Josue 6:2-10

²Maʌ̃ne Ãcõrẽba Josuéa jarasia: –Ũrĩdua. Mʌ̃a Jerico puruda, dji boroda, sordaorã sid̶a bãrãa poyabiya.

³Bãrã sordaorãra ewariza b̶arima ab̶a Jerico aud̶u pʌrrʌgad̶adua. Sei ewari mãwã od̶adua.

⁴Maʌ̃ne sacerdoterãba mʌ̃ baurudera eronĩbad̶ida panʌa. Dewara siete sacerdoterãda ãdji na nĩbad̶ida panʌa. Ãdjirãza cachiru oveja cachu od̶ada eded̶ida panʌa. Sietebema ewarid̶e bãrãra b̶arima siete Jerico aud̶u pʌrrʌgad̶adua. Maʌ̃ne jũma maʌ̃ cachiru eropanʌba jĩgua zad̶ida panʌa.

⁵Cachiru dãrã jĩguabʌdad̶e bãrãra jĩgua b̶iad̶adua. Maʌ̃ne Jerico aud̶u jũrã ca b̶ʌra idub̶a tod̶ogozoaya. Maʌ̃ne bãrãra daucha pirapod̶aped̶a purud̶e ed̶a djõne wãbʌrʌd̶adua.–

⁶Ara maʌ̃da Nuʌ̃ warra Josueba israelerã sacerdoterãra jũma trʌ̃cuaped̶a jarasia: –Ãcõrẽ baurudera Jerico puru aud̶u pʌrrʌga eded̶adua. Idjab̶a bãrãnebemada siete edad̶aped̶a baurude nocoare cachiru bara nĩbad̶adua.–

⁷Maʌ̃be sordaorãa nãwã jarasia: –Bãrã sid̶a wãnaped̶a Jerico puru aud̶u pʌrrʌgad̶adua. Ʌ̃cʌrʌ sordaorã djõni careabema bara Ãcõrẽ baurude na nĩbad̶adua.–

⁸Josueba jarad̶ara jũma ĩjã osid̶aa. Sacerdoterã siete panʌra Ãcõrẽ baurude nocoare nĩbasid̶aa ãdji cachiru zá panʌda.

⁹Ãdjirã nocoare ʌ̃cʌrʌ sordaorãda djõni careabema bara nĩbasid̶aa. Waabema sordaorãra Ãcõrẽ baurude caid̶u errubusibasia. Mãwã nĩnane sacerdoterãba ãdji cachirura zá jõnaca basía.

¹⁰Baribʌrʌ Josueba sordaorãa nãwã jarasia: –B̸iarãnadua. Ni maãrĩ bid̶a bed̶earãnadua. Chupea pananadua ab̶a mʌ̃a jarabʌrʌd̶aa. Mʌ̃a bãrãa jarabʌrʌd̶e b̶iad̶adua.–