YOHANA. 11:6-49

⁶Viyahulike kamba Lazalo kolumwa, kakala bahaja hayakalile mazua mabili.

⁷Abaho, kawalongela wanahina zake, “Tubweleganye Yudea.”

⁸Wanahina zake wamulongela, “Mkulufunzi, kipigiti kiguhi kibitile Wayahudi wa kuja walonda kukutoa na mabwe, abaho, konda kubweleganya kukuja?”

⁹Yesu kalonga, “Zua hadili na masaa longo dimwe na mabili? Avo munhu yoyose yotembela imisi hadaha kuikwala, kwavija kowona mulangaza wa ulumwengu.

¹⁰Ila yahatembela ikilo kokiikwala, kwavija kabule mulangaza.”

¹¹Viyamambukize kulonga gano, kawalongela, “Mbwiga wetu Lazalo kawasa, ila nochola nikamulamuse.”

¹²Wanahina zake wamulongela, “Mndewa, kamba kawasa, basi kohona.”

¹³Yesu kakala yalongile ifa ya Lazalo, ila wanahina zake wagiza kawasa utulo wa mazua gose.

¹⁴Avo Yesu kawalongela bila kufisa, “Lazalo kadanganhika,

¹⁵ila sama yenu mweye, nie ninogelwa ng'hani kwavija sikalile kuja, giladi mtogole. Tucholeni kumwake.”

¹⁶Tomaso, yokemigwa Ubasa, kawalongela wanahina wayage, “Tucholeni hamoja na Mkulufunzi, avo yahakomigwa tukomigwe tose!”

¹⁷Yesu viyavikile, kavika Lazalo yazikigwe mazua mane gabitile.

¹⁸Betania kikala kiwambo kikalile behi na Yelusalemu, kamba mwanza wa kilometa ndatu,

¹⁹na Wayahudi bwando weza kumulola Mata na Maliamu kuwahani avija lumbu jao viyadanganhike.

²⁰Mata viyahulike kamba Yesu kokwiza, kalawa hanze yam'bokele, ila Maliamu kasigala mng'anda.

²¹Mata kamulongela Yesu, “Mndewa, kamba uhakalile baha, lumbu jangu sambiyadanganhike.

²²Ila nivitanga kamba hata lelo Mulungu kokugwelela chochose chondaumpule.”

²³Yesu kamulongela, “Lumbu jako kozuka.”

²⁴Kamwidika, kalonga, “Nivitanga kamba kozuka mdizua da ikimambukizo.”

²⁵Yesu kamulongela, “Nie iyo mzuso na ugima. Awo wonitogola, hata kamba wahadanganhika, wowa wagima kabili.

²⁶Na awo wose wali na ugima na kunitogola nie hawadanganhika. Kozitogola mbuli zino?”

²⁷Kamulongela, “Ona, Mndewa, notogola kamba gweye iyo Kilisto, Mwana wa Mulungu, ayo yokwiza muulumwengu.”

²⁸Mata viyeshile kulonga gano, kabweleganya mng'anda kachola kumkema lumbu jake Maliamu, kamnyong'onyela, “Mkulufunzi kabaha avo kokulonda.”

²⁹Maliamu viyahulike gano, kenuka hima kalawa hanze kachola ha Yesu.

³⁰Yesu kakala hanavika hakiwambo, ila kakala haja hawaiting'hane na Mata.

³¹Wayahudi wakalile na Maliamu mng'anda womuhembekeza, viwamonile yogundumuka yolawa hanze, wamkweleleza. Wagiza kakala yochola kudipanga kulila.

³²Maliamu viyavikile haja hayakalile Yesu, viyamonile, kagwa ha magulu gake, kalonga, “Mndewa, kamba uhakalile baha, lumbu jangu sambiyadanganhike!”

³³Yesu kamulola viyakalile yolila, abaho, kawalola waja wanhu wakalile na heyo vivija viwakalile wolila, kagaya ng'hani mmoyo na kona chuhila ng'hani.

³⁴Kawauza, “Mumzikila kwahi?” Wamulongela, “Izo ulole, Mndewa.”

³⁵Yesu kalila.

³⁶Wayahudi walonga, “Loleni viyamnogele!”

³⁷Ila wanhu wayagwe walonga, “Ayo yamtendile munhu kimbugumbugu yalole, hadahile kumtenda Lazalo sambiyadanganhike?”

³⁸Yesu kona chuhila ng'hani mwanza wa ikabili, kachola kudipanga. Dikala kamba mhango, na dibwe kulu dikigwa hamulomo.

³⁹Yesu kalonga, “Segezeni didibwe!” Mata, lumbu ja ija imunhu yadanganhike, kamulongela, “Mndewa, kuna bundo, kwavija kazikigwa mazua mane gabitile!”

⁴⁰Yesu kamulongela, “Sikulongele kamba uhatogola koyona yenzi ya Mulungu?”

⁴¹Wadisegeza didibwe. Yesu kalola uchana, kalonga, “Nokuheweza, Tata, kwavija konhegeleza nie.

⁴²Nivitanga kamba mazua gose konhegeleza, ila nolonga gano sama ya wanhu wali hano, giladi kwiza watogole kamba gweye iyo unhumile.”

⁴³Viyeshile kulonga gano, kenula dizwi yolonga, “Lazalo, lawa hanze!”

⁴⁴Ija imunhu yakalile yadanganhike kalawa hanze, kuno makono gake na magulu gake gazingilizwe na sanda, na kihanga chake kizingilizwa kitambala. Yesu kawalongela, “Mfunguleni, mmuleke yachole na zake.”

⁴⁵Wayahudi bwando wezile kumulola Maliamu wagona gaja gayatendile Yesu, na wamtogola.

⁴⁶Ila wayagwe mmwanza wao wachola ha Mafalisayo na kuwalongela gaja Yesu gayatendile.

⁴⁷Avo Mafalisayo na wakulu wa wakulu wa nhambiko waiting'hana na Ikitala Kikulu cha Isi ya Wayahudi, walonga, “Tutendeze? Loleni mizonza yose yootenda munhu ino.

⁴⁸Kamba tuhamuleka yagendelele kamba vino, wanhu wose womtogola, na Wakulu wa Loma wokwinuka na kuibananga isi yetu na Ing'anda ya Mulungu.”

⁴⁹Imwe mmwanza wao, yokemigwa Kayafa, yakalile Mkulu wa Wakulu wose wa Nhambiko mulao uja, kalonga, “Mweye mwa mipulaputi kabisa.