JUAN 11:6-49

⁶Pero quema quicajqui mococohua Lázaro, mocajqui seyoc ome tonali campa itztoya.

⁷Huan teipa techilhui tiimomachtijcahua: ―Ma tiyaca sampa estado Judea.

⁸Huan tiimomachtijcahua tiquilhuijque: ―Tlamachtijquetl, nopa israelita tlayacanani nepa quinequiyayaj mitztepachose. ¿Para tlen sampa tiyase?

⁹Huan Jesús technanquili: ―Ama ax tleno nopantis. Pampa onca majtlactli huan ome horas quema tlatlanestoc ipan se tonal. Se tlen nejnemi quema tonaya ax tleno ipanti pampa quitlahuilía nopa tlahuili tlen ni tlaltepactli.

¹⁰Pero intla se nejnemi quema tzintlayohua, motepotlamis pampa ax onca tlahuili. Huan quena, ajsis hora tlen tzintlayohuilotl quema oncas tlen nopantis.

¹¹Jesús quiijto ya ni huan teipa techilhui: ―Tohuampo Lázaro cochtoc, pero niyas niquixititi.

¹²Huan tiimomachtijcahua tiquilhuijque: ―Toteco, intla cochtoc, cualtitoc, pampa quema isas, huajca mochicahuas.

¹³Pero Jesús nelía techilhuiyaya Lázaro ya mictoya, pero timoilhuiyayaj san cochtoya.

¹⁴Huajca Jesús techilhui xitlahuac: ―Lázaro ya mictoc.

¹⁵Huan na nipaqui ax niyajqui nimantzi pampa ama más cuali para imojuanti pampa más innechneltoquilise. Ma tiyaca tiquitatij.

¹⁶Huan Tomás tlen nojquiya quitocajtiyaya “Cuate” huan tlen itztoya se tlen tojuanti tiimomachtijcahua Jesús, techilhui: ―Ma tiyaca ihuaya para nojquiya ma techmictica intla quimictise Jesús.

¹⁷Huan quema Jesús ajsito altepetl Betania, ya quipixtoya nahui tonali quitlalijtoyaj itlacayo Lázaro ipan tlacacahuaya.

¹⁸Huan Betania mocahua nechca Jerusalén, huelis se eyi kilómetro ihuejcaca.

¹⁹Huan miyac israelitame quistoyaj Jerusalén para quinseseltise Marta huan María pampa mijqui iniicni.

²⁰Huan quema Marta quicajqui para hualayaya Jesús, yajqui quinamiquito ipan ojtli, pero María mocajqui calijtic.

²¹Huan Marta quiilhuito Jesús: ―NoTeco, intla tihualajtosquía quema mococohuayaya, noicni ax mictosquía.

²²Huan yonque ya mictoc, nijmati Toteco mitzchihuilis nochi tlen tijtlajtlanis.

²³Huan Jesús quiilhui: ―Moicni sampa moyolcuis.

²⁴Huan Marta quiijto: ―Quena, nijmati moyolcuis sampa quema nochi mijcatzitzi moyolcuise ipan itlamiya tonali.

²⁵Huan Jesús quiilhui Marta: ―Na tlen niquinyolitía tlacame tlen mictoque huan sampa niquinmaca yolistli. Yonque miquis itlacayo se tlen nechneltoca, quipiyas yolistli yancuic para nochipa.

²⁶Huan nochi tlacame tlen itztoque huan nechneltocaj ax miquise para nochipa. ¿Tijneltoca tlen nimitzilhuía?

²⁷Huan Marta quiilhui: ―Quena, noTeco nijneltoca ta tiCristo, tiIcone Toteco. Tajaya tlen timitzchiyayayaj xiajsi ipan totlaltepac.

²⁸Huan quema Marta tlanqui quiijto ya ni, yajqui quinotzato María huan quiixtacailhui: ―Totlamachtijca ya ajsico huan mitznotza.

²⁹Huan quema María quicajqui ni, yajqui nimantzi para quinamiquiti.

³⁰Huan Jesús noja aya ajsiyaya campa altepetl pampa mocajtoya campa Marta quinamiquito.

³¹Huan nopa israelitame tlen itztoyaj calijtic para quiyolchicahuase María quiitaque quema quisqui nimantzi huan quitoquilijque pampa moilhuiyayaj yohuiyaya quichoquiliti iicni campa quitoctoyaj.

³²Pero María yajqui campa itztoya Jesús huan quema quiitac, motlancuaquetzqui iicxitla huan quiilhui: ―NoTeco, noicni ax mictosquía intla tihualajtosquía quema mococohuayaya.

³³Huan Jesús quiitac chocayaya María, huan nojquiya nopa israelitame tlen hualajque ihuaya nojquiya chocayayaj. Huan yajaya nojquiya moyolpitzahuili huan mocueso.

³⁴Huan quintlajtlani: ―¿Canque inquitoctoque? Huan quiilhuijque: ―Xihuala, Toteco, ma tijtlachilitij.

³⁵Huan Jesús chocac.

³⁶Huan nopa israelitame quiijtojque: ―Xiquitaca, Jesús nelía quiicneli Lázaro.

³⁷Huan sequin quiijtojque: ―Yajaya quichicajqui nopa popoyotzi. ¿Ax hueltosquía nojquiya quichicajtosquía Lázaro para ax mictosquía?

³⁸Huan sampa Jesús moyolpitzahuili huan yajqui campa quitoctoyaj. Quitlalijtoyaj itlacayo Lázaro ipan se tlacajcahuaya huan quiixtzajque ica se hueyi tepatlactli.

³⁹Huan Jesús quiijto: ―Xijquixtilica ne tetl tlen ica quitzactoque. Huan Marta, iicni Lázaro, quiilhui Jesús: ―Pero ya quipiya nahui tonali tijtojque huan huelis ya potehuía.

⁴⁰Huan Jesús quiilhui: ―¿Ax nimitzilhuijtoc, intla tijneltocas, nimitznextilis ihueyitilis Toteco?

⁴¹Huan quema quiquixtilijque nopa tetl tlen nopa tlacajcahuaya campa quitlalijtoyaj nopa mijcatzi, Jesús ajcoitac huan quiijto: ―Papá, nimitztlascamati pampa tinechtlacaquilijtoc huan tinechchihuilía tlen nimitztlajtlanía.

⁴²Nijmati nochipa tinechtlacaquilía, pero nimitzcamahuía ama tlamiyacapa para nochi tlen nechyahualojtoque nica huelis nechneltocase para tinechtitlantoc ipan ni tlaltepactli.

⁴³Huan quema tlanqui quicamahuía iTata, camatqui chicahuac huan quiijto: ―Lázaro, xiquisa tlen nopa tlacajcahuaya.

⁴⁴Huan Lázaro tlen mictoya quistihualajqui huijcontoc nejmajtic ica yoyomitl imaco hasta nochi iicxico. Huan se payo quiixtzacuayaya. Huan Jesús quinilhui nopa tlacame: ―Xijtojtomaca para huelis yas.

⁴⁵Huan miyac israelitame tlen itztoyaj ihuaya María quiitaque tlen Jesús quichijqui huan quineltocaque para yajaya nopa Cristo tlen hualasquía.

⁴⁶Pero sequinoc israelitame tlen ax quineltocaque yajque quinilhuitoj nopa fariseos tlaque Jesús quichijtoya.

⁴⁷Huajca nopa tlayacanca totajtzitzi huan fariseos mosentilijque ica nopa hueyi tlasentilistli tlen tequihuejme huan quiijtojque: ―¿Tlaque tijchihuase? Pampa ni tlacatl Jesús quichihua miyac tlanescayotl.

⁴⁸Intla tijcahuilise ma quichihuas más, huajca nochi quineltocase. Huan nopa tequihuejme ipan altepetl Roma quicaquise huan techtitlanilise soldados para techxolehuiliquij totiopa huan techmictise nochi tiisraelitame ipan totlal.

⁴⁹Huan Caifás tlen eliyaya nopa hueyi israelita totajtzi ipan nopa xihuitl quinilhui: ―Ax tleno inquimatij.