Jeremia 18

1

2

6

7

9

14

15

18

19

20

23

26

31

36

37

38

52

¹Biŋ taŋ Apômtau kêsôm gedeŋ Jeremia naŋ, tonec gebe

²“Ôndi, ôsêp ŋac-kêpac-kuwaga nê andu ôna. Aê gabe jasôm biŋ êndêŋ aôm ôŋô aŋga tônê.”

³Tec aê kasêp ŋac-kêpac-kuwaga nê andu gaja ma ŋac tau gêjac ku gêmoa.

⁴Ma ku, taŋ eŋ gêjac ŋa nom naŋ, kêtu sec aŋga eŋ lêma, tec eŋ gêjam nomku tau ôkwi kêtu ku wakuc teŋ kêtôm lau-sêpac-kuwaga nêŋ mêtê.

⁵Ma Apômtaunê biŋ gêdêŋ aê gebe

⁶“O gôlôac Israel, aê katôm gebe jaŋgôm amac êtôm ŋac-kêpac-kuwaga gêgôm nomku atom me.” Apômtau kêsôm gebe “O gôlôac Israel, alic acgom, amac asêp aê lemoc kêtôm nomku kêsêp ŋac-kêpac-kuwaga lêma.

⁷Êndêŋ ŋasawa teŋ oc jasôm êtu tôŋ êpi lau-m teŋ me gamêŋ kiŋŋa teŋ, gebe jambuc êsêac sa to jakôniŋ êsêac ma janseŋ êsêac su.

⁸Mago lau, taŋ kasôm biŋ kêpi naŋ, embe sêkac tauŋ su aŋga sec, go aê janam gêŋ sec, taŋ gabe jaŋgôm êndêŋ êsêac naŋ ôkwi.

⁹Ma êndêŋ ŋasawa teŋ aê jasôm êtu tôŋ êpi lau-m teŋ me gamêŋ kiŋŋa teŋ gebe jakwê sa to jasê.

¹⁰Mago êsêac embe sêŋgôm sec ênêc aê laŋôcnêmŋa ma sêkêŋ taŋeŋ aê aoc atom, go aê janam gêŋ ŋajam, taŋ gabe jaŋgôm êndêŋ êsêac naŋ ôkwi.

¹¹Amboac tonaŋ tec ôsôm êndêŋ lau Juda to êndêŋ êsêac, taŋ sêŋgôŋ Jerusalem naŋ, gebe ‘Apômtau kêsôm biŋ tonec gebe Alic acgom, aê kamasaŋ lêŋ gêŋwapac enseŋ amac suŋa ma taêc gêjam lêŋ janac amacŋa. Amboac tonaŋ amac samob anam taôm ôkwi aŋga nêm lêŋ sec to amêtôc nêm lêŋ to nêm kôm êtu solop acgom.’

¹²“Mago êsêac oc sêsôm gebe ‘Biŋ tonaŋ ŋanô masi. Aêac oc andaŋguc tauŋ ma têntac gêwiŋ ma aêac samob oc aŋgôm biŋ, taŋ ma ŋalêlôm ŋadani êkac aêacŋa naŋ, ŋanô êsa.’”

¹³Kêtu tonaŋŋa Apômtau kêsôm biŋ tonec gebe “Atu kênac tenteŋlatu, êsêac oc sêŋô biŋ amboac tonaŋ me masi. Awêtakiŋ Israel gêgôm gêŋ secsêga teŋ.

¹⁴Lebanon ŋasno oc êwê e ênaŋa aŋga poctêna Sirion me. Me bu lôcŋa, taŋ keseleŋ toŋalucgeŋ naŋ, oc êpa me.

¹⁵Mago ŋoc lau sêliŋ aê siŋ. Êsêac sêkêŋ da ŋamalu gêdêŋ anôtô dansaŋ. Êsêac sêôc seso aŋga nêŋ intêna, taŋ gêmuŋgeŋ sêjam naŋ, ma sêsa intêna ŋamagêŋa, sêsa intênasêga atom.

¹⁶Êsêac oc sêŋgôm nêŋ gamêŋ êtu gasaŋ ma lau sêsu susu endeŋ tôŋgeŋ. Ma lau samob, taŋ sêwê sêna sêmêŋ naŋ têtakê ma têdaiŋ gêsuŋ.

¹⁷Aê janseŋ êsêac êliŋ-êliŋ aŋga ŋacjo laŋôŋnêmŋa amboac mu kelelo ka ŋalauŋ êliŋ-êliŋ. Êndêŋ têm gêŋwapacŋa naŋ, aê oc jatôc laŋôcanô êndêŋ êsêac atom, jambuc dêmôêc êsêac.”

¹⁸Go êsêac sêsôm gebe “Ajôc, takic Jeremianê biŋmaŋ gebe eŋ embe êmoa atom, mago dabuŋwaga oc êpô lêna biŋsu atom ma ŋac tokauc êpô lêna biŋ ênam lau saŋa atom ma propete êpô lêna biŋ eoc lasêŋa atom. Ajôc, takêŋ taŋeŋ ênê biŋ samob ŋapepgeŋ gebe tanac lakô eŋ ŋa tau nê biŋ.”

¹⁹O Apômtau ôkêŋ taŋam aê ma ôŋô ŋoc taŋiboa.

²⁰Sec êjô ŋajam oc êtôm me. Êsêac sêkwê sê kêtu aêŋa. Taêm ênam gebe kakô aôm laŋômnêmŋa gebe jasôm biŋ ŋajam êndêŋ aôm êtu êsêacŋa gebe janam aôm têmtac ŋandaŋ ôkwi aŋga êsêacnêŋ.

²¹Amboac tonaŋ ôkêŋ nêŋ gôlôac ŋasec-ŋasec sêôc tôbôm. Ôkêŋ êsêac sêndêŋ siŋ ŋaŋaclai. Ôkêŋ nêŋ lauo têtu lauo kapoac to awêtuc ma nêŋ ŋacwaga têtap gêmac sec sa e sêmac êndu. Ma nêŋ lau matac sênac siŋ e siŋ enseŋ êsêac su.

²²Êndêŋ taŋ aôm ôsakiŋ kêjaŋgowaga têtap êsêac sa sep tageŋ naŋ, taŋiboa êpi aŋga nêŋ andu samob. Gebe êsêac sêkwê sê gebe aê jasêp ma sêwa lakô gebe ênac aê.

²³O Apômtau, mago aôm kôjala nêŋ biŋ samob, taŋ sêkic kêtu aêŋa naŋ. Ôsuc êsêacnêŋ keso ôkwi atom to ômbuŋ êsêacnêŋ sec su aŋga laŋômnêmŋa atom. Ôkêŋ nêŋ ŋacjo sêku êsêac tulu sênêc aôm laŋômnêmŋa. Sêndac aôm êndêŋ têm têmtac ŋandaŋŋa.