Jenesis-Agafa 47

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Anante Josefe vuno amanage huno Ferona asmi'ne, Nfa'ni'ane, nafuhe'zane maka sipisipi zamine, Bulimaka zamine, maka zazmine Kenani mopa atre'za Goseni mopare emani'naze.

²Afuhe'impinti 5fu'a vahe zamareno Fero avure vu'ne.

³Fero ana afuhe'mokizmi zamantahige'ne, Nankna eri'za eneriza nagare? Hige'za Feronku asamiza, tagrane nerfa zane, tagehe'zanena eri'za naga kamota afu kva nagare hu'naze.

⁴Feronku anage hu'naze, Osi'a gna ama mopare maninaku tagra e'none. Eri'za vahekamokizmi afumofo ne'zana, trazana omnegeno aga'zamo Kenani mopare forehigu, menina muse (plis) hugantonanki eri'za vahe ka'a tatregeta Goseni mopare mani mneno hu'naze.

⁵Anante Fero'a Josefe asmine, Negfa ene, kafuhe'zanena kagritega e'naze.

⁶Isipi mopamo'a, kagri kvafi mane'ne, negfane, kafuhe'inena knare huno tre tre hu'nenia mopa zamige'za Goseni maniho, kegeno anampima knare vahema mani'nesiana huge'za nagri bulimaka kva hiho.

⁷Anage higeno Josefe'a nfa'a mofo avreno Feronte egeno, Jekopu Ferona asomu hunte'ne.

⁸Fero'a nama'a zgekfu hu'nane huno Jekopuna antahige'ne?

⁹Higeno Jekopu'a Feronku anage hu'ne, Ama menima upsa knama mani'noana, 130'a zgegfu hu'noe, kna navenesige'na osi'a kna mani'noe. Hagi nafahe'za maniza e'naza knafina, nagtere'za zaza kna mani'naze.

¹⁰Jekopu'a, Fero asomu hunenteno atreno vu'ne.

¹¹Higeno, Josefe nfa'a mofone, afuhe'ine zamavreno Isipi mopama knare huno tre tre hu'nerega, Rameses kaziga Fero'ma hu'nere, regori zamige'za mani'naze.

¹²Josefe'a nefane, afuhe'ine, nefa nompima nemniza vahe'ene, osi mofavre naga'enena, nezana mani'naza avamente zamine.

¹³Hianagi mika mopafina nezana omnetfa hu'ne, aga'zamo'a tusiza higeno Isipi mopafine, Kenani mopare'enena himamu hankavea omne'ne na'ankure, tusi'a zgereno mikaza tefnane hu'ne.

¹⁴Josefe hakare zgoma Isipi mopareti'ene Kenani mopareti'ma nezama eme miza'saza zgoa eritru huteno, Josefe'a erino Fero nompi ana mika zgoa ome ante'ne.

¹⁵Zgo zamima mika atre'za eri hnama Isipi mopare'ene Kenani moparema nehu'za, hakare'a Isipi vahe'mo'za Josefente e'za, Nezana tamio, nahnigeta kagri kavurera frigahune? Zgotia hago atreta erihna hu'none huza hu'naze.

¹⁶Anante Josefe anage hu'ne, zgo tamima omnea nona'a, afu'zgatmi eme naminkena afu tamimofo nona huna nezana refko hurami'neno.

¹⁷Hige'za afu zgazmia avre'za Josefente ageno, hosima, Sipisipima, memeki'ma bulimakaoma, donki afu'zgare nona huno Josefe'a nezana nezmino, nezanteti kegva ana zge kfufina huzmante'ne.

¹⁸Ana kafu vgarege'za mago zgegfure Josefente ete e'za, anage hu'naze, rantimoka kavurera fra okigahune zgotia mika hago atreta rantimoka eri'hnahune, hagi mika afurmina rantimofo suzane. Mago'zana omne'tfahie, hanki rantimoka tavufane, mopatine asi'zanke me'ne.

¹⁹Nahanigeta kagri kavufina tagrane mopati'nena frigahune? Tagri'ene mopatinena nezante miza hugeta, hagi tagrane mopatinena Feronte kazo kzo eri'za erinta mneno. Nehunka avimza tamigeta tagra ofrita mani'nesunkeno ama mopamo'a, trankino megusa avu'avara osino.

²⁰Higeno Josefe mika Isipi mopa nezanteti mizaseno Fero ami'ne, mika Isipi vahe'mo'za mopa zamia ne'zante atretere hu'naze, e'i zamagazamo'a zamazeri havizantfa hige'za atrageno, ana mika mopamo'a Fero mopa sevare'ne.

²¹Hagi Josefe'a, ana mika vahe tmina kazokzo vahere huno, Isipi mopamofo ruga raga atupa'regati zamareno, ranra kumatmimpi ome zamante'ne.

²²Hianagi mono kva vahe'mokizmi mopa miza ose'ne, Fero'a havi mono kva vahera ne'zana zamige'za nene'za mopa'zmia zgorera otre'naze.

²³Josefe amanage huno maka vea zamasmi'ne, Keho, hago menina tmagri'ene mopatmi'nena Fero mizasemi'noe. Menina, avimza timia ama'ne, hagi tamagra hoza eritma hankregahaze.

²⁴Hagi ne'za hanti knarera 5fu'a ko'nama anaki'nutma mago ko'na Fero amigahaze. 4'a ko'na, hozafi avi krisaza zane, ne'zama nontamifi naga'ene ne'onse mofavremokizmi ne'za tamagra erigahaze.

²⁵Hige'za anage hu'naze, Kagra knare hurantanketa ofrita mani'none! Knare agampu ra'nimofo avurera hiankita, Fero kazo kzo eri'za vahe manigahune.

²⁶Anage hzageno, Josefe Isipi mopamofo tra kea ante'ne, ana knareti eno menima e'neana ananke avaririsageno Fero mago kona erigahie. Havi mono kvamokizmi mopamo Fero zana omne'ne.

²⁷Menina, Israeli vahe'mo'za Isipi mopare, Goseni agu'afi mani'ne'za, mika zana erisanti nehare'za, rama'a vahe fore hu'naze.

²⁸Jekopu Isipi moparera 17ni'a zgegfu mani'ne. Jekopuma mani'noma e'nea zgegfu'a ana maka'a 147ni'a zgegfu hu'ne.

²⁹Israeli (Jekopu) frisnia knamo atupa nehigeno, mofavre'a Josefe ke huno asmi'ne, Muse (plis) hugantoanki kagrama nagrikuma kave'ma sinante'nunka, menina kzana fenka namopi antenka musezana hunaverinka tmage hunka huo, muse (plis) hugantoanki Isipia ase onantegahane.

³⁰Hianagi nagrama frisnugenka, kagra Isipitira erinka vunka, vahe'niama asema nezmantafi ome asenanto, higeno, kema hanaza hugahue huno Josefe hu'ne.

³¹Agra anage hu'ne, tamage hu'na hugahue hanunka, huvempa huo higeno, tamage hu'na ana hugahue huno Josefe'a asmi'ne. Anante Israeli'a (Jekopu) kepri huno sipare mani'neno mono hu'ne.