Ioanej 11:19-55

¹⁹A Juj oko me toto ko don Marta o Maria, pwen kamait ira la pweki ri ara ol o.

²⁰Marta lao ronadar, me Iejuj kotido, ap koieila tu on i. A Maria momod nan im o.

²¹Marta ap potoan on Iejuj: Main, ma re kotikot met, ri ai ol jota pan mela.

²²Ari jo, i aja meakot re pan kotin poeki ren Kot, Kot pan kotiki on ir.

²³Iejuj kotin majani on i: Ri om ol pan maureda.

²⁴Marta potoan on i: I aja, me a pan maureda ni iaj en ni ran nik o.

²⁵Iejuj kotin majani on i: Nai kamaur o maur, me pojon ia, pan memaureta pil murin a mela.

²⁶A meamen me maur o pojon ia, jota pan mela kokolata; koe kamelele mepukat?

²⁷A potoan on i: Ei Main, i pojon, me ir me Krijtuj Japwilim en Kot, me udan pwara don jappa.

²⁸A lao indada met, ap koieila ren Maria ri a li, moninki on i: Jaunpadak kotidor kainoma uk.

²⁹A lao ronadar, ap uda, madan wei re a,

³⁰A Iejuj jaikenta lel on kanim o, pwe a kotikoteta waja Marta tu on i ia.

³¹Juj oko, me mi re a nan im o, pwen kamait i ala, lao kilanada, me Maria madan uda tan wei, rap idauenla i, indinda: A pan ko on ni joujou, pwen janejan ia.

³²Maria lao lel waja o, o kilan i, ap poridi on ni aluwilu a indan i: Main, ma re kotikot met, ri ai ol jota pan mela.

³³Iejuj lao majani i janejan, o Juj oko, me ian i kokodo pil janejan, ap kupurola,

³⁴Majani: Komail pwilikidi ia i? Irail potoan on i: Main, kotido majani.

³⁵Iejuj kotin tontonir.

³⁶Juj oko ap inda: Kilan duen a pok on i!

³⁷A akai ir me indada: A jo kak pan men et me kapad pajan maj en me majkun o, me ol men et ender mela?

³⁸Iejuj pil kupurola koti don joujou o. A por o ulon nan kijin dol o takai eu mi poa.

³⁹Iejuj kotin majani: Katapure wei takai en! A Marta, en me melar ri a li, indada: Main, a matalar, pwe a mi met pon pa pon.

⁴⁰Iejuj kotin majani on i: I jo indai on uk, ma koe pojon, koe pan kilanada linan en Kot.

⁴¹Irail ap katapure jan takai o. A Iejuj kotin majanda majani: Jam, I danke komui, me komui mani ia er.

⁴²A i aja, me komui kin mani ia anjau karoj, a pweki pokon o, me u jili, I indaki mepukat, pwe irail en pojon, me komui, me kadar ia do.

⁴³A lao kotin majani met, ap kapitie laudeta majani: Lajaruj, koieido!

⁴⁴A me melar o ap pedoido, likau en joujou kidim pena na o pa kan, o maj a me pirapinki pena lim en puto. A Iejuj kotin majani on irail: Lapwada kapitila i!

⁴⁵Men Juj toto, me ko don Maria, o kilaner, me Iejuj kotin wiadar, pojonla i.

⁴⁶A akai ir kowei ren Parijär oko, kaire kin irail me Iejuj kotin wiadar.

⁴⁷Jamero lapalap o Parijär akan ap pokon pena kapun indada: Da me kitail en wiada? Pwe aramaj men et kin wia kilel toto.

⁴⁸Ma kitail jota pan mokidi on i, karoj pan pojonla i, o men Rom pan kodo, ki jan kitail wei o atail kainok.

⁴⁹A amen irail ad a Kaipaj, me jamoro lapalap ni par o, indan irail: Komail meid jo lolekon.

⁵⁰O jota lamelame, me a mau on komail, aramaj ta men en kam kila aramaj akan, pwe kainok pokon ender lokidokila.

⁵¹A kaidik jan pein i, me a katitiki met, a i me jamero lapalap ni par o, i ari kopada, me Iejuj pan kamataki kainok o.

⁵²A kaidik kainok eta, pwe a pil pan kapokon pena jeri en Kot akan, me muei pajan nin jap akan.

⁵³Jan ni ran o irail raparapaki en kamatala i.

⁵⁴Iejuj ap jolar kotikot jili janjal ren Juj oko, pwe a kotilan eu jap impan jap tan ni kanim eu ad a Epren, o kotikot ia ian japwilim a tounpadak kan.

⁵⁵A paja en Juj oko me korendor, o me toto koeie jan nan jap karoj, kodalan Ierujalem mon paja, pwen kamaui pein irail.