San Juan 12:2-39

²Orzeꞌ de mbecy nu yuꞌ zeꞌ bzu ye dey tub che nu gow nuy mi. Zeꞌ Mart psaañ gyaꞌn. Nunu gazaꞌ Lázaro riy lat de yu nu nguaa lo mez nu gyicy che zeꞌ.

³Orzeꞌ Li bruꞌña nuñ chon gaynal gram tub lo asecy zguul nu la nardo nu tonaꞌ la ñgyup sac. Orzeꞌ pcooñ ndeꞌ gyiꞌ Jesuuz. Orzeꞌ pcuiigy ñi asecy zeꞌ nu gyich ic ñi. Orzeꞌ bzu laa nu zguul dutuub la nañ yuꞌ zeꞌ.

⁴Zeꞌ zu Judas Iscariote, tub yu nu rsyaꞌ lom. Laab yu zeꞌ yu nu bguꞌ Jesuuz yaa de yu nu rzi lagy lom.

⁵Orzeꞌ nay: ―¿Lagu wansaꞌy asecy zguul re nu sac i mbecy ni chon gaynal dzi? Gun orzeꞌ gad tiñ nu gric na ni de mbecy zi ―nay.

⁶Tees Judas ni mniiy, gun nac yu gubaan walab par nu nac nu rcay de mbecy zi. Nunu bzuy riiñ nu ri yaay nerbid nu rguꞌ dey tiñ ni dey. Nunu yuꞌ nu rboo dzey tiñ zeꞌ par ub ziꞌl yu.

⁷Orzeꞌ na Jesuuz: ―Cueꞌ gyicy zeed ru fiñ ii, gun bi bzu lily ñii asecy ii par nu duzu cuerp ne̱ par ornu shuub dzi nu cach dey ya̱.

⁸Ya̱ walab nu tuñ cyiiña̱ lat der, tees de mbecy zi zaab yuꞌ la dey lat der ―nam.

⁹Zigy de mbecy nu zu riiñ ni de mbecy Israeel güeñ dey nu zu Jesuuz Betania. Orzeꞌ gua dey zeꞌ walab tub lo ziꞌl nu za güii dey mi sinu niꞌ ziꞌl par nu za güii dey Lázaro, yu nu bicy mi nu byabañ zeꞌ.

¹⁰Orzeꞌ de yu zub lo ni de uz bzaꞌ lo dey nu niꞌ cut dey Lázaro,

¹¹gun par nu nac yu zeꞌ zigy de mbecy Israeel druu chu dey lo de uz par nu ricy cup dey consuel lo Jesuuz.

¹²Orzeꞌ tuubaꞌ dzi de mbecy zigy nu gua saꞌ ni Pas güeñ dey nu bi yeed Jesuuz par Jerusaleeng.

¹³Orzeꞌ blag dey de yaa ya gyiñ. Orzeꞌ za cheel dey mi. Nunu rbish ti dey. Orzeꞌ na dey: ―¡Dzi ga zily nac Ñgyoozh! ¡Ñgyoozh nac num ru, biñ nu bzuu nez mi! ¡Ñgyoozh nac num ru, biñ nu nac rey ni de ub na, mbecy Israeel! ―na dey.

¹⁴Orzeꞌ guud tub bur miꞌ ni Jesuuz. Orzeꞌ byub mi ma gal nu rniiñ lat de riidz ni Ñgyoozh. Rniiñ:

¹⁵Cueꞌ dzib der, mbecy nu yuꞌ gyedz Sión. Güii der. Re yad rey ni der. Riib mi tub bur miꞌ, rniiñ.

¹⁶Tiem zeꞌ de yu nu rsyaꞌ lom wangyet lag dey cuen de nu ndeꞌ. Tees ornu Jesuuz bish cyam lo gyel lily nim, orzeꞌ byezaꞌ lagy dey nu de riidz ni Ñgyoozh mniiñ nu ni zac mi nunu mniiñ nu ni gyicy nu mbecy mi.

¹⁷Na gazaꞌ de mbecy nu bzaac ornu Jesuuz bredz mi Lázaro nu ruuy gyerbaa niy nunu bicy mi nu byabañ yu, de yu zeꞌ mnii dey lo mbecy coz nu bzaac yu.

¹⁸Ndeꞌ nu zigy mbecy gua cheel dey mi, gun güeñ dey nu bicy mi nusuriidz zeꞌ.

¹⁹Orzeꞌ na de mbecy fariseo rab dey losaꞌy: ―Na bi bzaac der nu rila wadaꞌ mod ni den. Güii der. Dela mbecy za ca dey ich yu ―na dey.

²⁰Na lat de mbecy nu gua Jerusaleeng nu briib zily dey Ñgyoozh lat saꞌ, lat de yu zeꞌ ri la be mbecy griego.

²¹Orzeꞌ de yu zeꞌ bechaꞌ dey lo Lip. Yu zeꞌ nac yu tub mbecy Betsaida, tub gyedz nu ri lo yu ni Galilea. Orzeꞌ na dey rab yuy: ―De̱ ya̱ rlagy de̱ ne̱e̱ du̱ Jesuuz ―na dey.

²²Orzeꞌ Lip gua niiy lo Ndrees. Orzeꞌ rup laa dey gua nii dey lo Jesuuz.

²³Orzeꞌ nam rab mi dey: ―Bi rshuub tiem nu ya̱, biñ nu byac mbecy, gri̱ lo gyel lily ne̱.

²⁴Ya̱ rishli rne̱e̱ lo der nu benu tub mbigy trig wayet lag ñi lo yu nu nit loñ, orzeꞌ laab tub ziꞌl mbigy nac ñii. Tees benu nit loñ, orzeꞌ cuic ñi zañ cosech.

²⁵Yu nu rash shcab nu ricy ñi presis nu cui mbañ gyishlombecy ii, yu zeꞌ gat yu. Tees yu nu rash shcab nu a̱ꞌ ricy ñi presis nu cui mbañ gyishlombecy ii, yu zeꞌ gad nu cui mbañ yu tub la.

²⁶Gun benu ca na tub mbecy rlagy yu nu gyicy yu gal nu rne̱e̱, orzeꞌ rlagy ñi nu cyid cay icha̱. Orzeꞌ zeꞌ nu ya̱ zu̱, laabaꞌ zeꞌ gzuy. Nunu Ñgyoozh, uza̱, gyicy mi nu gya gzuy.

²⁷’¡Na deet rac nañ lardo̱o̱! ¿Per la ñuu coz ne̱e̱? ¿A gne̱e̱: “Uza̱, bloo chu de coz nu gzaca̱ na”? ¡Tees laab par gyiꞌ ndeꞌ nu yapa̱ gyishlombecy ii!

²⁸Uza̱ bicy nu gyed gyel mbecy nir ―nam. Orzeꞌ zaab tiꞌ nu mnii Ñgyoozh gashtal gyibaa. Orzeꞌ nam: ―Bi bicya̱ nu bruu zac gyel mbecy ne̱, nunu gyicya̱ nu gruu zac zir ñi par lo ―nam.

²⁹Orzeꞌ de mbecy zigy nu yuꞌ zeꞌ güeñ dey nu zaab tiꞌ zeꞌ. Orzeꞌ yuꞌ dey nu rniiy nu ndeꞌ guzii. Zeꞌ yuꞌ gaꞌ dey nu mniiy nu ndeꞌ tub anc nu mnii nuy Jesuuz.

³⁰Orzeꞌ Jesuuz nam rab mi dey: ―Walab nu nac ya̱ ndeꞌ nu zaab tiꞌ rnii sinu par nu nac de ru.

³¹Na bi pshuub tiem nu gyuꞌ bee nu dzi a̱ꞌ nap de mbecy nu yuꞌ gyishlombecy ii. Nunu na Ñgyoozh gyicy mi gan nuras, yu nu riib ic gyishlombecy ii.

³²Tees ornu caa dey ya̱ lo cruuz, orzeꞌ laab ya̱ gyicya̱ nu gyechaꞌ dela mbecy lo̱ ―nam.

³³Ni mod mniim par nu briic mi nu gad lagy dey nu lac mod gat mi.

³⁴Orzeꞌ na de mbecy zigy zeꞌ rab yum: ―De ub na rad lagy na nu lat de riidz ni leey ni den rniiñ nu Mesías, biñ nu ca lo cuen nu co mbañ mbecy, cui mbañ mi tub la, rniiñ. Benu ni, orzeꞌ ¿lagu rniir nu ru, biñ nu byac mbecy, caa dey ru lo cruuz, rniir? Orzeꞌ ¿ca na biñ nu byac mbecy nac ru beni? ―na de mbecy zeꞌ.

³⁵Orzeꞌ na gaꞌ Jesuuz rab mi dey: ―Ya̱, biñ nu rlyuu yaa, gabee chesa̱ ru̱ꞌ sñuu la be dzi lat der. Orzeꞌ zaab za la der lat nu gabee yuꞌ yaa gun orzeꞌ cueꞌ gyet cow ni der. Gun de mbecy nu rded zeꞌ nu cow wagad lagy dey ca par gash yu.

³⁶Orzeꞌ bicy cup der consuel lo ya̱, biñ nu rlyuu yaa, lat nu gabee rdeda̱ lat der, gun orzeꞌ nac der mbecy nu rded zeꞌ nu yuꞌ yaa ―nam. Na ornu blazh mniim de riidz zeꞌ, bruum lat dey nunu guam pcach lom ni dey.

³⁷Mas Jesuuz bicy mi zañ nusuriidz ily lo dey, tees wangyicy cup dey consuel lom,

³⁸gun orzeꞌ byuꞌ niñ gal nu pcaa Isaías, yu nu mnii por cuen ni Ñgyoozh. Orzeꞌ nay: Ñgyoozh, ¿cyu guña lagy ni de riidz nu mne̱e̱? Nunu ¿Cyu gac gyet lag cuen de coz ily nu gac gyicy ru? na Isaías.

³⁹Ndeꞌ nu wangac ñgyeña lagy dey, gun niꞌ ziꞌl pcaa Isaías: