5“Ne bola debama ema Ierusalem maurawa uduudu otamope me emalawoa apanawa wanamopa ita mo otamopue tawou Babilon bedewe antopu. Ne puraiwa malesau debamau ita do dima e nolawaitene pokaleno otamolana, do Iuda warereu nitubu uwatauwa uduudu wanamopo otamopue antopu.”
7“O Iawe God e laganee nuana teineano, ita ne e sumanaianten. E ipa mukamukauaida, ita ne ipa oauara, sa baiwa e ne aineana. Walama uduudu apana ne wasina wai, mo inseia ne ipa apana diapana koakoa.
8Ne apana mampo gagalontedina walamawe diamodine wadinase, ‘E emalawoala apanawa ando onala enapue kadilepu!’ Sa ipa e ne dima dianeiana rua diamodina, sa baiwa mo kainokaino ne wawuneie wakadisanei.
9Walama isiwa ne neba wadinase, ‘Tauma ne mai osowe Iawe God gagalowa wapa, dia, me gagalowa da mai moanawo nosepi, kakai.’ Tane e aiaa bedenawo winedie, ia debama idia rua idie iidanede! Ne menanedia e aiaa anatepo bedenawo winakasalepi, tane mai epe dewasapa rua, dia.
10Apana ne etamodino kutunneie ebona sainapesaie waiase, ‘Apana Saidaleidie Wande.’ Mo ne dianeie waiase, ‘E epe gagaloitiana baiwa no uwambantoia apanawa diamoto etapu.’ Ne sosonaida do kadiwa da dewasapo ewapua baiwa iwuneie waimoi. Mo waiase, ‘No lagasato aia da wapikadisapio wadataitue gagalowa sipoa ituaisisate matangelasata.”
11Tane Iawe God e ne tainawoido ona apanawa badowa rua eneiana, sa baiwa ne emalawoana uduudu nanaumopa, ita mo mai nanauneapue aineapu, dia. Mo oauarantopue ita malaidantopu, ita apana mo malau sa mai nuau awawalepi, dia.
12O Iawe God Mukamukaua, apana dodomanau eubu e emaawo waimoia mo dewau e rubusaie eweiana, e apana insaisau ita dima menamodia deaitopa ewamoie ateitiana. Ne saina ema uduudu e manawosadina, sa baiwa ne emalawoana apanawa e matangelamowo ewapaa menanede!”
13E sasaitane Iawe God wadaposisana! Kadi dewalala apana nuaparelala osouwo sai itui, tane Iawe God apana nuaparelala sa, mo mukau atowe waimoia otaubamodie inamode.
