Annabi Yeremi 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Sɛrɛxɛdubɛ Pasura, Imeri xa di, naxan findixi hɔrɔmɔbanxi yarerati ra, a to Annabi Yeremi xa kawandi mɛ,

²a naxa a suxu, a a bɔnbɔ, a a sa kutunyi ra hɔrɔmɔbanxi sɛɛti ma Bunyamin sode dɛ ra.

³Kuye to iba, Pasura naxa a ramini, kɔnɔ Annabi Yeremi naxa a yaabi, «Alatala bara i xili masara. A mu falama sɔnɔn Pasura, a falama nɛ fa ‹Magori Misabiba,› ‹Ɲaxankatɛ yire.›

⁴Alatala naxa a masen, ‹N gaaxui luma nɛ i tan nun i booree bɔɲɛ ma. I yaxuie i booree faxama nɛ santidɛgɛma ra i ya xɔri. N Yudaya bɔxi fan sama nɛ Babilɔn mangɛ bɛlɛxɛ, a e bɔnbɔ santidɛgɛma ra, a fa e xanin Babilɔn.

⁵Harige nun naafuli naxan birin na yi taa kui, a nun naxan na Yudaya mangɛe yi ra, n na birin soma nɛ wo yaxuie yi ra yi gere kui, e xa a xanin Babilɔn.

⁶I tan Pasura, nun i xa mixie, wo fan sigama nɛ konyiya kui Babilɔn bɔxi ma. I faxama mɛnni nɛ, i ragata naa, i tan nun i booree i naxee kawandixi wule ra.›»

⁷«Alatala, i bara n natantan, n fan bara n yɛtɛ lu na tantanyi kui. I bara n suxu, i bara nɔ n na. Lɔxɔɛ yo lɔxɔɛ e n maberema, e birin yoma n ma.

⁸N ma masenyi birin findima ɲaxankatɛ nun gbaloe nan na. N na Alatala xa masenyi ti, ɲama birin yo n ma.

⁹Xa n na a fala, ‹N mu a xa fe kawandima sɔnɔn, n mu wɔyɛnma a xili ra sɔnɔn,› Alatala xa masenyi luma nɛ alɔ tɛ n bɔɲɛ kui. N mu nɔma na tɛ raxubende, fo n xa Alatala xa masenyi ti.

¹⁰N bara tɔɔɲɛgɛ gbegbe mɛ. Xa n a fala, ‹Gbaloe na fafe,› mixi ndee a fala, ‹Won xa a masen mangasanyi bɛ.› N booree birin na n matofe, alako e xa n suxu tantanyi kui. E a falama, ‹Tɛmunde won nɔma nɛ a suxude gantanyi ra, won xa nɔ a ra, won xa won gbeɲɔxɔ a ma.›

¹¹Kɔnɔ Alatala Sɛnbɛma na n sɛɛti ma. N yaxuie fama nɛ birade, e mu nɔma n na. Na findima nɛ yaagi ra e bɛ, e xaxili ifu.

¹²Mangɛ Alatala tinxintɔɛe kolon, a e bɔɲɛ nun e sondonyi matoma. N a kolon Alatala fama nɛ n gbeɲɔxɔde e ma, n xaxili tixi a tan nan na.

¹³Wo Alatala matɔxɔ, wo bɛɛti ba a bɛ, barima a setaree rakisima nɛ e yaxuie bɛlɛxɛ.

¹⁴N bari lɔxɔɛ dankaxi. N nga n barixi lɔxɔɛ naxɛ, lɔxɔɛ fanyi mu a ra.

¹⁵Xɛɛra naxan n bari fe fala n baba bɛ, mixi dankaxi nan nu a ra. N baba nu bara sɛɛwa na xibaaru ra,

¹⁶kɔnɔ na xɛɛra xa lu alɔ yi taae, Alatala naxee halakixi kinikinitareɲa kui. A xa e gbelegbele xui mɛ gɛɛsɛgɛ nun yanyi ra.

¹⁷A nu lan nɛ a xa n faxa n nga tɛɛgɛ, n xa ragata mɛnni abadan.

¹⁸Munfe ra n fa minixi duniɲa ma, n xa yi tɔɔrɛ nun yi fe xɔnɛ sɔtɔ, n ma duniɲɛigiri xa findi yaagi ra n bɛ?»