Johannes 11:6-49

⁶Nge lupwen a rongorong pwe Lasarus a samau, a chök nonometiu lon ewe leni ia a nom ie pwal lon ükükün ruu rän.

⁷Mürin a üreni nöün kewe chon kaiö, “Ousipwe liwinsefäliti Jutea.”

⁸Nge ekewe chon kaiö ra üreni, “Sense, pollon kewe chök ekewe aramas ikenan ra mochen mone ngonuk fau. Nge iei ka pwal mochen liwinsefäliti ikenan?”

⁹Jesus a pölüeniir, “Ifa usun, esap wor engol me ruu awa lon eu rän? Eman aramas mi fetal lerän esap chepetek, pun a küna saramen ei fanüfan.

¹⁰Nge eman mi fetal lepwin a chepetek, pun esap wor saram ren.”

¹¹Mürin än Jesus apasatä ekei kapas, a pwal üreniir, “Chiechiach we Lasarus a möürüla, nge ngang üpwe feila pwe üpwe föngünätä.”

¹²Ekewe chon kaiö ra pölüeni, “Äm Samol, are a möürüla, iwe, epwe pöchökületä.”

¹³Jesus a fen kapas usun än Lasarus mäla, nge ekewe chon kaiö ra ekieki pwe a chök kapas usun an möür.

¹⁴Iei mine Jesus a afata ngeniir, “Lasarus a mäla,

¹⁵nge fänäsengesimi üa pwapwa pwe üsap nom ren, pwe ämi oupwe kaiö ngeni ämi oupwe lüküei. Ousipwe feila ren.”

¹⁶Tomas, a pwal iteni Lippwe, a üreni chiechian kewe chon kaiö, “Ousipwe feila meinisin fiti ewe Sense, pwe sipwe eti i le mäla!”

¹⁷Iwe, lupwen Jesus a tori ewe leni, a rongorong pwe Lasarus a fen nom lon peias lon ükükün rüanü rän.

¹⁸Toauen lefilen Petania me Jerusalem ina epwe kis seni ruu mail,

¹⁹nge chomong chon Juta ra feila ren Marta me Maria pwe repwe aururur ren mongeer we a mäla.

²⁰Lupwen Marta a rong pwe Jesus a feito, a feila lükün ewe sopw pwe epwe souni, nge Maria a chök nom leimw.

²¹Iwe, Marta a üreni Jesus, “Ai Samol, are en kopwe nom ikei, mongeei we esap mäla.

²²Nge üa pwal silei pwe iei mwo nge Kot epwe ngonuk meinisin mine ka tüngor.”

²³Jesus a üreni neminewe, “Mongeom we epwe manausefälitä.”

²⁴Marta a pölüeni, “Ngang üa silei pwe epwe manausefälitä lon ewe ränin manausefäl lesopolan fanüfan.”

²⁵Iwe, Jesus a üreni, “Ngang ewe manausefäl me ewe manau. Iö a lüküei epwe manau inamwo are epwe fen mäla.

²⁶Nge iö a manau o lüküei esap fokun mäla feilfeilachök. Ifa usun, ka lükü ei?”

²⁷Marta a pölüeni, “Ewer, ai Samol, üa lükü pwe en ewe Kraist, Nöün Kot, ätewe Kot a pwon pwe epwe feito fanüfan.”

²⁸Mürin än Marta apasa ekei kapas, a liwinsefälila le imwan o köri Maria pwiin we o möngününgün ngeni, “Ewe Sense a war, nge a mochen churuk.”

²⁹Nge lupwen Maria a rongorong ekei kapas, a müttir ütä o feila ren Jesus.

³⁰Iwe, Jesus esamwo tolong lon ewe sopw, nge a chök nom lon ewe leni ia Marta a churi ie.

³¹Ekewe aramas mi nom lon ewe imw ren Maria ar repwe aururu ra küna, pwe a müttir ütä o towu lükün. Iwe, ra tapwela mürin, pun ra ekieki pwe Maria a feila ren ewe peias pwe epwe kechü ikenan.

³²Maria a tori ewe leni ia Jesus a nom ie. Lon ewe chök otun a tori Jesus, a chapetiu arun pechen o üreni, “Ai Samol, are en kopwe nom ikei, mongeei we esap mäla.”

³³Iwe, Jesus a küna Maria pwe a kechü, pwal ekewe aramas mi tapwela mürin, letipan a fokun mwökütüküt o weires.

³⁴Iwe, a aisiniir, “Ia oua peiaseni Lasarus ie?” Ra pölüeni, “Äm Samol, kopwe feito o nenengeni.”

³⁵Iwe, Jesus a kechü.

³⁶Mürin ekewe aramas ra apasa, “Nengeni usun an tongei!”

³⁷Nge pwal ekoch ra apasa, “Esap ätei ätewe mi aneneloi mesen ewe mwän mi chun? Pwota esap tongeni amwöchü manauen Lasarus pwe esap mäla?”

³⁸Iwe, lupwen Jesus a feiliti ewe peias, a pwal mwökütükütsefäl letipan lon an weires. Ewe peias a nom lon eu achau, nge eföü fau mi watte a öpwönütiu me won.

³⁹Jesus a üra, “Oupwe ekiela ewe fau seni won ewe peias!” Nge Marta, fefinen ewe mi mäla a üreni, “Ai Samol, ei otun ewe somä epwe le fen pomach, pun a fen nom lon peias lon ükükün rüanü rän.”

⁴⁰Mürin Jesus a pölüeni, “Ifa usun, üsap ürenuk pwe are kopwe lükü kopwe küna lingen Kot?”

⁴¹Iei mine ra ekiela ewe fau seni won ewe peias. Iwe, Jesus a netä läng o apasa, “Semei, üa kilisou ngonuk pwe ka aüselingaei.

⁴²Ngang üa silei pwe ka aüselingaei fansoun meinisin. Nge iei üa apasa ei fänäsengesin ekewe aramas mi ü ikei, pwe repwe lükü pwe en ka tinieito.”

⁴³Mürin an apasa ekei kapas, a kökkö fän mwelian mi leüömong, “Lasarus, kopwe towu!”

⁴⁴Iwe, Lasarus a towu, nge pöün me pechen ra finifin ngeni mangaku, won mesan a pwal finifin ngeni echö mangaku. Iwe, Jesus a üreniir, “Oupwe apichala ekewe finifin pwe epwe tongeni fetal.”

⁴⁵Iwe, chomong aramas mi feito pwe repwe churi Maria, ra küna mine Jesus a föri, iwe, ra lükü i.

⁴⁶Nge ekoch me leir ra feila ren ekewe Farisi o üreniir mine Jesus a föri.

⁴⁷Iei mine ekewe souasor mi lap me ekewe Farisi ra chufengen me ewe mwichen souapwüng o ra üreniir, “Met sipwe föri. Nengeni ekei manaman meinisin ei mwän a föri!

⁴⁸Are sipwe mwüt ngeni an epwe sopwela lon ei sokun lapalap, aramas meinisin repwe lükü i. Mürin repwe feito o atai ach imwenfel o angeala aramasach.”

⁴⁹Iwe, eman me leir itan Kaifas, i ewe Souasor mi Lap lon ena ier, a apasa, “Ämi ousap silei och.