Jeremia 20

1

2

6

7

9

14

15

18

19

20

23

26

31

36

37

38

52

¹Ma Imer latu dabuŋwaga Pasur, taŋ kêtu Apômtaunê andu ŋagejobsêga naŋ, gêŋô biŋ, taŋ Jeremia geoc lasê naŋ.

²Go Pasur gêjac propete Jeremia ma kêkapiŋ eŋ akaiŋ tôŋ ŋa ka, taŋ sêmasaŋ gêc Apômtaunê andu ŋasacgêdô gêmu kêpiŋa, taŋ sêsam gebe Benjaminnê Katam naŋ ŋagala.

³Ŋageleŋ Pasur kêkôc Jeremia su aŋga ka ma Jeremia kêsôm gêdêŋ eŋ gebe “Apômtau kêsam aômnêm ŋaê Pasur atom, gê nêm ŋaê gebe ‘Gêŋ-kêtakê-lauŋa-kêpi-makeŋ-makeŋ.’

⁴Gebe Apômtau kêsôm biŋ tonec gebe ‘Ôlic acgom, aê jakêŋ aôm ôtu taôm to nêm lau nêŋ gêŋ êtakê amacŋa. Nem launêŋ ŋacjo oc sênac êsêac ŋa siŋ êndu ma aôm taôm oc ôlic ŋa matamanô. Ma aê jakêŋ lau Juda samob sêsêp kiŋ Babelŋa lêma. Eŋ oc êwê êsêac sêŋgôŋ kapoacwalô aŋga Babel ma ênac êsêac ŋa siŋ.

⁵Ma teŋ êwiŋ gebe jakêŋ malac tau ŋakanom samob to waba samob, taŋ sêjac sa naŋ, ma nêŋ awamata samob to Judanêŋ kiŋ nêŋ gêlôŋ samob êsêp ŋacjo lemeŋ. Êsêac oc sêjaŋgo su ma sêkôc gêŋ tau sêna Babel.

⁶Ma aôm, Pasur, to nêm gôlôac samob oc aŋgôŋ kapoacwalô. Oc ana Babel ma amac êndu aŋga tônê ma sênsuŋ aôm to nêm lau samob, taŋ goc biŋ keso lasê gêdêŋ êsêac naŋ, anêc tônê.’”

⁷O Apômtau, aôm kôtim aê ma aê kakêŋ gêwiŋ nêm biŋ ŋalêsi. Aôm ŋajaŋa kôlêlêc aê su ma kôku aê tulu. Lau samob sêômac aê ma sêsu aê susu ŋapaŋ.

⁸Kêtôm têm aê kasôm biŋŋa samob aê kataŋ to gamôêc gebe “Ojae, ŋaclai sec geseŋ aê ŋawaô.” O Apômtau, êsêac sêmajec aê ma têtaŋ pêlê aê ŋapaŋ gebe aê kasôm nêm jaeŋ lasê.

⁹Mago embe jasôm gebe “Aê gabe jaliŋ Apômtau siŋ ma jasôm biŋ janam eŋ laŋô êtiam atom,” mago nêm jaeŋ kêlakoc aê amboac ja aŋga ŋoc ŋalêlôm. Aê tekoc gêbac gebe jakôc gêŋ tau tôŋ ma katôm gebe jaŋgamiŋ biŋ tau atomanô.

¹⁰Aê gaŋô lau samob sêjac biŋ kesec-kesec gebe “Ŋaclai sec kêpi makeŋ-makeŋ. Amboac taŋ daoc eŋ lasê êndêŋ gôliŋwaga.” Aê tauc ŋoc lau sêsaê gebe jana tauc êndu. Êsêac sêsôm gebe “Tasau eŋmaŋ, go moae takôc eŋ tôŋ ma takac kamocgôc.”

¹¹Mago aôm, Apômtau, gêmoa gôwiŋ aê toŋajaŋa ma ŋaclai amboac tonaŋ êsêac, taŋ sêlêsu aê naŋ, oc sêgôm elêmê. Êsêac oc sêŋgôm nêŋ biŋ ŋanô êsa atom, tec majeŋ êsa endeŋ tôŋgeŋ. Ma lau sêliŋ biŋ majeŋŋa siŋ atomanô.

¹²Mago lausiŋ undambêŋa nêŋ Apômtau, aôm kôsaê lau jagêdêŋ. Aôm kôjala gêŋ, taŋ gêc êsêacnêŋ ŋalêlôm to kauc. Amboac tonaŋ ôkêŋ aê jalic aôm ôkêŋ ŋagêjô êndêŋ ŋoc ŋacjo gebe aê kakêŋ ŋoc gêŋ samob kêsêp aôm lêmam.

¹³Anam wê êndêŋ Apômtau. Alanem Apômtau. Eŋ gêjam lau, taŋ sêôc gêŋwapac naŋ, kêsi aŋga lau alôb-alôb nêŋ ŋaclai.

¹⁴Apuc boa bêc, taŋ tinoc kêkôc aê naŋmaŋ. Aliŋ bêc, taŋ tinoc kêkêŋ aê kasa gamêŋ naŋ siŋ.

¹⁵Apuc boa ŋac, taŋ gêgôm tamoc têtac ŋajam kêsa gêdêŋ taŋ eŋ kêkêŋ ŋawae tonec gêdêŋ eŋ gebe “Ŋapalê ŋac. Aôm kôtap latôm teŋ sa” naŋ.

¹⁶Ŋac tau tonaŋ êtôm malac, taŋ Apômtau geseŋ su ma taê walô atom naŋmaŋ. Eŋ êŋô sênac wali êndêŋ bêbêcgeŋ ma siŋ ŋakicsêa êndêŋ ocsalô.

¹⁷Gebe eŋ gêjac aê êndu gêdêŋ katu awê atomgeŋ naŋ atom. Embe êŋgôm amboac tonaŋ, go tinoc têtaclêlôm êtu ŋoc sêô.

¹⁸Tinoc kêkôc aê o wageŋ. Eŋ kêkôc aê gebe ŋandaŋ to gêŋwapac êtap aê sa ma jamac êndu tomajocgeŋ me.