Isanquienare Irocashi 1:31-77

³¹Irotaintsi poye. Coajica pintimeri pitomi, pimpajiteri Jesoshi.

³²Impincatsaritasanote. Iriojeitanaque atiri irio Itomi Tasorentsi, savicatsiri inquitequi. Tempa iriotaque Avincatsarite. Peerani yora Iravirini ipincatsariventaveitarini pijorioririnte. Iro cantaincha incanteri Tasorentsi: “Notiomi, aviro pincatsariventajeiterineri maaroni, pincantaitatiyempani”. Aitaque incanteari impincatsaritanaque, eiro yoipacaajirotsi.

³⁴Ari ocantiri: —¿Jaoca incanteari intimanteari notomi? Te intimeji nojime.

³⁵Yacanaquero: —Iro timacayempine Ishire Tasorentsi. Aisati intasoncaventaquempi Tasorentsi, savicatsiri inquitequi jenoqui. Coajica incantacojeiteri pitomi: “Icameetsatasanoti, te aneeroji irantane. Iriotaque Itomi Tasorentsi”.

³⁶Aisati noncamantempi: anteashipatasanovetaca iroori pishaninca Isavere, aisati icanteetiro shiravaro oni, iro cantaincha icarataque meeca 6 cashiri otsomontetantacari. Coajica ontimeri otomi.

³⁷Pineaquero, tecatsi pomerentsitimotearine Tasorentsi, imajeitaquero paitarica icoiri.

³⁸Ocantiri iroori: —Irioyeampa Avincatsarite. Onimotaquena paitarica icoacaaquenari: icoacaaquenarica intimashitea notomi, ari cameetsataque. Irosati ipiantanaja inampire Tasorentsi.

³⁹Pashini quitaiteri ojatanaque Maria Joreaqui. Oshintsiti ojatanaque toncaariqui.

⁴⁰Areetapaaca anta ivancoqui Sacariashi. Oneapaaquero Isavere, ocantapaaquero: —¿Ainirompi?

⁴¹Oquemantavacarori Maria ocajemapaaque, oquematiiri ishevatanaca orijani, moyec. Aisati oametasanotaquero Ishire Tasorentsi,

⁴²irosati ocajemantavacaro. Ocantiro: —Tempa ineshinoncajeitaquee Tasorentsi, aisati iquempejeitiro maaroni tsinane; iro cantaincha avinti, panaacojeitaquena: ineshinoncatasanotaquempi catsini. Tempa aisati ineacameetsatiri pirijani.

⁴³Aviro ashitearine Avincatsarite. ¿Paita piquenqueshiretantanari pineana?

⁴⁴Pamene, noquemantavaquempiri pivetsatapaaquena, iquimoshiretanaque norijani, ishevatanaca, moyec.

⁴⁵Pishiretasanotavacaro maaroni icamantaquempiri Avincatsarite, irootaque ineshinoncatantaquempiri.

⁴⁶Ocantiro Maria: —Tempa icameetsatasanotaque Avincatsarite,

⁴⁷iriotaque Atasorentsite aisati oavisacojeiteeneri coajica. Oshequi noquimoshireventaqueri.

⁴⁸¿Paita icavintsantanari narori? Nashinoncaavetaca, tecatsi niote narori. Iro cantaincha iriojeitanaque maaroni atiri noquimoshireventaqueri.

⁴⁹Oshequi itasoncacoventaquena, tempa itasorentsitasanotaque, icameetsatasanotaque.

⁵⁰Icantatiani icavintsaajeitaqueri maaroni pincatsajeitiriri.

⁵¹Oshequi itasoncantayetaque. Intsoncajeitajeri maaroni shemejeitatsiri.

⁵²Imajeitaqueri pincatsarivetachari yojocacaaqueri ipincatsariventanti. Irintiquea ashinoncaincari ipeajiri pincatsari.

⁵³Iquemacaacari tasheavetachari, aisati yaapitsatajiri ashitaarantincari maaroni timimojeivetariri.

⁵⁴Icantani Tasorentsi yamitacojeitaqueri ajorioririnte, te impeacoteeji arori icavintsaajeitaquee.

⁵⁵Aitaque imataquero maaroni icantaqueriri intacaroniri peerani: Avarama aisati maaroni ishanincani, catsini. Irootaque ocantirori Maria.

⁵⁶Ari osavicaiti mava cashiri, impoiji opianaja onampiqui.

⁵⁷Ari moncarataca otimiri Isavere otomi.

⁵⁸Iquemacojeitaquero oshanincapee, iquimoshireventaquero. Icantajeitaque: —Tempa ineshinoncatasanotaquero Avincatsarite.

⁵⁹Ari ocarataque imaacotaque 7, moncarataca intoyeantanteariri. Yamejeitaro jorio ipajitavacaa iriori, icantajeiti ishaninca: —Tempa impajitea Sacariashi, inquempetajeari iriri.

⁶⁰Iro cantaincha ocanti iriniro: —Eiro ipajitatsi Sacariashi, ainti impajitea Joa.

⁶¹Icantajeivetaro: —¿Paitaquea? Te intimeji pishaninca pajitachaneri Joa.

⁶²Ari isampijeitiri Sacariashi: —¿Paita picoiri avinti?

⁶³Ari ijicotiro paperi, isanquenajeitaqueneriri: “Aitaque, impajitea Joa”. Irosati yoajeitantanaca cavaco.

⁶⁴Imapocanaja Sacariashi ineanataji aisati, icanti: —Tempa icameetsati Tasorentsi.

⁶⁵Impoiji yoajeitanaqueri cavaco maaroni ishaninca. Iquemacojeitaqueri maaroni savicajeitatsiri toncaaripeequi: ora timatsiri Joreaqui.

⁶⁶Iquenqueshirejeitanaca maaroni quemacojeitaqueriri: “¿Jaoca icantari yora jananequi? ¿Paita iranteri coajicani? Tempa ineshinoncatasanotaqueri Avincatsarite”.

⁶⁷Impoiji Ishire Tasorentsi oametaqueri Sacariashi, icantantarori oca:

⁶⁸—Tempa icameetsatasanoti Avincatsarite, iriotaque tasoncaventajeitaqueeri. Ipocashijeitaquee iroavisacojeitajee.

⁶⁹Peerani Iravirini yantiniri Tasorentsi icoacairiri. Meeca itiancaqueri Tasorentsi ishanincani Iravirini, itasorentsitaque, yoavisacotantaque.

⁷⁰Tempa peerani icantirini Tasorentsi quenquetsatacotiriniri:

⁷¹“Nontianquempiri oavisacojeitempineri, intimerica quisajeitempineri, irojocacoventajeitaquempi.

⁷²Noncavintsaajeitaqueri ishanincani Avarama, maaroni. Eiro nopeacotajarotsi nocantajeitaqueriri.

⁷³Peerani nocantasanotaqueri Avarama:

⁷⁴‘Coajica noavisacojeiteri pishanincapee, nompiajeiteari quisajeivetearineri, impoiji eiro itsaroajeititsi inquemisantajeitena.

⁷⁵Noameetsajeiteri, noncanteani noneacameetsajeiteri’ ”. Irootaque icantaqueriri Tasorentsi peeraniniri.

⁷⁶Meeca notiomi, noncamantempi: iriojeitempi atiri aviro quenquetsatacoterine Tasorentsi jenoquiniri. Pincamantajeiteri incameetsatanaque, iraamaajeiteari Avincatsarite.

⁷⁷Poamejeiteri ashanincapee iriojeitanteari jaoca incanteari iravisacotantajeari. Pincamantajeiteri icavintsaasanojeitaqueri Tasorentsi, eiro iquenqueshiretajirotsi yantayetiri caari cameetsatatsi. Ariorica icontetapaaque catsirincaiteri, te ontsitenitanajeji, irointi oquitaitetanaji. Aisati oquempetaca, ariorica imponeaquea Avincatsarite jenoqui, ayotasanojeitanaque cameetsa asavicajeite.