Ioane 12:2-39

²Nei eai maimailahi eai aiaigogo ia enana se ginauri; Mareta ia adi tau soi: Lasaro isi maedi se bawasega hatahata eai.

³Maria nado pauna esega ie abi, maisana i lai ariri, Iesu aena arinai i heyausidi, aena hinage uruna maiawana arinai i saudi: nado panena numa i laugirihai.

⁴Ena heaheata esau Iuda Isakariota, Simona natuna, ia abo taumoruina ede, i ene.

⁵“Ina nado ta ie saha nige se uneunei, denari handere haiona se abidi, abo si mosei gogogesagesa aridi eai?”

⁶Gogogesagesa wa nige i nuatuidi; ina riba ta ie ribaei paana ia tauaiaiyahari, eo edi tobo tauabina, eo ginauri tobo alona eai tauitawataina.

⁷Iesu abo i ene, “Sine me i otawa: edi huia toregu asubenana i nuatunonohai.

⁸Gogogesagesa wa huia gamagari arimiu eai se mia: eau nige ea miamiadaoi maidamiu.”

⁹Iudea tataodi gamagaridi abo se nuatui Iesu nei eai ie mia: nige se laoma Iesu mo debana eai, na bena hinage Lasaro se ita, iaede Iesu mate eai i hetorouioi wa.

¹⁰Kohena lailaidi se oioiriba bena Lasaro hinage se unui.

¹¹Paana ede ia debana eai Iudea gamagaridi se lausuara, eo Iesu se awamamohoiei hinage.

¹²Mara‐ie‐tom tatao gamagaridi mataasi hesabana se laolaoma, wasa se ataiei Iesu abo i laoma Ierusalema eai.

¹³Bagadi se worahaidi, se abidi ia se laubagibagini, se eogayoga, si ene, “Hosana! Isaraela edi wasawasa i lolo ariri, Guiau esana eai i loama.”

¹⁴Iesu asini natuna i lobai, abo i bawasae potana eai, doha se uriyao, si ene.

¹⁵“Siona natuna siu e, tabu u matausi: em Wasawasa i laoma, i bawasae asini natuna potana eai.”

¹⁶Teina ginauri ta ena heaheatayao huia ne nige se nuatukomakomani: sora Iesu se hedebasae, abo nuadi se sae teina ginauri ta nabada wa se urinonohaidio, ia ede se ginauridi ia arinai hinage.

¹⁷Tatao wa, ia maenayao lahinae Lasaro bousa eai i eogahai, eo mate eai i hetorouioi wa, isi ede ribana se wasaduaiei.

¹⁸Arinai abo tatao ia se laubagibagini paana se ataiei teina heiheinoi gigiborina i ginauri wa.

¹⁹Arinai Parisea tataodi isibom se ribariba si ene, “Au ita au ribariba awa mo? tanoubu ia abo se laugogoi.”

²⁰Heleni tataodi headi se laoma, bena mataasi eai ne se tabaohu.

²¹Se laoma Pilipo arinai, ia Betesaida tauna, Galilaia tehana eai, edi gadosisi si ene, “Taubada e, ai henua bena Iesu ai ita.”

²²Pilipo i lau Anederea i heriba: eo Anederea maena Pilipo Iesu abo se heriba.

²³Iesu i heuioidi i ene, “Huiana i lagemao, Tau Natuna abo se hedebasaei.

²⁴Mamohoi, mamohoi ea heribamiu ta ea ’ne, Sitona uauana ena nige i beu tano boeana eai, eo i mate, iabom mo i ota: ena i mate, abo aiaina gamagaridi i toredi.

²⁵Ia maurina i gadosisiei ia maurina abo i tauyamui: ia tanoubu eai ta maurina i nuagabaei, mauri abo i abi i lau e nige nosina.

²⁶Taba tau esau i heaeaiegu, ia abo i hemuriwataigu: eau haedi egu aba mia, egu heaheari wa nei eai abo i mia hinage: taba tau esau i heaeaiegu Tamagu ia abo i hedebasaei.

²⁷“Abo ina mo ea nuadubu ariri; abo ea ’ne aisana? ‘Tamagu e, ina awa eai ta u hemaurigu?’ na nige’e, hesabana ede teina awa ta ea hearo.

²⁸Tamagu e, esam u hedebasaei.” Arina esau galewa eai i dobima i ene, “Ea hedebasaeyao, eo abo hinage ea hedebasaeuioi.”

²⁹Tatao wa, isi nei eai se totoro, se ataiei si ene parere ie oi: headi si ene “Aneru esau i ribalau ia arinai.”

³⁰Iesu i ribalau isi aridi eai i ene, “Wau arina wa eau nige agu riba, na omi debamiu eai i laoma.

³¹Abo ina mo tanoubu ta se hekiraino: tanoubu ta wasawasana hinage abo se aiduiei.

³²Eau, tanoubu eai taba se abiisinigu, tatao gamagaridi abo ea niurigogoidima arigu eai.”

³³Ie riba ina doha, ia matena i hemasaraha.

³⁴Tatao se ribalau ia arinai si ene, “Laugagaeo eai ai ataieyao si ene, Keriso i mia mo i lau e, nige nosina: u ene edoha Tau Natuna abo se abiisini? Tau Natuna ne eai?”

³⁵Iesu abo i heribadi i ene, “Huia kuukuu mo marana i ota arimiu eai. Marana ma otana arimiu eai au laulau ata masigiri i hearomiu: paana ede ia masigiri boeana eai i laulau ena aba lau nige i nuatui.

³⁶Mara ma otana arimiu eai wa, marana au awamamohoiei, arinai abo doha mara nanatunayao au laulau.” Teina riba ta Iesu i ribaedi, abo i laugabaedi, i tauyamui.

³⁷Ia heiheinoi gigibori gamagaridi i ginauridi isi matadi eai, taiede ia nige se awamamohoiei.

³⁸Arinai abo riba wa Isaia peroveta i ribaei se hemamohoiei, i ene, “Guiau e, ema wasa eai i awamamohoiei? eo eai arinai Guiau nimana se hemasaraha?”

³⁹Arinai sunumana nige abina se ata, paana Isaia i ribauio, i ene: