John 12:2-39

²Ma kar ngongliyed bmur ni nge mang bmadnom ngak u rom, me un Martha i f’oth e ggan rok e girdi’, ma bay Lazarus nike par nga tebel ni yow Jesus.

³Me ere fek Maria ba florida nrib tolang puluwon nreb e pint urngin, nni ngongliy ko nard, me pu’og nga daken e rifrif u ay Jesus nruw raba’, me faley nga piyan lolugen. Me nad bon fare florida nrib fel’ bon u lan fare naun.

⁴Ma reb i gachalpen Jesus, ni aram Judas Iskariot — ni aram e cha’ ni ir e nge yagnag Jesus ngan kol — e ga’ar,

⁵“Mangfan nda ni pi’ e re florida nem ni chuway’ ndalip mir’ay e salpiy ni wasey nib silber puluwon mi ni wereg u pa’ e pi’in gafgow?”

⁶I yog e re bugithin ney ni gathi bochan e ba t’uf e pi’in yad ba gafgow rok, machane bochan e ir be’ nib moro’ro’; ya ir e ma fek tafen e salpiy rorad mma iring boch e salpiy riy.

⁷Machane me yog Jesus ni ga’ar, “Dab mu kireb niged laniyan’ e re pin n’ey! Mpaged ya ke cha’riy e tin ni bay rok ni fan ko chirofen ni ngan chibgiliyeg riy.

⁸Ya pi’in gafgow e gubin ngiyal’ ma yad bay romed, machane gag e gathi gubin ngiyal’ ni bay ug par romed.”

⁹Ma girdi’ nu Israel ni pire’ ni pire’ e rrung’aged ni bay Jesus u lan e binaw nu Bethany, ma aram miyad yan ngaram; nranod ni gathi kemus ni bochan Jesus, machane ku bochan e ngar guyed Lazarus, ni ir fa’anem ni fulweg Jesus e yafos ngak ke fos ko yam’.

¹⁰Ma aram me puruy’nag e pi tolang ko prist rogon e n’en nra rin’ mu kun li’ Lazarus ngem’,

¹¹ya bo’or piyu Israel ni yad be chuw rorad be mich Jesus u wun’rad ni bochan Lazarus.

¹²Me yan i reb e rran riy ma fapi girdi’ ni aram urngirad ni pire’ ni pire’ ni karbad ko fare madnom ni Paluk’af e rrung’aged ni be yib Jesus i yib nga Jerusalem.

¹³Ma aram miyad th’ab yuwan e fal’tir ngranod i yan nga wuru’ e binaw ni ngar mada’gad Jesus ni yad be tolul ni be lungurad, “Ke sorok Got! I Got e nge ayuweg e en ni ir e ke yib ni owchen Somol! I Got e nge ayuweg e en ni pilung nu Israel!”

¹⁴Me pir’eg Jesus ba gamanman ni dongki me af nga daken, ni bod rogon ni be yog e babyor nib thothup ni be ga’ar:

¹⁵“Dab mu tamdag i gur e binaw nu Zion! Ya chiney e be yib e pilung rom i yib ngom, nike af nga daken ba dongki ni kab bitir.”

¹⁶Ma re ngiyal’ i nem e de nang pi gachalpen fan e pi thin nem; machane nap’an ni faseg Got Jesus ko yam’ me yan Jesus ko fla’ab nga tharmiy, ma aram me yib ngan’rad nike yog e babyor nib thothup e re bugithin ney ni murung’agen, ma kar rin’ed e ren’em ni fan ngak.

¹⁷Ma fapi girdi’ ni yad pire’ ni fa’ani ur moyed rok Jesus me faseg Jesus Lazarus ko yam’ me pining nge yib u lan fare low nga waen e ra weliyed ko girdi’ i yan urngin e tin kar guyed nike rin’ Jesus.

¹⁸Aram fan ni yan e girdi’ ni aram urngirad ni ngar mada’ niged Jesus — ni bochan e kar rung’aged e re maang’ang nem nike ngongliy.

¹⁹Ma fapi Farise e urogned u fithik’rad ni be lungurad, “Dakuriy ban’en nrayag ni ngad rin’ed! A mu guyed, ke thum e girdi’ nu fayleng yad be lek!”

²⁰Ma immoy boch piyu Greece u fithik’ e pi’in nranod nga Jerusalem ni ngar uned ko meybil ko ngiyal’ ni bay fare madnom riy.

²¹Miyad yib ngak Filip (ni be’ u Bethsaida, nib binaw ni bay u lan yu Galile) me lungurad ngak, “Gamad ba’adag ni gamad ra guy Jesus.”

²²Me yan Filip nge yan i weliy ngak Andrew, miyow cheag ngranow rognew ngak Jesus.

²³Me fulweg Jesus ngorow ni ga’ar, “Ke taw ko fare awa ni ngan pi’ e fla’ab ni ba ga’ ngak e en ni Fak e Girdi’ min tayfan.

²⁴Gu be yog e tin nib riyul’ ngomew: ba awochngin e wheat e yugu ra i par ni ka ta’ab awoch ni fa’anra dab nin’ nga fithik’ e but’ nge pil nge wod, ya fa’anra pil ma aram e ra pi’ e awoch ni pire’.

²⁵En nra t’uf rok e birok’ e pogofan e ra thay rok, ma en nra dabuy e birok’ e pogofan ko biney e tamilang e ra par rok ni fan ko yafos ndariy n’umngin nap’an.

²⁶En ni ba’adag ni nge pigpig ngog e thangri un ngog, ya en ni tapigpig rog e bay i par rog ko gin ni gu bay riy. Ya Chitamag e ra tayfan e cha’ nma pigpig ngog.”

²⁷“Chiney e ke magaf lanin’ug — susun e mang e nggog? Gur nge lungug, ‘Chitamag, dab mpag e re awa ney nge yib ngog’? Machane aray fag ni ku gub, bochan e nggu mada’nag e gafgow ni bay u lan e re awa ney.

²⁸Ah Chitamag, mu tayfan fithingam!” Me ere yib ba lam u tharmiy nga but’ ni ga’ar, “Kug tayfan ma bay kug rin’ bayay.”

²⁹Ma fapi girdi’ ni aram urngirad ni yad ba sak’iy u rom e rrung’aged e re lam nem me lungurad, “Ke chub e dirra’!” Ma boch e girdi’ e lungurad, “Ke non ba engel ngak!”

³⁰Machane me yog Jesus ngorad ni ga’ar, “Fare lam nike non e gathi fan ngog, ya fan ngomed.

³¹Chiney e aram e kan turguy e gechig ko fayleng; chiney e bay nluf pa’ e en ni ir e be gagiyegnag e girdi’ nu fayleng.

³²Ngiyal’ ni yira tiningeg ngalang u fayleng, e bay gu girengiy urngin e girdi’ ngog.” (

³³I yog e re bugithin ney ni be yip’ fan e mit i yam’ ni bayi gafgow riy.)

³⁴Me fulweg fapi girdi’ ni aram urngirad ni lungurad, “Motochiyel rodad e be yog ngodad ni fare Messiah e ra par nib fos ndariy n’umngin nap’an. Ere mang ni kamog ni en ni Fak e Girdi’ e thingar ni tining ngalang? I mini’ e cha’nir ni Fak e Girdi’?”

³⁵Me fulweg Jesus ngorad ni ga’ar, “Bayi par fare tamilang u fithik’med nib n’uw boch nap’an. N’en ni gimed be rin’ e ngam rin’ed ko ngiyal’ ni kabay e tamilang romed, nge dabi yib e lumor nga dakenmed; ya cha’ nma par u fithik’ e lumor e der nang e gin ni be sor ngay.

³⁶Ere nge mich u wun’med fare tamilang ko ngiyal’ ni kabay romed, nge yag ni mmanged girdi’en e re tamilang nem.” Nga tomuren nike yog Jesus e re bugithin ney me pagrad nge yan i mith rorad.

³⁷Yugu aram rogon nike ngongliy urngin e pi maang’ang ney u p’eowcherad, machane de mich Jesus u wun’rad,

³⁸ni fan e nge yib i m’ug nib riyul’ e tin ni yog Isaiah ni profet ni ga’ar: “Somol, i mini’ e ke mich u wan’ e thin rom ni kug weliyed? I mini’ e ke dag Somol gelngin ngak ke guy?”

³⁹Ireray fan nde yag ni nge mich Jesus u wun’rad ya ki yog Isaiah ni ga’ar: