Juan 11:6-49

⁶mei íadɨ Lázaro ɨrárenafuena fɨdɨ́illanona, Jesús raɨre jáiñede; naɨ ménarui ie illánomo ite.

⁷Ie mei ie llófuegamacɨna daɨde: —Meine Judéamo caɨ jai, —daɨde.

⁸Jira llófuegamacɨ daɨdíaɨoɨ: —Llófueraɨma, nano cómoicana Judíuaɨ dɨno nofɨ́cɨaɨdo o fáiacadiaɨoɨ. ¿Nane meine afe dɨné jáiacadɨo? —daɨdíaɨoɨ.

⁹Jira Jesús ie tɨ́illɨrui naɨ áɨnoziñenana onóillano, íaɨoɨna onótatɨuaido daɨde: —¿Uáfueñede, naga mona doce horas ite? Come monari macáadɨ éɨcɨtaiñede. Bie énɨemo ite egáiñuana cɨode.

¹⁰Iadɨ come naɨo macáadɨ éɨcɨtaide; afémɨemo egáiñotɨnona iñédeza.

¹¹Ie mei Jesús naɨ úrite; íaɨoɨna daɨde: —Caɨ nabai Lázaro ɨnɨ́deza, mei íadɨ cazítaitɨcue, —daɨde.

¹²Jira llófuegamacɨ daɨdíaɨoɨ: —Ocuíraɨma, afémɨe ɨnɨ́adɨ ja jíllocaite, —daɨdíaɨoɨ.

¹³Mei íadɨ Jesús jɨáɨfodo daɨíacade, Lázaro tɨ́ide. Llófuegamacɨ comecɨ facade Jesús dáɨnana fia ɨ́nɨa llote.

¹⁴Jira Jesús jino uáfodo íaɨoɨna daɨde: —Lázaro ja tɨ́ide.

¹⁵Ióbidɨcue afémɨe tɨ́illanomo iñédɨcueza. Daɨí ómoɨmona ñuera, omoɨ ɨ́ɨnollena. Mei íadɨ caɨ éroizaillɨ, —daɨde.

¹⁶Iemo Tomás, Guarámɨe maméidɨmɨe, jɨáɨe llófuegamacɨna daɨde: —Mai caɨ jai, afémɨe dɨga dáanomo caɨ tɨ́illeza, —daɨde.

¹⁷Jesús dúcɨillano como fɨdɨde Lázaro ja cuatro dɨ́garui énɨe anamo ite.

¹⁸Betania ɨere Jerusalén áɨnori ite, mena kilómetro átuedo izói.

¹⁹Aillo judíuaɨ jáidɨmacɨ Marta María dɨga uáiduaidiaɨoɨ, íaɨnguaɨ ɨ́io tɨ́illari. Iaɨnguaɨmo fɨ́raɨbitiaɨoɨ.

²⁰Marta Jesús dúcɨana fɨdɨ́illano afémɨena jino cɨóizaide. Mei íadɨ María jofomo fɨébide.

²¹Marta Jesúna daɨde: —Ocuíraɨma, o nɨbaɨ benó itɨ́oniadɨ cue ɨ́io tɨ́iñede.

²²Mei íadɨ onódɨcue naga raa Juzíñamuimona o jɨcáadɨ afémɨe omo iite, —daɨde.

²³Jira Jesús daɨde: —O ɨ́io meine cáaite.

²⁴Iemo Marta daɨde: —Jɨɨ, cue onódɨcueza tɨ́idɨno cáadɨnona illɨ́ruimo, énɨe íiraɨruimo afémɨe meine cáaite, —daɨde.

²⁵Jira Jesús daɨde: —Cue tɨ́idɨno meine abɨdo náidataraɨmadɨcue; cáadɨnona abɨdo itátaraɨmadɨcue. Cuena ɨ́ɨnotɨmɨe ie tɨ́iadɨ meine cáaite.

²⁶Nana naɨ cáadɨno cuena ɨ́ɨnoiadɨ jaca nɨnomo tɨ́iñeitiaɨoɨ. ¿O afefue ɨ́ɨnotɨo? —daɨde.

²⁷Jira afengo daɨde: —Jɨɨ, Ocuíraɨma, o Crístodɨo ɨ́ɨnotɨcue. Juzíñamui Jitó ana énɨemo bitɨ́mɨedɨoza. Afena ɨ́ɨnotɨcue, —daɨde.

²⁸Daɨí dáɨna méifodo, Marta ie ebuño María uáiduaide. Báinino aféngona daɨde: —Llófueraɨma benó ite. O jɨ́ɨritade, —daɨde.

²⁹Afena cacáillano María raɨre náidacaillano Jesumo eróizaide.

³⁰Naɨ Jesús afe jófuemo jofo jáiñede. Marta ie baizájillanomo naɨ ite.

³¹Jofo ite judíuaɨ afengo fɨ́raidiaɨoɨ. Afengo náidacaillano, raɨre jino jáillana judíuaɨ cɨ́oillano, aféngodo jáidiaɨoɨ. Afémacɨ comecɨ facádiaɨoɨ, afengo raɨafo dɨnomo éeiaide.

³²Ie mei María Jesús illánomo dúcɨde. Dúcɨano afémɨe eɨba abɨmo caiñɨ́cɨdo dújuillano daɨde: —Ocuíraɨma, o nɨbaɨ benó itɨ́onia cue ɨ́io tɨ́iñede, —daɨde.

³³Jesús María éeiana, naa aféngodo bitɨno judíuaɨri éeiana cɨode. Cɨ́uano afémɨe ɨere zúureficaide. Ie comecɨ docaide.

³⁴Jira jɨcánote: —¿Nɨnomo omoɨ raɨga? Jira daɨdíaɨoɨ: —Ocuíraɨma, eróizaɨbi, —daɨdíaɨoɨ.

³⁵Jesús eede.

³⁶Jira mei judíuaɨ daɨdíaɨoɨ: —¡Ero, nɨɨ afémɨena izíruilla! —daɨdíaɨoɨ.

³⁷Iadɨ afémacɨmona dámɨe daɨde: —Bímɨe uina cɨ́oiñedɨmɨena meine cɨ́oitaraɨma. ¿Naɨ afémɨemo iñede rɨ́ino Lázaro tɨ́itañeillena? —daɨde.

³⁸Jesús comecɨ meine ɨere docaide. Raɨáfomo áɨnozide. Raɨafo idu ana ifo. Ie jofo jáirano daa nofɨ́cɨna ɨbaica.

³⁹Jira Jesús daɨde: —Nofɨcɨ oni ono, —daɨde. Tɨ́idɨmɨe mirɨngo, Marta daɨde: —Ocuíraɨma, jae ɨáɨre jallede. Ráɨamona cuatro dɨ́garui íteza, —daɨde.

⁴⁰Jira Jesús daɨde: —¿Naui ona daɨíñedɨcue, o ɨ́ɨnoiadɨ Juzíñamui ebírenafuena cɨ́oitɨo? —daɨde.

⁴¹Iemona nofɨcɨ oni otíaɨoɨ. Ie mei Jesús monamo érocaillano daɨde: —Moo Juzíñamui, ɨere fɨgora cuemo cacáreifɨredɨo.

⁴²Onódɨcueza cuemo jaca cacáreidɨo. Mei íadɨ daɨɨ́ daɨdɨcue benó ite comɨnɨ ñúeillena, daje izói bimacɨ o cue óriana ɨ́ɨnollena, —daɨde.

⁴³Daɨí daɨna méifodo jɨ́ɨrite: —¡Lázaro, dɨnómona jino bi! —daɨde.

⁴⁴Tɨ́idɨmɨe jino bite; ua onoɨ ɨdaɨ dɨga ferɨ́noraroido maɨáno jino bite. Uiéco ɨníroina ɨbaica dɨga bite. Jira Jesús íaɨoɨna daɨde: —Zuita, zuítanona ie ore, —daɨde.

⁴⁵Afedo aillo judíuaɨmona Jesuna ɨ́ɨnotiaɨoɨ. Afémacɨ, María ɨ́coɨnia bitɨno, Jesús fɨnócafuena cɨódɨmacɨ.

⁴⁶Mei íadɨ afémacɨmona dáamɨerie fariséuaɨmo úrizaide. Ua Jesús fɨnócafuiaɨ íaɨoɨmo lluájide.

⁴⁷Iemona fariséuaɨ, lletáriraɨnɨ illaɨnɨ dɨga gaɨrídiaɨoɨ naa caifóidɨllaɨnɨri. Daɨdíaɨoɨ: —¿Nɨe izói ñéitɨcaɨ? Bie ɨima aillo cɨ́ofɨnina onótalle raana fɨnode.

⁴⁸Fia daɨí íena caɨ fáɨcanocaiadɨ nana íena ɨ́ɨnoitiaɨoɨ. Iemona romano rɨ́imacɨ caɨ gaɨríraco táɨnocaitaitiaɨoɨ naa caɨ náɨraɨri, —daɨdíaɨoɨ.

⁴⁹Dáamɨe íaɨoɨmona Caifás mámecɨredɨmɨe. Afémɨe afe fɨmónamo lletáriraɨnɨ illaɨma. Afémɨe íaɨoɨna daɨde: —Omoɨ mɨnɨ́cana onóñedɨomoɨ.