naguya jamo somatanoŋ koma kojaŋgigi raro.

³⁹Ii iima kokaeŋ jero, “Mono jamo qiziziŋgogi kemba.” Kaeŋ jero eja komurotiwaa naaŋa Marta iinoŋ kokaeŋ ijoro, “Oo Poŋna, weeŋ 4 ejiwaajoŋ mono moroŋawo kolooja.”

⁴⁰Jiisasnoŋ ii moma Martawaajoŋ kokaeŋ jero, “Gii moma laariŋ nonagati eeŋ, Anutuwaa ku-usuŋanoŋ akadamuyawo asugiro iinaga. Wala qaa kaeŋ gijowe me qaago?”

⁴¹Kaeŋ jero jamo qiziziŋgogi keno Jiisasnoŋ eu uuro uro kokaeŋ jero, “Ama, gii qamakoolina mojaŋiwaajoŋ ama ‘Keraqeeaŋgo awaa!’ jeŋ gonjeŋ.

⁴²Gii kambaŋ so qamakoolina momakejaŋi, mojento, giinoŋ wasiŋ nona namonoŋ kamaaweti, ejemba tuuŋ somata liligoŋ noma koi nanjuti, iyoŋonoŋ ii moma moma laariwutiwaajoŋ ama qaa koi jejeŋ.”

⁴³Kaeŋ jeŋ aroya meŋ waama kotakota qama kokaeŋ jero, “Lazarus, gii mono waama kawa!”

⁴⁴Kaeŋ qaro eja koomuya iinoŋ gbiliŋ waama kaaro. Kana boria opo jakaŋa taaŋanoŋ esuuŋ jaasewaŋa sibenoŋ pipiiŋ somoŋgogi ero. Erota waama opo dunduŋawo karo. Kaeŋ karo Jiisasnoŋ jero, “Mono dunduŋa isaŋgi saanoŋ kemba.” Kiaŋ.

⁴⁵Juuda ejemba Mariawaanoŋ kouma Jiisasnoŋ iwoi ano iigiti, iyoŋoonoŋga mamaganoŋ uugia meleema Jiisas moma laariŋ mugi.

⁴⁶Moma laariŋ mugito, tosianoŋ Farisii (Kana qaawaa kaparaŋ-koŋkoŋ) yoŋoonoŋ kema Jiisasnoŋ iwoi anoti, iikawaa sunduya iŋijogi.

⁴⁷Ii iŋijogi jigo gawoŋ galeŋ ano Farisii yoŋonoŋ jigo kaunsol jotamemeya horoŋ oŋoŋgi ajoroogi kokaeŋ jegi, “Eja iikanoŋ aŋgoleto ku-usuŋawo ambembo meŋkejiwaajoŋ ii mono nomaeŋ ama muniŋ sokonaga?

⁴⁸Kondiaŋgoŋ iwoi moŋ mende ama muniŋ toroqeŋ kaeŋ ama laligowaati eeŋ, mono ejemba korebore ii moma laariŋ mubuyaga. Kaeŋ aŋgi Rom gawman yoŋoo iriŋgia soono kaŋ nononana jiwowoŋ jigonana ano ejemba tuuŋ somata koi nunuaŋgi eeŋ totooŋ laligowombo.”

⁴⁹Kaeŋ jeŋ ragi yoŋoonoŋga moŋ qata Kaiafas iinoŋ gbani iikanoŋ jigo gawoŋ galeŋ waŋa kolooŋ gawoŋ ii meŋ laligoro. Iinoŋ waama gejatootoo qaa kokaeŋ iŋijoro, “Oŋo uu momogiaa oota kaaŋiadeeŋ mende tooja.

⁵⁰Oŋo qaa koi saanoŋ mende gosiju: Nono ejemba tuuŋ somata korebore tiwilaaniŋ lombo somata qatawo koloowabo. Kawaajoŋ eja motooŋgonoŋ Juuda tuuŋ somata nonoo aiseŋnana meŋ dowenana komuro sokombaa.”

⁵¹Iinoŋ qaa ii iyaŋaa aroyanoŋ mende kolooro jeroto, gbani iikanoŋ jigo gawoŋ galeŋ waŋa laligorotiwaajoŋ ama aŋo qaayaa kania mende moma gejatootoo qaa jero, “Jiisasnoŋ ejemba tuuŋ somata nonoojoŋ ama komuro sokombaa.” Qaa ii hoŋaga jero.

⁵²Juuda ejemba tuuŋ somata nonoojoŋadeeŋ mende komuroto, Anutuwaanoŋ uumeleeŋ kanageso baloŋ so deeŋqeema laligojoŋi, anana kaaŋagadeeŋ mindiriŋ nonono uumeleeŋ tuuŋ motooŋgo kolooŋ laligowombaajoŋ komuro. Komuwaatiwaa qaaya ii waladeeŋ jero.

⁵³Weeŋ iikanondeeŋ kanaiŋ jotamemeya yoŋonoŋ ajorooŋ kaeŋ amiŋ moma Jiisas komuwaatiwaa qaaya jeŋ kotiiŋ areŋa aŋgi.

⁵⁴Kawaajoŋ Jiisasnoŋ toroqeŋ Juuda yoŋoo batugianoŋ asuganoŋ mende kema kaŋ laligoro. Kaeŋ qaagoto, oŋomesaoŋ baloŋ qararaŋkoŋkoŋaa goraayanoŋ keno. Iikanoŋ kema taoŋ qata Efraim kanoŋ keuma gowokouruta yoŋowo iyaŋgiodeeŋ laligogi.

⁵⁵Juuda nonoonoŋ kiaŋkomu kendonoŋ toriro. Kawaajoŋ Juuda ejemba mamaganoŋ gomaŋ so mirigia mesaoŋ koma konjoratiŋ aowombaajoŋ moma Jerusalem sitinoŋ ugi.