Isɑ̃ɑ̃ 11:19-55

¹⁹Kɛ̀ Sifubɛɛ yɛ̀nní pɛ́u kɛ́kɔtɛní kɛ bo dɔu mMɑriti nɛ̀ Mɑɑri bɛ tɑ̃ũ̀ kṹṹ.

²⁰Mɑriti kèè dìì mɔ̀nnì Yesu kèróomɛ̀, kɛ̀ Mɑɑri ńkɑri tɛcĩ́ɛ̃̀tɛ̀ kòo kɔtɛ kóò co,

²¹kóò nɑ̀kɛ́ kɛ dɔ̀: N Yiɛ̀ nkɑ̀ɑ do mbo diɛ n tɑ̃ũ̀ nɑ bɑ nkú.

²²N nɛ́ yɛ̃́mu kɛ do nkɑ̀ɑ bekɛ tì Kuyie kù bo tì dɔ̀ɔ̀.

²³Kɛ̀ Yesu ò nɑ̀kɛ́ kɛ dɔ̀: A tɑ̃ũ̀ yóó yɑ̃́ntɛ́mu.

²⁴Kɛ̀ Mɑriti dɔ̀: N yɛ̃́mu kɛ dò mmukúkɛ́yɑ̃́ntímù yiè, diyiè sɔnni yiè ò bo yɑ̃́ntɛ́.

²⁵Kɛ̀ Yesu ò nɑ̀kɛ́ kɛ dɔ̀: Míì tu mukúkɛ́yɑ̃́ntímù kɛ tú mufòmmu. Wèè n tɑ̃́ ò bo nfòù bɑ́ kòò ku.

²⁶Bɛ̀ɛ̀ kó dimɑ̀ɑ̀ n tɑ̃́ bɛ̀ bɑ́ɑ́ kú bìtì. A ti yienɑɑ̀?

²⁷Kɛ̀ Mɑritii ò tɛ̃̀ńnɛ́ kɛ dɔ̀: N Yiɛ̀, n tɑ̃́mu kɛ dò nhɑ tú Kirisi Kuyie mBirɛ dɛ̀ɛ̀ kɔ̀tɛní kutenkù miɛkɛ.

²⁸Ò bɛ́i mɛmmɛ kɛ́deè kɛ́kɔtɛ kɛ́wɛɛ Mɑɑri kɛ dɔ̀: Ti Yiɛ̀ nkɔ̀tɛní kɛ dɑ yu.

²⁹Kɛ̀ Mɑɑrii ítɛ́ mɛcɑ̃ɑ̃ nkɛ́nkɔri Yesu borɛ̀.

³⁰Yesu mu ndo í tɑ dihɛì miɛkɛ, ò do kpɑɑ́ Mɑriti do ò co dɛ̀ ndɛ.

³¹Sifubɛ bɛ̀ɛ̀ do bonɛ̀ Mɑɑri koò bɑ̀ɑ́ nkɛ̀ bɛ̀ɛ yɑ̀ ò ìtɛ́mɛ̀ mɛcɑ̃ɑ̃ nkóò tũ̀nnɛ kɛ̀ bɛ yɛ̀mmɛ̀ dò nhò kɔ̀ri kufɔ̃ti borɛ̀ ndɛ kɛ bo kuɔ́.

³²Kɛ̀ Mɑɑrii tuɔkɛ Yesu borɛ̀ kɛ́nínkóo o ììkɛ̀ kóò nɑ̀kɛ́ kɛ dɔ̀: N Yiɛ̀, kɑ̀ɑ do mbo diɛ n tɑ̃ũ̀ nɑ bɑ́ nku.

³³Kɛ̀ Yesu yɑ̀ ò kuɔ̀mmɛ̀, kɛ̀ Sifubɛ múnkɛ kuɔ̀, kòo yɛ̀mmɛ̀ɛ cɑɑ̀rɛ̀ mɛdiɛ̀ nkɛ̀ mɛsémmɛ̀ɛ ò pĩ.

³⁴Kòo bekɛ kɛ dɔ̀: Di ò kũnnɛ́ dɛ? Kɛ̀ bɛ̀ɛ ò tɛ̃̀ńnɛ́ kɛ dɔ̀: Ti Yiɛ̀ nkɔtɛní kɛ́yɑ̀.

³⁵Kɛ̀ Yesu kuɔ́.

³⁶Kɛ̀ Sifubɛ dɔ̀: Wéntɛ́nɛ̀ wè ò dɔ́ mɛ̀ɛ̀ botí.

³⁷Kɛ̀ bɛ̀mɑbɛ̀ ntú: Wenwe wèè wéi nkuyũ̀ɔ̃̀nkù ò nɑ bɑ́ nnɑ kɛ́dɔɔ̀ tìmɑtì kɛ̀ Dɑsɑɑ bɑ́ɑ́ kúɑ̀?

³⁸Kɛ̀ Yesu yɛ̀mmɛ̀ɛ wɛ̃tɛ kɛ́cɑɑ̀rɛ̀ kòo kɔtɛ kufɔ̃ti borɛ̀. Bɛ̀ do kù keú ditɑ̃́rì ndi kɛ́poo nditɑ̃́rì.

³⁹Kɛ̀ Yesu bɛ̀ nɑ̀kɛ́ kɛ dɔ̀: Pootɛnɛ̀ ditɑ̃́rì! Kɛ̀ Mɑriti, ocíì tɑ̃ũ̀ dɔ̀: N Yiɛ̀, nhò bo ncɑ̀ɑ̀rɛ̀, diyiè nɑɑnnì ndi yíe nɛ̀ bɛ̀ ò kũnnɛ́mɛ̀.

⁴⁰Kɛ̀ Yesu ò tɛ̃̀ńnɛ́ kɛ dɔ̀: N dɑ nɑ̀kɛ́ tì, kɑ̀ɑ tì tɑ̃́, ɑ bo yɑ̀ Kuyie nkó tikpetì.

⁴¹Kɛ̀ bɛ̀ɛ pootɛ ditɑ̃́rì, kɛ̀ Yesu bɔ́útɛ́ kɛĩ́nkɛ̀ kɛ dɔ̀: N Yiɛ̀ ndɑ dɔúnnɛ̀ mutɔ̃mmú ɑ dɔ̀ɔ̀mɛ̀ n dɑ mɔɔ tì.

⁴²N yɛ̃́mu kɛ dò nhɑ dɔɔri n dɑ békú tìì kó dimɑ̀ɑ̀, nnɛ́ bɛ́i mɛmmɛ kɛ̀ dɛ̀ bo yie nkɛ̀ bɛnìtìbɛ̀ bɛ̀ɛ̀ m murí kɛ̀ bɛɛ̀ nyɛ̃́ kɛ dò nfɔ̃́ɔ̃̀ n tɔ̃nní.

⁴³Ò bɛ́i mmɛmmɛ kɛ́deè kɛ́pĩɛ̃kɛ́ kɛ dɔ̀: Dɑsɑɑ yɛ̀nní!

⁴⁴Kòo cíì yɛ̀nní kɛ fĩ ntiyɑ̀ɑ̀tì o nɑɑ̀cɛ̀i nɛ̀ o nɔu nɛ̀ o ììkɛ̀, kɛ̀ Yesu bɛ̀ nɑ̀kɛ́ kɛ dɔ̀: Fĩntɛnɛ̀ we kòo ítɛ́.

⁴⁵Kɛ̀ Sifubɛ bɛ̀ɛ̀ do bonɛ̀ Mɑɑri kɛ́yɑ̀ Yesu dɔ̀ɔ̀ dɛ̀, bɛ miɛkɛ kɛ̀ bɛsṹkùbɛ̀ɛ yie nYesu.

⁴⁶Kɛ̀ bɛ kó bɛ̀mɑbɛ̀ɛ kɔtɛ kɛ́nɑ́kɛ́ Fɑdisĩɛ̃bɛ Yesu dɔ̀ɔ̀ dɛ̀.

⁴⁷Dɛ mɔ̀nnì ikuɔ́ nìùbɛ̀ kó bɛkótíbɛ̀ nɛ̀ Fɑdisĩɛ̃bɛ kɛ̀ bɛ̀ɛ tíí dibeéntĩ̀nnì diɛrì kɛ dɔ̀: Ti yóó yĩ́mɛ? Onìtì yie mmɛ̀ ndɔ̀ɔ̀rimɛ̀ tidiɛtì pɛ́u?

⁴⁸Kɛ̀ ti yóu kòò mɛ̀ dɔ̀ɔ̀ri bɛnìtìbɛ̀ bɛmɔu bo yie nho kpɛti, kɛ̀ Odommu kɔbɛɛ kɔtɛní, kɛ́pɔntɛ Kuyie ncĩ́ɛ̃̀tɛ̀ kɛ́tiekɛ ti ɛì.

⁴⁹Kɛ̀ bɛ kóò mɔù bɛ̀ tu wè Kɑyifu, wèè do tú ikuɔ́ nìùtì diɛwè dɛ benni, kòo bɛ̀ nɑ̀kɛ́ kɛ dɔ̀: Di í bɑntɛ́.

⁵⁰Di í yɛ̃́ kɛ dò ndɛ̀ tú di kó mɛsɑ̀ɑ̀ mmɛ onìtì òmɑ́ɑ̀ bo kúmɛ̀ kubotí kpɛ́í, kɛ̀ kubotí kumɔuu cootɑ́ɑ̀?

⁵¹Ò do í nɑ́ɑ́ ndɛ kó tinɑ́ɑǹtì nɛ̀ o mɔ́mmuɔ, ò do mɛ ntúmɛ̀ ikuɔ́ nìùtì nwe dɛ kó dibenni, kɛ̀ Kuyie nduɔ́ nkòò nnɑ́ɑ́ Yesu weè yóó kúmɛ̀ kubotí kpɛ́í.

⁵²Dɛ̀ í tú Sifubɛ mɑ́ɑ̀ kpɛ́í nkɛ ò yóó kúmɛ̀, ò dɔ́ kɛ́wɛ̃nnɛ́ Kuyie mbí nyi kɛ̀ ìì nɑɑ́ nhonìtì òmɑ́ɑ̀.

⁵³Dɛ kó diyiè ndi Sifubɛ wɛ̃nnɛ́mɛ̀ dinùù kɛ bo kuɔ Yesu.

⁵⁴Bɑ́ ò tɛ̃́nkɛ í nyie nkɛ́nfeí Sifubɛ miɛkɛ, kɛ́kɔtɛ dihɛì dìì bo dikpɑ́ɑ̀ miɛkɛ kɛ̀ bɛ̀ dì tu Efɑdɑyimmu, kɛ́ nkɛ mbo nɛ̀ o tɑncɔ́ùmbɛ̀.

⁵⁵Kɛ sɔ̃́ ndiyentɛ́bɑnni tɔ̀ɔ́nní kɛ̀ bɛnìtìbɛ̀ kɔ̀rì Sedisɑdɛmmu, kɛ bo wénkùnnɛ bɛmɑ́ɑ̀ kɛ̀ dibɑnni nɛ́ tuɔkɛní.