Jenesis-Agafa 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Iso'a 400ti'a vahe'ane ne-egeno, Jekopu'a kesga huno negeno mofavre naga'a refko huzmantege'za, nezmarera Leaki, Resoliki, tare eri'za a'tre zamuga otitere hu'naze.

²Ana huteno eri'za a' trema'ane mofavre zinine huzmantege'za vugota hu'za vu'naze. Anantera Lea ene mofavre naga'ane vzageno, hanki Resoli ene Josefekea henka vu'na'e.

³Hianagi Jekopu'a agra vugoteno vugofa nehuno 7ni'a zupa rena ome reno mopafi kepri huteno, vuno nefu tva'onte uhnati'ne.

⁴E'ina higeno Iso'a negeno agareno eno Jekopuna azante eme azerino agazafeno, azana anankempi rugagino agazafeno antako hunentege'ne, zavi otente atente hu'na'e.

⁵Kesga huno ana a'nene mofavre ramine nezmageno, Zamagra iza'za kagranena neaze? Huno antahigegeno, Jekopu amanage hu'ne, Anumzamo agampu hunanteno eri'za vahekamo'na nami'nea mofavre ramine, huno asmi'ne.

⁶Jekopu eri'za a' trene, mofavre zinine vu'za Iso agiafi ome zamarena re'za mopafi kepri hu'naze.

⁷Anante Lea'ene mofavre naga'ane ne-eza anazanke hu'za Iso agiafi zamarena eme re'za mopafi kepri hzageno, Josefe ene Resolike henka'a, anazanke hu'ne mopafi eme kepri hu'na'e.

⁸Ana hutageno Iso'a amanage hu'ne. Esera afu'zga avre'za e'naza vahe zamage'noana, nahigenka huzmantanke'za e'naze? Higeno Jekopu'a amanage hu'ne, Kagri ranimoka, kazeri muse hunaku e'inara hu'noe.

⁹Hianagi Iso'a nentahino amanage hu'ne. Nagna nimoka, nagra hago rama'a feno ante'noanki, kagrama erinka e'nana zanka'a kagragu erio.

¹⁰Jekopu'a amanage hu'ne. A'o, muse (plis) hugantoanki nagri'ma kagu'afinti antahi nenamisunka amama negamua musezana (gift) nazampintira erio, kvugosama koana, Anumzamofo avugosa keankna nehugenka nagrira krimpa naminka nenavrane.

¹¹Muse (plis) hugantoanki nagrama muse'zama (gift) negamuana eri'nanegu navenesie. Na'ankure Anumzamo avesi nenanteno nza huno hakare'aza nmi'negena, knare hu'nena eme negamue. E'inage huno Jekopu'a hankvetino kehigeno Iso'a eri'ne.

¹²Iso'a ana museza (gift) enerino, otinketa vamneno huno Jekopuna asmi'ne. Nagra vugotanena magoka vugahune huno zamasmi'ne.

¹³Hianagi Jekopu'a amanage huno Isona asmi'ne, ranimoka kma antahio, mofavrenimo'za hanve oti'naze, afu zgamo'za anuntage nehzagu zamega hugahue. Magoke zgefinke'ma afu kevuma harita zaza kama vanunke'za, ufrigahaze.

¹⁴E'igu muse (plis) hugantoanki kagra ranimoka eri'za nekamona natrenka vugota huo, nagra navesite akohena vugahue, afu kevu zgane, a' mofavre ni'ane kama vnaza avamente nevuta, Seiri (Idom) ranimokare uhnatigahue.

¹⁵Iso'a amanage hu'ne. Muse (plis) hugantoanki mago'a eri'za vaheni'a zamatra'nena kvega hu'za vugahaze nehigeno, Jekopu'a amanage hu'ne. Na'ante anara hugahane? Ko' ranimo'a nazeri so'e hu'ne.

¹⁶Anage higeno Iso'a netreno, ana zupage Seir (Idom) moparega ete vu'ne.

¹⁷Jekopu'a Sukoti kumatega vuno, e'i ana mopare noma'a negino, afu kevu'mokizmi none kine. E'ina hu'negu menina ana kumamofo agi'a Sukotie hu'za nehaze.

¹⁸Jekopu Padan-aramu mopa atreno ne-eno rankuma Sekemu enehnatino, Kenani mopare ra kuma'mofo fegi'a nonkuma (kemi) eme anteno mani'ne.

¹⁹E'i ana mopa miza huno seli noma ki'nea mopa Hamori amohe'impinti, Sekemu nefa mopa, anama'a 100ti'a silva zgoreti miza huno eri'ne.

²⁰Anante havere ita tro hunteteno agi'a El-Elohe-Israeli'e (Israeli Anumzane) huno antemi'ne.