SAN JUAN 11:6-49

⁶pero wüx tanguiay iün andeow a Lázaro, ngo mamb majaw, tacǘlan mamong ic nüt.

⁷Condom wüx lamong ic nüt, quiaj tasaj minipilan nej: ―Tabaats alinomb andüyiiüts tiül Judea ―aj nejiw.

⁸Quiaj tasajüw nej minipilan nej: ―Rabí, ngome lamajiür xeyay nüt wüx ajcüwa nipilan moncül quiaj tandiümüw maloxiw ic, nganüy ¿indiüm meamb quiaj alinomba? ―ajüw nej.

⁹Quiaj tasaj nejiw Teat Jesús: ―Ajawaats arraj nüt ajiür gajpic (12) ores. Sitiül nop apmajüy tiül arraj nüt ngome apmajtoch, cos aaga ran quiaj ambeol nej maxom majaw.

¹⁰Pero sitiül nop ajüy ongwiiüts, alndom majtoch, cos nej ngo majiür ran ―aj nejiw.

¹¹Condom tasaj nejiw: ―Miamigojaats Lázaro lameay, nganüy sanamb napacüüch ―aj nejiw.

¹²Quiaj tasajüw nej minipilan nej: ―Teat, sitiül lameay, aag ayaj ajüic teaámb ajneaj ―awüw.

¹³Teat Jesús tandeac atquiaj cos ajaw Lázaro landeow; pero minipilan nej apiüngüw naleaing almameay.

¹⁴Condom quiaj Teat Jesús tasaj nejiw aleáingan: ―Lázaro landeow.

¹⁵Najneaj ngo najlüy quiaj wüx tandeow, cos nganüy icona apmejawan leawa sanarang, quiaj alndom meyariün sandeac. Nganüy tabaats majawaats ―aj nejiw.

¹⁶Condom quiaj teat Tomás, aaga nasoic Cuüch, tasaj alacas minipilan Teat Jesús: ―Tabaats icoots aton mandeowaats maquiüjpaats Teat Jesús ―aj nejiw.

¹⁷Wüx tapeay quiaj Teat Jesús, Lázaro lamiüraad lamatüch peic nüt.

¹⁸Aaga cambaj Betania ngome miünquiaj, ajlüy ijquiaw kilómetro alwüx pinawan naw Jerusalén.

¹⁹Xeyay nipilan monaw Jerusalén lapeayiw quiaj majawüw müm Marta maquiiüb müm María, para mawüywüyiw nejiw majneaj omeajtsüw, cos tandeow michijquiaw nejiw.

²⁰Müm Marta wüx tanguiay aliüc Teat Jesús, quiaj tamb mangoch; nganüy müm María tacǘlan tinden.

²¹Quiaj müm Marta tasaj Teat Jesús: ―Teat, sitiül ique mejlüy ningüy sapiüng xechiig ngo mandeow.

²²At nganüy aton sajaw Teat Dios apmarang cuajantanej leaw apmetün ocueaj ―aj nej.

²³Quiaj tasaj nej Teat Jesús: ―Michiig apmapac alinomb müm ―aj nej.

²⁴Quiaj müm Marta tasaj nej: ―Naleaing teat, sajaw apmapac alinoic nüt wüx Teat Dios apmapacüüch meáwan mondeow ―aj nej.

²⁵Condom quiaj tasaj nej Teat Jesús: ―Xique nepacüüch mondeow, xique neech mapacaran. Jane ayar sandeac masey mandeow apmapac alinomb.

²⁶Meáwan leaw almapac nganüy, sitiül ayar sandeac ngome apmandeow nómban. ¿Cuane ipiüng müm, naleaingue aag ayaja? ―aj nej.

²⁷Quiaj tasaj nej müm Marta: ―Sajaw naleaing ipiüng Teat, ique aaga Cristo leaw lapiürang aliüc, Micual Teat Dios ―aj nej.

²⁸Ndoj mapiüng aag ayaj müm Marta, quiaj tamb mapaj müm María, tandex teolaag: ―Lapeay a Maestro, atün ic meamb mejaw ―aj nej.

²⁹Müm María camüm manguiay ayaj, quiaj tamb najen majaw Teat Jesús.

³⁰Teat Jesús nganaw majmel tiül cambaj, alíünan niüng tangoch nej müm Marta.

³¹Ajcüwa nipilan leaw aliw tiül nden maquiüjpüw müm María mawüywüyiw nej müjchiw mapac omeaats, wüx tajawüw amb acuiür tandüjpiw mamb cos apiüngüw nej laámb apmajiünts niüng ajlüy oxiüt.

³²Müm María camüm mapeay niüng ajlüy Teat Jesús, quiaj taquieel tiüt micos nej, tapiüng: ―Teat, sitiül ndot mejlüy ningüy ngo mandeow xechiig ―aw.

³³Wüx Teat Jesús tajaw ajiünts müm María, at ajcüwa mondüüb nej mamb aton, quiaj tajngot amix omeaats.

³⁴Tatün manguiay nejiw: ―¿Nguiane temiütana? ―aj nejiw. Quiaj tasajüw: ―Teat, tabaats mejaw ―ajüw.

³⁵Teat Jesús tajiünts.

³⁶Quiaj tapiüngüw ajcüwa nipilan quiaj: ―Ijawan, xeyay andiüm a Lázaro ―awüw.

³⁷Altiül tapiüngüw: ―Neol ngwüy, tüüch ram oniiüg a somb, jow nganüy, ¿neol ngo mambeol a Lázaro mapac, ngo mandeowa? ―awüw.

³⁸Teat Jesús tamix omeaats alinomb, quiaj tamb matüch aaga oxiüt. Aaga oxiüt quiaj noic warraj tiüc narangüch, nepal wüx noic nadam piedra.

³⁹Quiaj tasaj nejiw Teat Jesús: ―Iwüniün a piedra apal oxiüt quiaj ―aj nejiw. Quiaj tasaj nej müm Marta, micoj aaga nandeow quiaj: ―Teat, nganüy lango majneaj, lajmboc, cos lamajiür peic nüt tatow andeow ―aj nej.

⁴⁰Teat Jesús tasaj nej: ―¿Neol, ngome tasajas ic sitiül apmeyar sandeac apmejaw noic najneajay leaw Teat Dios apmaranga? ―aj nej.

⁴¹Condom quiaj tawüniw a piedra. Quiaj Teat Jesús taxaing omal majaw cawüx, tasaj Teat Dios: ―Teat, süüch ic gracias Teat, cos sajaw inguiay sandeac.

⁴²Xique sajaw meáwan nüt teamenguiay sandeac. Nganüy sasaj ic aag ayaj manguiayiw ajcüwa nipilan cam, majawüw naleaing ique teaach xic niün ―aj.

⁴³Ndoj mapiüng aag ayaj, quiaj tendeac napac: ―¡Lázaro, mac, iriow ninguiaj! ―aj.

⁴⁴Quiaj aaga nandeow quiaj taw, tan ajlüy awincharan ombas, naw wüx omal andüy wüx oleaj. Quiaj tasaj nejiw Teat Jesús: ―Ipüjliün ombas nej para majneaj majüy ―aj nejiw.

⁴⁵Ndoj aag ayaj, xeyayiw nipilan judío leaw tambüw maniüngüw müm María tayariw andeac Teat Jesús, cos ajawayej nguineay tarang.

⁴⁶Pero altiül aleáingan tambüw majawüw ajcüwa fariseos. Tapots masajüw meáwan nguineay lamarang Teat Jesús.

⁴⁷Condom quiaj ajcüwa fariseos, at montangtang miteaats, tapajüw monajiüt tiül nipilan judío canchiütoj mandeacüw, tapiüngüw: ―¿Cuane apmarangaatsa? Cos aaga naxey quiaj xeyay cuajantanej teamarang.

⁴⁸Sitiül müjchiiüts majlǘyan marang leaw andiüm, meáwan nipilan apmayariw andeac nej; ndoj ajcüwa monajiüt monaw Roma apmandrojchiw ombas aaga nadam nangaj iüm ocueajiiüts; apmanojtiw miiütaats aton ―awüw.

⁴⁹Nop nejiw nenüt Caifás, minatang miteaats nej tiül aaga neat quiaj, tasaj nejiw: ―Icona ngo mejawan nicuajind.