Zone 11:19-55

¹⁹Ke soku rina tie pa Ziudia si mae pude va manoti sari Mata e Mere koasa minate tanisa tasidia.

²⁰Totoso avoso nia Mata sapu korapa mae se Zisu, si ene la tutuvia sa si Asa, ba e Mere si koa hola pa vetu.

²¹Meke zama la koe Zisu se Mata, “Baṉara, be guana koa Mua tani si Goi, si lopu kote mate sa tasiqu!

²²Ba gilania qua, sapu kamahire ba kote ponigo Tamasa sapu gua tepa ia Goi koa Sa.”

²³Meke zama la se Zisu, “Kote toa pule sa tasimu.”

²⁴Meke olaṉa se Mata, “Gilania qua sapu kote toa pule pa rane mumudi si asa.”

²⁵Meke zama la koa sa se Zisu, “Arau tugo sa tinuru pule pa minate meke sa tinoa. Asa sapu va hinokarau si na tie toana si asa, be vea ele mate gua.

²⁶Meke asa sapu toana meke va hinokarau, si lopu kaqu mate si asa. Va hinokaria goi sapu gua asa?” gua se Zisu.

²⁷Meke olaṉa se Mata, “Uve, baṉara! Va hinokaria rau sapu Agoi tugo sa Karisito, sa Tuna Tamasa, gua sapu ele tozia sa Tamasa sapu kaqu gore mae pa popoa pepeso,” gua si asa.

²⁸Sipu beto zama guahe se Mata, si pule si asa, meke tioko vata kale ia sa se Mere sa tasina, meke tozi nia sa, “Koanana hoi sa Titisa, meke nanasa nigo Sa,” gua si asa.

²⁹Totoso avosia tugo Mere sapu gua asa, si gasa turu meke la tutuvia sa si Asa.

³⁰Na lopu ele kamo pa vasileana se Zisu, ba korapa koa Nana mo vasina pu tutuvu nia e Mata.

³¹Ego, sari na tie Ziu pu koa variva manoto koe Mere pa korapa vetu, si vura lulia rini sipu dogoria rini bebeno vura taloa si asa. Balabala ia rini sapu hokara korapa la pa lovu si asa, pude la kabo vasina, gua.

³²Meke sipu dogoria Mere se Zisu vasina pu koa Sa, si hoqa todoṉo pa nenena Sa si asa, meke zama, “Baṉara, be guana koa Mua tani Goi, si lopu kaqu mate sa tasiqu!” gua si asa.

³³Totoso dogoria Zisu kabona se Mere, meke sari doduru pu luli koa sa, si siṉo maṉini na mamata sa bulona.

³⁴Meke nanasi Sa si arini, “Pavei veko nia gamu sa tinina e Lazarasi?” Meke olaṉa si arini, “Baṉara, mae mamu dogoria,” gua si arini.

³⁵Meke kabo se Zisu.

³⁶Vari zamai sari tie, “Dotu, gua tataru guni nia Sa se Lazarasi!” gua si arini.

³⁷Meke zama sari kaiqa, “Na tie behuna ba va dodogorae ia mo Sa, na vea lopu boka hukatia mo Sa se Lazarasi pude lopu mate be guana koa Nana Sa?” gua si arini.

³⁸Siṉo maṉini pule se Zisu meke la koasa lovu, sapu keke bae pu ta tuku patu sadana.

³⁹Meke zama la koa rini se Zisu, “Topili pania sa patu.” Zama la koa Sa se Mata, sa tasina sa tie matena, “Baṉara, kote humaṉa hikare sia. Na ele ka made ranena tu koa pa lovu si asa!”

⁴⁰Ba olaṉa se Zisu, “Vegua, lopu tozi nigo tu Rau sapu kaqu dogoria goi sa ṉiniraṉira te Tamasa be va hinokara si goi?” gua si Asa.

⁴¹Ke va topili pania rini sa patu, meke doṉo sage la pa Maṉauru se Zisu meke zama, “Zama leana si Rau koa Goi Tamaqu, sapu ele avosau Goi.

⁴²Gilania Rau sapu hoke avosau Goi doduru totoso, ba sina koa gua koari na tie hire, ke zama guahe si Rau, pude di va hinokaria sapu Agoi garunau si Rau,” gua si Asa.

⁴³Sipu beto zama ni Sa saripu gua hire, si titioko va ululae si Asa, “Lazarasi, vura mae!”

⁴⁴Meke vura mae gana si asa, ta hadei poko tana lovu sa doduru tinina, meke gua tugo sa isumatana. Meke zamai Zisu si arini, “Mi vagi pani sari poko lovu mamu va taloa ia.”

⁴⁵Meke sokudi rina tie Ziudia saripu somana mae pude va manotia se Mere, si dogoria sapu gua tavetia Zisu, meke va hinokaria rini si Asa.

⁴⁶Ba kaiqa arini si pule la tozia koari na Parese, gua sapu tavetia Zisu.

⁴⁷Gua asa, ke tioko varigara ni ari na Parese na ṉati hiama, sari doduru tie koasa puku tie varipitui tadi na tie Ziu d, meke zama, “Na sa si kaqu tavetia gita? Dotu sari na tinavete variva magasadi pu taveti sa tie hie!

⁴⁸Be va malumia gita pude tavete gua asa si Asa, si kote lulia ri doduru tie, meke kote mae sari tie Roma meke huaria sa nada Zelepade meke sa nada butubutu,” gua si arini.

⁴⁹Ba keke koa rini sapu e Kaeapasi, sa ṉati hiama kenukenue koasa vuaheni asa, si zama, “Duvili si gamu!

⁵⁰Lopu gilania tu gamu sapu leana hola, si pude keke tie mo mate hobe ni sari doduru tie, hola nia si pude sa doduruna sa nada butubutu si tava mate?”

⁵¹Ba sa zinama sapu zama nia sa si lopu vura mae gua pa nana binalabala soti, ba sina na ṉati hiama kenukenue si asa koasa vuaheni asa, ke korotae nia sa sapu e Zisu si kote mate hobe ni sari na tie Ziu.

⁵²Ba lopu tanisa butubutu Ziu eke mo, ba sari na koburu te Tamasa sapu koa ta hurakatae lamae, pude varigara ni meke va keke i, gua.

⁵³Podalae pa rane asa si kuhana nia rina koimata tadi na tie Ziu se Zisu pude va matea, gua.

⁵⁴Gua asa, ke lopu va vura pule nia si Asa koasa Nana inene pa Ziudia, ba luaria Sa sa vasina asa, meke la Nana pa keke vasina tata pa qega, pa keke vasileana sapu Iparemi pozana, meke koa turaṉi Sa vasina sari Nana disaepeli.

⁵⁵Tata sa totoso Inevaṉa Pasova d, ke taluarae koari na hopeke dia vasidi sari na tie meke sage la pa Zerusalema, pude di la ta vulasa dia, sipu lopu ele kamo sa inevaṉa, gua.