Jon 12:2-39

²Ra det pam a inangon tiro sur u ugasgas o Iesu. O Mata i wapor utna torom det, ma o Lasarus i ara tagun det ra det kis tomo nam o Iesu una inangon.

³Ra o Maria i los pas in nokoto na polo sangsangnain ra di watungi nama nad, ma a matano i ka doko. I lingisi una ru kikin o Iesu ma i wus der nama iwu na lorino. Ma a sangnainino, i ubukus pas a rumu ra.

⁴Ara tagun a kum nat na ususer anun o Iesu, o Judas Iskariot, i ra in usobor tar o Iesu, i watungi lena,

⁵“Sur asau ra ka di siuru in nokoto na polo sangsangnain ri sur lako tulu mar na denaria sur din tabor a kum sibo na taro nami?”

⁶O Judas ke maris a sibo na taro, awu. I watungi lenri uni i ser tamtamabat anundet a mani ma i ser los eno i, uni i a tene wolong.

⁷O Iesu i longoro a wasiso anun o Judas, ra i watungi lena, “Madek ru a ino ri, uni i sa pam tar a pinapam ri un iau sur a bung ra an mat ma din uruk a minating una kulam na minat.

⁸A kum sibo na taro det in laun bolbolos tomo ut nam mot. Ikut iau, kan kis tukum nisamot.”

⁹A kunur na taro tagun a taro Juda det longoro i lena o Iesu kurong i o Betani, ra det wan utong. Awu sur det wan sur det in tama o Iesu kut, det wan utkai sur det in tama o Lasarus, i ra o Iesu i sa ulaun pasi gusun a minat.

¹⁰I mo ra a kum lamlabino tene etabor det epak sur det in um doko o Lasarus utkai.

¹¹Uni a susut na te Juda det wan gusun det ma det nurnur un o Iesu, i kibino un o Lasarus.

¹²Una bung numur, a labino kunur na taro ra det wanpat sur a labino bung na lotu na Wanlakai, det longoro i lena o Iesu kai i sa wan nanan usapat o Jerusalem.

¹³Ra det los pas a kum dono baibai ma det wan sur det in barato o Iesu nami. Ra det kukukuk lena, “Osana! O naro ra i wanpat nama risan a Labino i dan! A king anun a taro Israel i dan!”

¹⁴O Iesu i sio pas a dongki, ra i kis taru netes uni, elar nama Buk Tabu i sa watung tari uni lena,

¹⁵“A taro Saion, gong mot ngara. Tama i, anumot a king i mo ra pat i wan nanan torom mot, i kis una barman na dongki.”

¹⁶A kum nat na ususer anun o Iesu ka det tasman lele i lena a kum utna ri, di sa tumtumus mugu taru uni una Buk Tabu. Ikut ra o Iesu i sa kis una nun a minamar, det tasmani maragom lena, di sa tumus tar a kum utna ri un o Iesu, ma di sa pam tari kai a kum utna ri uni.

¹⁷A susut na taro ra det tur tomo nam o Iesu una bung ra i kabo pirso pas o Lasarus tagun a kulam na minat ma i ulaun pasi, det inanos nanan nami.

¹⁸Ra a susut na taro det wan sur det in barato o Iesu, uni det sa longoro tar a wasiso una utna na ukisin ri.

¹⁹A kum Parisi det wasiso etetalai torom det lena, “Mot tama i, ka dat in pam lar pas tu utna ra dat nem na pami uni. Uni a taro rop det sa muri.”

²⁰A ramano kum te Grik kai det wan usapat o Jerusalem una labino bung na lotu na Wanlakai, sur det in lotu.

²¹Ra det wan torom o Pilip, a te Betsaida. O Betsaida ara tamon una papor Galili. Ma det watungi tano lena, “Le, met nemi sur met in tama o Iesu.”

²²O Pilip i wan ra i inanos o Endru. Ra der wan ma der inanos tar o Iesu.

²³Ra o Iesu i watungi tander lena, “A du bung i sa wanpat sur o God in mar a Nutun a Musano.

²⁴A inanos mot nama lingmulus, ra in niwino wit ken puku taru una piso, ma ken mat pas, in kis len taru ut ra, in tekene kut. Ikut ra in mat pas, in wu lako susut na wino.

²⁵Osi ra i maris anun a nilaun, in iru, ma osi ra ke maris bat anun a nilaun nin una rakrakon bual, in utur ukai a nilaun sur a nilaun tukum.

²⁶Ra taio i nemi sur iau anun a Labino, i wakak sur in mur iau, ma i anung a tultul ra in kis tomo nam iau una dino ra an kis iai. Osi ra i papam torom iau, o Tita in ulabo pasi.

²⁷“Uniri in balang i maut doko. Asau mo ra an len? Pepetlai, an watungi lena, ‘Tita, un ulaun iau gusun a du bung ri’? Awu, kan wararing lenri, uni, i kutri, i a kibino ra a wan suri urin, sur an taramo a ngunungut una bung ri.

²⁸Tita, un ulabo pas a risam!” Numur in nalngan ara tagisapat una langit i watungi lena, “A sa ulabo tari, ma an ulabo meleti ut.”

²⁹A kunur na taro ra det tur taru tiro det longoro i. Ara taro det watungi lena a pungpugur, ma ara taro kai det watungi lena, “Ara ensel i wasiso toromi.”

³⁰Ikut o Iesu ut i watungi lena, “In nalngan ara ri, awu sur i wasiso sur in warut iau, awu, i wasiso sur in warut mot ut.

³¹A du bung ri din warkurai a rakrakon bual. Uniri din lakro ru a labino anun a rakrakon bual.

³²Ikut iau, ra din utur toto pas iau taginin upiso usapat netes, an dat pas a taro rop torom iau.”

³³I watungi lenri sur in utalapori lena in mat pepetlai.

³⁴A kunur na taro ra, det watungi tano lena, “Met sa longoro tari una Buk na Warkurai lena, a Karisito in kis tukum. Sur asau ra u watungi lena din utur toto pas a Nutun a Musano usapat netes? Osi ra a Nutun a Musano?”

³⁵O Iesu i watungi tandet lena, “A talapor ken kis suano i mo torom mot. Ra a talapor i kis utmakai torom mot, mot nan tuptupukus. Numur a dumirum in pulus bat mot. I ra i wanan una dumirum, ken tasmani lena in nan urai.

³⁶Ra a talapor i kis utmakai torom mot, mot in nurnur uni, sur mot a kum nutnutun a talapor.” Ra o Iesu i sa watung rop tar a wasiso ri, i wan eno pas gusun det.

³⁷O Iesu i sa pam tar a susut na utna na ukisin umatandet, ikut ka det nurnur uni,

³⁸sur a wasiso ra a poropet Aisaia i wasiso taru uni in nanpat mulus. I watungi lena, “Labino, osi i nurnur una numet a wasiso? Ma osi ra di sa ese tar a dekdekin a Labino tano?”

³⁹Ma o Aisaia i sa watung tari kai lena, “O God i sa upulu bat ru a kum matmatan det, ma i sa udumun bat ru a kum nuknukin det, sur gong det tamtama nama matmatan det, ma gong det tasman lele i nama nuknukin det, ma ka det in tupukus torom iau, sur an ulaun pas det.” Iri a kibino ra ka det nurnur.