Johanningundru 11:19-55

¹⁹Juda kana marapu Marthangu ja Mariangu wokarana wonti pudlana nejini pudlanani ngankalkala.

²⁰Marthandru matja ngarana Jesus wokaranani, nani wapana wonti nunkangu mandurila; Maria pungani ngamantina wonti.

²¹Marthani Jesungu jatana wonti: “Kaparajai, jidni ninkida ngananani, neji ngakani wata palinani.

²²Bakana karari ngani milkila, minakulno jidni Godandru ngatjinani, jenia Godali jinkangu jinkila nganai.”

²³Jesus nankangu jatana wonti: “Neji jinkani jiritjila nganai.”

²⁴Marthani nunkangu jatana wonti: “Ngani milkila, nau jiritjila nganai tepi terkakani, ditjini ngadalani.”

²⁵Jesus nankangu jatana wonti: “Ngani tepi terkakani ja tepi nganai. Warle ngakangu morlalu ngundrai, nau tepi ngamala nganai, bakana nau palinani.

²⁶Ja worana tepi ngamai ja ngakangu morlalu ngundrai, nau morlalu ngurali wata palila nganai. Jundru jenia morlalu ngundrai?”

²⁷Nani nunkangu jatana wonti: “Kau Kaparajai, ngato morlalu ngundrai jidni Christus nganai, Godaia Ngatamura, Nauja mitani wokarananto.”

²⁸Ja nani jenia matja jatana, nani wapana wonti ja kaku nankani Mariana kurukuru karkana wonti ja jatana wonti: “Ngujangujara jinkinietja ninkida nganai ja jidna karkai.”

²⁹Nandru jenia matja ngarana, nani nurujeli jiritjina wonti ja nunkangu wokarana wonti.

³⁰Jesus jendranguta wata ngurani wokarana wonti, a-ai, Nau nunkangupini pirini nganana wonti, woderi Marthani nunkangu mandurina wonti.

³¹Juda kanali, tana nankangu jela pungani ngamana wonti ja nana ngankalkana wonti, najinani Maria nurujeli jiritjinani ja dunkanani, tana nankangu karipaterina wonti ja jatana wonti: “Nania narikutuja wapai naka jindrala.”

³²Maria naka wokaranani woderi Jesus nganana wonti, nandru nina matja najina, nani nunkangu tidnani woraterina wonti ja nunkangu jatana wonti: “Kaparajai, jidni ninkida ngananani, neji ngakani wata palinani.”

³³Jesujeli nana jindranani najina, ja Juda kana, tana nankangunto matja wokarana, bakana jindranani, Nau Jaolali ngara jerkina wonti ja ngaratutututungana wonti.

³⁴Ja Nau jatana wonti: “Woderi jura nina kurala wiri?” Tana nunkangu jatana wonti: “Kaparajai, kaparau ja najiau!”

³⁵Ja Jesus wolkarina wonti.

³⁶Juda kana jatana wonti: “Najianau worderu Nulia ninaia ngantjana paraia!”

³⁷Palpa tanangundru jatana wonti: “Naupara, Nulia butjuja milki piri ngankana paraia, ngandandarina paraia ngankala, bakana Naupini wata palinanto?”

³⁸Jesus nakaldra ngara jerkina wonti ja narikutuni wokarana wonti. Nau minka nganana wonti, ja marda nunkangu parana wonti.

³⁹Jesus jatana wonti: “Nina marda tirimalkanau.” Martha, naria kaku, nunkangu jatana wonti: “Kaparajai, nauja matja paniai, ngangau nauja ditji mandru ja mandru parai”

⁴⁰Jesus nankangu jatana wonti: “Ngani jinkangu wata jatana warai, jundru morlalu ngundranani, jundru Godaia pirnala najila nganai?”

⁴¹Tanali nina marda tirimalkana wonti, woderi nau nari paranani. Ja Jesus milki tjenmana wonti ja jatana wonti: “Ngaperiai, ngato jidna jurakokala wapaia, ngangau jundru ngana ngarana warai.

⁴²Ngani milkila, jundru ngana milingeru ngarai: windri kana wolarandru, tanaia karakara terkai, ngani jenia jatana warai, ngangau tanalia morlalu ngundrananto, jundru ngana jinpanala.”

⁴³Ja Nau jenia matja jatana, Nau ngaiala pirnali karkana wonti: “Lazarujai dunkau!”

⁴⁴Ja nau narila dunkana wonti mara ja tidna nari katieli karaterini, ja nunkangu mudlani kangu kati paranani. Jesus tanangu jatana wonti: “Ninaia dukaranau ja worani patanau!”

⁴⁵Juda kana marapujeli tana Mariangu wokarana wonti ja najina wonti mina Jesujeli ngankana wonti, tana nunkangu morlalu ngundrana wonti.

⁴⁶Palpa tanangundru Pharisaiaia wapana wonti ja tanangu kaukaubana wonti mina Jesujeli ngankana warai.

⁴⁷Priesta pirnali ja Pharisaiali kana kapara jurborilkana wonti ja jatana wonti: “Mina ngaiana ngankananto? Nulupini kanali malka marapu ngankai.

⁴⁸Ngaiana nina jeruja worani patanani, tanali pratjanali nunkangu morlalu ngundrala nganai; ja Roma kana wokarala nganai ja ngaianani piri ja kana wolara manila nganai.”

⁴⁹Kulno tanangundru, Kaiphas, nau nunkangupini kilpawoldrani Priesta pirna nganana wonti, tanangu jatana wonti: “Jura panila ngujamai.

⁵⁰Jura bakana wata ngundrai, ngaianangu morla ngumu nganai, kana kulno kana wolarani palinanto, ja wata kana wolara tintaterinanto.”

⁵¹Jenia nau wata munta jatana wonti, a-ai, ngangau nau nunkangupini kilpawoldrani Priesta pirna nganana wonti, nulu talpadakana wonti Jesus palinanto kana wolarani.

⁵²Ja wata windri kana wolarani, a-ai, Nulu bakana Godaia kupa, tana piltjaru ngamanani, kulnukulnuni ngankananto.

⁵³Nunkangupini ditjindru tana ngankamalina wonti nina naria nandrala.

⁵⁴Jesus wata morla Juda kanani kantji wirarina wonti, a-ai, Nau nakandruka puntina wonti mita pitaraia karakaraia, ngura kulnuja, tala nunkani Ephraim, ja Nau naka ngamana wonti nunkani milinto.

⁵⁵Juda kanaia Passa karakara nganana wonti, ja marapu nunkangupini mitandru Jerusalemia tarana wonti Passani ngopera, kulirkaterila.