Yuhanna 11:19-55

¹⁹Yahuudiyankooɓe heewɓe ngarii to Mariyama e Marta duwaaru Laajaru, eɓe koomta ɗum'en e maayde miɲiiɓe gorko.

²⁰Nde Marta nannoo Iisaa warii ndee, yehi sakkitoyii mo. Mariyama kaa heddii cuuɗi.

²¹Marta wii Iisaa: —Moobbo, sinndo aɗa wonnoo ɗoo, miɲam gorko oo maayataano.

²²Kaa fay jooni miɗo anndi huunde fuu ko ndaardu-ɗaa Laamɗo, waɗante.

²³Iisaa wii mo: —Miɲa gorko oo immitoto.

²⁴Marta wii: —Miɗo anndi o immitoto ɲannde immital, ɲalaande sakitotoonde.

²⁵Iisaa wii mo: —Miin woni immital, miin woni nguurndam. Neɗɗo fuu goonɗinɗo kam, fay so maayi, wuuran.

²⁶Guurɗo fuu goonɗinɗo kam, maayataa abada. Aɗa goonɗini ɗum naa?

²⁷O jaabii: —Sanne Moobbo! Miɗo goonɗini aan woni AlmasiihuƁii Laamɗo garoowo e aduna oo.

²⁸E dow ɗum, o yehi noddoyde miɲiiko Mariyama, o gunndii ɗum: —Moobbo oo warii, omo nodde.

²⁹Nde Mariyama nanunoo ɗum ndee, heɲii law, nootoyii.

³⁰Tawi fuu Iisaa naataalino ngeenndi ndii tafon. Omo heddii ɗo Marta hawrunoo e makko ɗoo.

³¹Yahuudiyankooɓe ana ngondunoo e Mariyama ley galle, ana koomtannoo ɗum. Ɓe njii o gurbitike, o yaltii. Ɓe njokkitii mo, ɓe miili o woyoyan dow yanaande too.

³²Mariyama yottii ɗo Iisaa woni ɗoo, yii ɗum tan, diccii yeeso muuɗum, wii ɗum: —Moobbo, sinndo aɗa wonnoo ɗoo, miɲam gorko oo maayataano.

³³Nde Iisaa yiinoo Mariyama e Yahuudiyankooɓe wonduɓe e mum ɓee ana mboya ndee, yonki makko ɲawi, hakkille makko immii.

³⁴O wii: —Hoto ndesu-ɗon mo? Ɓe njaabii: —Moobbo, war ƴeew!

³⁵Nii Iisaa woyi.

³⁶Yahuudiyankooɓe ɓee mbii: —Ƴeewee no o foti horsinde ɗum.

³⁷Yoga e maɓɓe wii: —Bumtinɗo bumɗo waawaano haɗude Laajaru maayde naa?

³⁸Yonki Iisaa ɓeydi ɲawde, o yehi tiimoyde yanaande ndee. Yanaande ndee yo loowol uddiraangol haayre.

³⁹Iisaa wii: —Ittee haayre ndee! Marta, banndii debbo maayɗo oo, wii mo: —Moobbo, ana haani ko tawee henndu makko waylitike, sabi hannde woni balɗe makko nay.

⁴⁰Iisaa jaabii mo: —Tama mi wiyaali ma, so a goonɗinii, a yiyan teddeengal Laamɗo?

⁴¹Ɓe itti haayre ndee. Iisaa tiggitii, wii: —Baabiraaɗo, miɗo yettire ko njaabani-ɗaa kam koo.

⁴²Miin kaa, miɗo anndi ɲannde fuu aɗa jaabanoo kam. Kaa mi haaldirii nii saabe yimɓe filiiɓe kam ɓee, yalla eɓe ngoonɗina aan neli kam.

⁴³Caggal ɗii haalaaji, o duki semmbe, o wii: —Laajaru, yaltu sella!

⁴⁴Maayɗo oo yalti, juuɗe mum e koyɗe mum ana piilaa leppi, yeeso mum ana suddii. Iisaa wii ɓe: —Kumtee mo, njoppon mo o yaha!

⁴⁵Heewɓe e Yahuudiyankooɓe warnooɓe to Mariyama ɓee njii ko Iisaa waɗi koo, ngoonɗini ɗum.

⁴⁶Kaa yogaaɓe njehi to Farisa'en, kaaltani ɗum'en ko Iisaa waɗi koo.

⁴⁷Nden Farisa'en e hooreeɓe yottinooɓe sadaka mooɓti waalde Saahiiɓe ndee, mbii: —Oo gorko ana waɗa kaayɗe keewɗe. Hono ngaɗaten?

⁴⁸So en njoppirii mo nii, jamaa oo fuu goonɗinan mo. Nden kaa, Romankooɓe ngaran mbonna nokku men ceniiɗo oo e leɲol men ngol.

⁴⁹Gooto maɓɓe biyeteeɗo Kayafas, laatinooɗo Jottinoowo Sadaka Mawɗo e nden hitaande, wii ɓe: —Onon, on anndaa fay huunde.

⁵⁰On anndaa neɗɗo gooto maayana yimɓe fuu ɓuri moƴƴande en diina leɲol meeɗen fuu halkoo.

⁵¹Tawi wanaa hiini hoore makko o haaldi kaa haala, kaa nde wonnoo o Jottinoowo Sadaka Mawɗo nden hitaande, o sappike Iisaa maayanan leɲol ngol.

⁵²Kaa wanaa leɲol ngol tan o maayanta, ko o maayanta dee, faa o mooɓta ɓiɓɓe Laamɗo saakiiɓe ɓee fuu e fedde wootere.

⁵³Gila oon ɲalooma, ɓe ndawridi faa ɓe mbara mo.

⁵⁴Ɗum waɗi so Iisaa ŋootti saccude hakkunde Yahuudiyankooɓe. O iwi ɗo o wonnoo ɗoo, o yehi ngalluure wiyeteende Efrayim heettunde e ladde jeereende. O jooɗodii ton e taalibaaɓe makko.

⁵⁵Tawi iidi Yahuudiyankooɓe biyeteeɗo Paska oo ɓadike. Heewɓe e yimɓe leydi ndii njehi Urusaliima faa cenna ko'e mum'en gila iidi oo yottaaki.