Yohan 12:2-39

²Haû má, Yesuq lé hkunggâ é dông myinzang byi tsô akô; Mahtaq gi, zoshuq jaú ri; Lazaruq gi, haû Yesuq eq rahá siboî má zô zung nyì bang mâ é rayuq nghut ri.

³Haú hkûn, Mariq gi, haû nardu amyit mai za saî yu é, gyai hpaû é namngón-xû raxe í rûng kô yu lé mù, Yesuq é hkyî má hut gyun byi luî, yhâng é uxam èq sùt byî ri. Haû mù, yhûm haû gi, namngón-xû shôm byíng to bê nghut ri.

⁴Nghut kôlhang, Yesuq lé ap pyám râ nghut é, Yhâng é chángzo rayuq nghut sû, Yudaq Iskarut gi,

⁵"Haû myùng bang lé byî pyám râ matú, haû namngón-xû lé denari sum sho èq haî mù a ûng pyâm é lhú?" ga taî ri.

⁶Yhang haû su ga taî é gi, myùng bang lé chiq byî é yanmai taî é a nghut, yhang gi, ngùn htûng chûng sû nghut luî, haú má kat tô é ngùn lé, yhumsing é matú lhaq yu chûng chûng kut é, hkau sû nghut é yanmai taî é nghut ri.

⁷Yesuq gi, "Nghut shang gaq; yhang gi, Ngo lé myhup yhum râ buinyi é matú, namngón-xû shî lé hkong to byî é nghut lhê.

⁸Haû myùng bang gi, nungmoq eq rahá hkâ-nhám le nyì râ nghut lhê; nghut kôlhang, Ngò gi, nungmoq eq rahá ayang nyi nyì râ sû a nghut." ga tû taî ri.

⁹Haú u lé, Yudaq byu pé ajùm ayò gi, haú má Yesuq nyi é lé sé kôluî, lé lo akô; haú bang gi, Yesuq é yanmai za lé kô é a nghut, haû Yhâng èq shî bê mai lhoq dui toq yu é Lazaruq lé, lé myâng naù kô é yanmai le nghut ri.

¹⁰Haû mù, haû hkyangjong agyi pé gi, Lazaruq lé le, sat pyám râ matú chôm hpyê lhûm akô.

¹¹Hkâsu mù gâ le, yhâng é yanmai, haû Yudaq byu pé myo myo gi, Yesuq chyáng lhing ló kômù, Yhang lé lumjíng bûm kô é yanmai nghut ri.

¹²Hau htang nyí, haû Poî má lé jé é byù moq mó gi, Yerusalem wà mó shut Yesuq jé doq ló é hkyô lé, wó gyô bum akô.

¹³Haû mù, yhangmoq gi, byùm-haq pé yu chûng mù, Yhang lé ê tê uchyang, "Hosana! Haû Yhumsing é myìng mai jé lé lô Sû gi, hkungsô wó nyî sháng gaq ô! Haû Israelaq byu pê é Hkohkâm gi, hkungsô wó nyî sháng gaq!" ga, taî garû bum akô nghut ri.

¹⁴Haú hkûn, Yesuq gi, logúng zo radu lé myàng luî, doq jî ri;

¹⁵haû gi, "Zi-un byizo ê, hkâgyuq; wú keq, nungmoq é hkohkâm gi, logúng zo má ji mù lé lo nyi ri." ga, kâ tô é eq rajung za nghut ri.

¹⁶Haú pé banshoq lé, Yhâng é chángzô pé gi, sâng-hi lé a sê gyo kó; nghut kôlhang, Yesuq gi, hpungwup shingkang dan hu huî é htâng má za sheq, haú pé gi, Yhang eq séng luî kâ tô é hkyô lé le, haû eq rajung za, Yhang lé, yhangmoq mai kut bê hkyô lé le, bûn sê kat akô nghut ri.

¹⁷Haû Yesuq gi, lup hkaû mâ é Lazaruq lé wut luî, shi é mai lhoq dui toq yu é hkûn, Yhang eq rahá nghut é shiwa hpúng gi, haú hkyô lé, saksé hkám byî nyi akô.

¹⁸Haû mù, byù myo myo gi, Yesuq tûn shit é limik kumlhá hau é hkyô lé, wó gyo kô é yanmai, Yhang lé hui râ matú htoq e akô.

¹⁹Hau é yanmai, haû Hparishe pé gi, "Wú keq, nga-nhúng, hkâsu yhang a ge kut lo nhung! Haû mingkan gón gi, Yhâng htâng châng bùm bekô." ga, rayuq eq rayuq taî lhûm bum akô nghut ri.

²⁰Haú hkûn, noqkuq râ matú Poî má doq ló é bang má, Grik pé ra-am le bo tô akô.

²¹Yhangmoq gi, Galile mau, Bet-saida wà mó mâ é Hpilip chyáng lé jé kômù, "Âhkaú ê, ngamoq gi, Yesuq lé myàng nau ri." ga, dung tôngbán akô.

²²Haû mù, Hpilip gi, Andre lé, ê taî kyô ri; Andre eq yháng nhik gi, Yesuq lé, ê taî kyô akô.

²³Haû mù, Yesuq gi, "Haû Byu Yhangzo gi, hpungwup shingkang dan hû é hui râ matú, ahkyíng jé bê nghut ri.

²⁴Ngò, nungmoq lé teng za taí kôlé, sungsô racham gi, myigùng má gyó luî, shi byuq e za a nghut jáng, acham roq za dut nyì râ nghut lhê. Nghut kôlhang, shi byuq é nghut le gi, ashi myo myo lhoq htoq râ nghut lhê.

²⁵Haû yhumsing é asak lé chyitdap é sû gi, asak sûm byuq râ nghut lhê. Mingkan shî má, haû yhumsing é asak lé a jú é sû kúm gi, ahtum abyuq é asak matú, yhumsing é asak lé wó sing to râ nghut lhê.

²⁶Ngo lé dojaú é sû ó yuq nghut kôle, Ngá htâng cháng râ lhê; Ngò, hkâmá nyi le, Ngá é dui-nhâng zoshâng le nyì râ nghut lhê. Ngá Wa gi, haû Ngo lé dojaú é sû lé, shigyaú râ nghut lhê.

²⁷Ahkuî, Ngò, myit wuîhke nyi ri; Ngò hkâsu nghû taí râ lhi? 'Âwa ê, ahkyíng shî mai Ngo lé lhoq lhut yù laq.' nghû taí râ lhú? Nghut kôle, Ngò gi, ahkyíng shi é matú za sheq jé lé é ru nghut lhê.

²⁸Âwa ê, Náng é myìng lé hpungwup shingkang dan hu nhâng aq hkoi!" ga taî ri. Haú hkûn, "Ngò gi, Ngá é myìng lé hpungwup shingkang dan hu nhâng bê nghut luî, dum dan hu nhâng shirâ nghut lhê." gâ é htê, mauhkûng mai htoq lo ri.

²⁹Haû má nyi tô é byù moq mó gi, haû lé wó gyo kôjáng, "Maugum gum ri." gâ bum akô; ra-am gi, "Yhang lé, maumang lagyo rayuq nyo ri." ga taí bum akô nghut ri.

³⁰Haú hkûn, Yesuq gi, "Danghtê shî gi, Ngá é matú a nghut, nungmoq é matú ru nghut lhê.

³¹Ahkuî gi, mingkan shî lé jéyáng râ ahkyíng nghut bê; mingkan shi é zau gi, ahkuî hkat htoq pyâm é hui râ nghut lhê.

³²Nghut kôlhang, Ngò gi, myigùng mai tu shap kat é huî é hkûn, byù lhunglhâng bang lé, Ngá chyáng shê yù râ nghut lhê." ga taî ri.

³³Yhang haû su ga taî é gi, Yhang hkâsu kut shî râ nghut é hkyô lé shit é nghut ri.

³⁴Haú hkûn, haû byù moq mó gi, "Haû tarâ laiká má, Hkrisduq gi, ahtum abyuq dui nyì râ nghut lhê gâ é lé sheq, ngamoq wó gyô wú é ru nghut le nhîng, 'Haû Byu Yhangzo gi, tu shap é hui ra râ nghut lhê.' nghû, Nàng hkâsu kut wó taî lhê lhú? Haû Byu Yhangzo gi, ó yuq nghut lhê lhú?" ga, myî akô.

³⁵Haû mù, Yesuq gi, yhangmoq lé, "Nungmoq chyáng, haû maubó joq nyì râ ahkyíng gi, a lûm myáng lo nghut ri. Mauchut gi, nungmoq chyáng a hkyit jé sháng gaq, nungmoq chyáng, haû maubó joq nyi ashî hkûn sô nyì keq; hkâsu mù gâ le, haû mauchut má sô nyi é sû gi, yhang hká shut e ló nyi é lé, a sé nghut ri.

³⁶Nungmoq gi, maubó é yhangzô pé wó dut kó sháng gaq, haû maubó joq nyi ashî hkûn, haû lé lumjíng keq." ga taî ri. Yesuq gi, dang haû ban taí jáng, yhangmoq chyáng mai htoq ló luî, haq byuq bê nghut ri.

³⁷Yesuq gi, yhangmoq é hí má, limik kumlhá haú pé banshoq kut shit kôlhang, yhangmoq gi, Yhang lé a lumjíng shi kó nghut ri.

³⁸Haû gi, "Yhumsîng ê, nga-nhûng é danglù lé, ó yuq wá lumjíng byî wú é lhú? Haû Yhumsing é loq gi, ó yuq lé htoq shit wú é lhú?" ga, myiqhtoi Esai-aq taî tô é dang lo dik é nghut ri.

³⁹Yhangmoq a wó lumjíng kô é hkyô gi, Esai-aq taî é dang má,