Jon 12:2-39

²Lasaras ina numiiyai Yesu ina kam ivovunaghi. Mata wawaya kii vavai iyepa na iveresi. Ma Lasaras na Yesu ririnai imakai da yavata ikamkam.

³Ma Meri na diudeu iviiya, kamonai na oira ghabughabuna miiyanina irakata kirakai. Ikavarapiyei da Yesu ku kaena itepoi ma uyawinai kaena ikiikiipupuni. Ma oira ghabuna na numa kamona inunui.

⁴Ma kana kivikivina sago, Judas Iskariyot tuna mara sago Yesu ini wawanei, ke iti vaghinei ma ivona bo,

⁵“Weni oirina miiyanina irakata kirakai, ruvana da wawaya madegha sago ita biga na kana miiya. Kati gimarei ma mane na wawaya moyamoyakisi kata veresi.”

⁶Weni nakanani ivi sisiya na ke moyamoyakisi iti kamyuyuwesi kubiine. Tuna Yesu kana kivikivina i mane kutuna kana koyakoyagha ma bade tuna na yapiyapina da mara nonowa mane nevanevana iviiviitawei.

⁷Ma Yesu ivona bo, “Ita wavine kevoterei da ina kayowanai ina berai. Aku rabobo marana itupo tuna kubiine evovovunaghiku.

⁸Moyamoyakisi na mara nonowa yavata kona makai ma taku na ke mara gurina da yavata tamakai.”

⁹Koroto ghamana ivi yanei da Yesu tuna Betani meyaginai na ivi neyana, ke tuna kava kurina ma bade i kayowana da Lasaras ita kitai, iyamna wawayina irabobo ma Yesu iberai da ivomiiri.

¹⁰Tuna kubiine taparoro babadisi i babada Lasaras kana diri itetei da Yesu yavata ita kiivunusi,

¹¹iyamna aviyavisina itupuwa Lasaras kurina iberai da wawaya peyarisi Yesu ivivi tumaghanei ma taparoro babadisi ivovoteresi.

¹²Mara itom na wawaya sisiya ivi yanei da Yesu ipipisi ku Jerusalem. Ma Pasova kamna kubiine na koroto ghamana Jerusalem kamonai.

¹³Ma ti damsi yapi rugurugusi iyuna ma Yesu iverupotei. Ma ikiikiirara bo, “Hosana! Kaigheghenim! Tam Bada avanai kepipisi! God ini biibiinim, tam Israel akii Kiivavo!”

¹⁴Muriyai da ku Jerusalem ita rui na Yesu donki votuna ku tepana igeru. Ikikava giruma katamana ivona na nakanani itupuwa. Igiruma bo,

¹⁵“O Zayon kwanatuna, ke kona yabumana. Kokita, ami kiivavo epipisi, tuna donki votuna tepanai igeru.”

¹⁶Weni berasi ituputupuwa na kana kivikivina iyamna ke ita vii bubuni. Ma karakava Yesu ita rabobo ma ita vomiiri da kana kadara iti debei na nani murinai kana kivikivina inotapanani da weni berasi ti mani iberaberai na giruma katamana ivi sisiyei da ita tupuwa na itupuwa.

¹⁷Iyavo kava matasiyai ikitai da Yesu, Lasaras ikwatui da karawagai ivomiiri na sisiyina ivi rakati.

¹⁸Tuna kubiine koroto ghamana ikiibau da iverupotei, iyamna bera ghamana iberai na sisiyina namada ivi yanei.

¹⁹Ma Perisi damsi ti mani kamosiyai ivivi sisiya bo, “Weni tuna ke kovokovoghina avi taberai. Kokitai, dam kudubina ekivikivini.”

²⁰Ma iyavo kava namada ipisi ku Jerusalem da Pasova kamna kamonai ita vokavakavara ma kamosiyai viya na Grik damsi.

²¹Ma ti damsi inae Piripo kurina (tuna ina kwanatu Betsaida, Gariri dobunai). Ma ivi nowi kurina, ivonei bo, “Bada, akii kayowana da Yesu kata kitai.”

²²Ma Piripo inae da Anduru ivonei ma ivi ruwa inae da Yesu ivi akovi.

²³Ma ivonapotesi bo, “Marana ipisi da Wawaya Natusi kana kadara ini debei.

²⁴Vonavaghata avonavonemi, pei kuna dogoi ku dowa na ina tupuvurana ma wadubona ina rabobo da vuna ina ghae. Ma vuna na peina ina terei da ina peyari. Ma pei ke kuna voni na ke kovokovoghina da ina peyari, patana da sago kava.

²⁵Wawaya iyi ina yawasa dobuwai ina vivinuwabiibiiyei na ini wapai. Ma iyi ina yawasa dobuwai ina vere meyei taku kubiiku na yawasa makamakii nonowina ina panani.

²⁶Wawaya iyi ekayokayowei da tuna aku bigabiga na ina kiviniku da taku imapatana ana makamakai na tuna gwabikuwai. Ma ina biga kubiiku na aku Mamai ini ghegheni.”

²⁷“Ma wekarakava na ainuwapoya kirakai ma aviyavisina ana vonei? Ata vona bo, ‘Mamai, kevowaguku da weni marana kamonai vokwarakwara damina ke ana viiya.’ Ma kegha, weni marana kubiine na apisi ku dobu.

²⁸Mamai, kam kadara kevi debei ku dobu da wawaya ina kitai.” Ma kunumai wawaya gamona sago ivona bo, “Kaku kadara namada avi debei ma bade ani debe meyei.”

²⁹Ma koroto ghamana nani dobunai imiimiiri na gamona ivi yanei. Ma viya ivona da warikeyakeya, ma bade viya ivona da aneya ivi sisiya kurina.

³⁰Ma Yesu ivona bo, “Nani gamona ivi sisiya na ke taku kubiiku ma tami kubiimi.

³¹Marana inekiibau da God wawaya dobuwai ini tupaviresi ma ini wavusi da berabero iberai. Ma bade weni dobuna kana kiivavo ina rewapana ina kutawei.

³²Ma taku na wawaya ina ruepiku ku kiidamo na ana berai da wawaya peyarina ana tinariyesi kuriku.”

³³Weni nakanani ivi sisiya na ivi debei da tuna ikikava ina rabobo.

³⁴Ma nani korotona ivonapotei bo, “Moses ina vonaviyoyovana kamonai ivoneta da God ina Vivinevine Wawayina na ina makii nonowa. Ma avi kubiine kevonavona da Wawaya Natusi ina ruepai? Ma bade Wawaya Natusi na iyai?”

³⁵Ma Yesu miibiiyai ivonesi bo, “Wawaya nubakutuva kamonai ina bababa na ke itakovi da mike enenae. Tuna kubiine yasegana gwabimiyai emakamakai na kobaba, iyamna gisina kava ma yasegana koni wapai da nubakutuva ina kamowanimi.

³⁶Yasegana gwabimiyai na ami vitumaghana kurina koterei da tami na yasegana natunatuna.” Yesu ivi sisiya ikovi na inekuyowesi. Ma nani murinai na iveraveruvuvuresi.

³⁷Namanaki da Yesu matakira ghamaghamasi wawaya maghinosiyai iberai da ikitai ma patana da ke ita vivitumaghanei.

³⁸Peroveta Aisaya aviyavisina igiruma da ita tupuwa na etuputupuwa. Ivona bo, “Bada, am sisiya kaiyonayonei ma wawaya ke ita vivitumaghanei. Ma am rewapana kuvi debei kurisi ma patana da akovim ke ita viiviiya.”

³⁹Tuna kubiine damsi ke iti tumaghana. Ma bade peroveta Aisaya igiruma bo,