IOSUA 10:11-40

¹¹Israel taudia vairadia amo ma e heau lao, Bete-horono amo ma e hekei diho; unuseni ai Iehova ese medu hetaridia badadia guba amo e hadihodia idia latadiai, ela bona Aseka; unu amo e amasedia. Medu hetarina amo e mase taudia ese Israel taudia edia dare amo e mase taudia na e hereadia.

¹²Iehova ese Israel taudia imadia amo Amoro taudia e hadareredia dinana ai, Iosua ese Iehova e noia, Israel taudia vairadiai e hereva, eto, Dina o, Gibeon daenai ba rahu tao, Oi hua danu, Aialono kourana ai!

¹³Bena dina e rahu tao, bona hua na gabuna ai e noho, ela bona Israel taudia ese inaidia amo davadia e abi. Iasara ena buka ai na ini e torea toma, ani? Dina na atai ai e rahu tao, se ḡelo, ela bona dina ta heḡereḡerena.

¹⁴Nega ta dina hata Iehova ese tau ta unu se kamonai henia toma, guna eiava murinai; badina be Iehova ese Israel edia tuan ai e tuariva.

¹⁵Bena Iosua na Israel taudia iboudiai ida e lou ela, Gilgal taruhana e lou henia.

¹⁶Unu hanua pavapavadia laimaosi na e heau, Makeda kohuana ai e komu.

¹⁷Bena haida ese Iosua e hamaoroa, eto, Hari pavapava laimaosi vada e davaridia, Makeda kohuana ai e komumu.

¹⁸Bena Iosua eto, Nadi badadia bae keidia lao, kohua iduarana bae kurea ahu, bena kito taudia na badibadinai ba rakatanidia;

¹⁹a umui na basio halahe, inaimui do ba hahavadia, muridia amo bavala-ala henidia, edia hanua na basie heau vareai; badina be Iehova, emui Dirava, ese umui imamui ai vada e atodia.

²⁰Iosua bona Israel taudia ese vada e habuadia tari, ela bona hutuma bada vada e mase ore, ta ta mo hanua mai maḡudia lalodiai e heau vareai, bena e mauri.

²¹Una murinai Israel taudia iboudiai na Iosua dekena e lou lao, Makeda taruhana ai e nohova mai mainodia ida; tau ta ese malana se hamarerea, Israel taudia iherevalaidia.

²²Bena Iosua eto, Kohua iduarana a kehoa, unu pavapava laimaosi ba hakaudia lasi, lau dekegu ai ba mailaidia.

²³Bena unu e kara toma: hari pavapava laimaosi e hakaudia lasi, Iosua dekena e laohaidia: Ierusalem pavapavana bona Heberon pavapavana bona laramutu pavapavana bona Lakisi pavapavana bona Eglon pavapavana.

²⁴Laimaosi e hakaudia lasi Iosua vairanai; bena Iosua ese Israel taudia iboudiai e boiridia; bena ia ese tuari lohiadia, tuari ai e bamoava taudia, e hamaorodia, eto, A raka kahi mai, aemui na ini pavapava aiodia ai ba moi kau. Taunabunai, idia na e raka kahira, aedia na aiodia ai e moi kau.

²⁵Iosua ma e hamaorodia, eto, Basio gari, kudoumui na basie hetaha; ba goada, ba haheauka, badina be Iehova ese inaimui iboudiai ini baine karadia toma, ba tuari henidia negadia ai.

²⁶Una murinai, Iosua ese laimaosi e aladia mase, au auima ai e taudia dae; e hetau dae ela bona dina e diho.

²⁷Dina e diho, bena Iosua e hahedua, bena haida ese au amo e abidia dobi, Ialonai e komuva kohuana ai ma e tahodia vareai; bena nadi badadia e abi, kohua iduarana e kurea ahu. Unu e mia tomamu ema bona han dina.

²⁸Una dina ai Iosua ese Makeda e abia, e habuaia tari; hanua pavapavana e alaia mase, bona hanua taudia iboudiai e aladia ore, ta se roho mauri. Ieriko pavapavana e kara henia heḡereḡerena, Makeda pavapavana danu unu e kara henia toma.

²⁹Bena Iosua bona Israel taudia iboudiai na Makeda amo ela, Libna ai e kau; bena e tuari henia.

³⁰Bena Iehova ese Libna danu, mai pavapavana ida, Israel taudia imadia ai e atodia. Bena e habuaia tari, hanua taudia iboudiai dare amo e aladia ore, ta se roho mauri. Ieriko pavapavana e kara henia heḡereḡerena, Libna pavapavana danu unu e kara henia toma.

³¹Bena Iosua bona Israel taudia iboudiai na Libna amo ela, Lakisi ai e kau, e koua heḡeḡe bona e tuari henia.

³²Bena Iehova ese Lakisi danu Israel taudia imadia ai e atoa; dina iharuana ai e abia, e habuaia tari, hanua taudia iboudiai dare amo e aladia ore, Libna ai e karaia heḡereḡerena.

³³Horama, Gesere pavapavana, ema, Lakisi taudia idurudia totona, a Iosua ese ia mai ena orea taudia iboudiai e hadareredia, e aladia ore.

³⁴Bena Iosua bona Israel taudia iboudiai na Lakisi amo ela, Eglon ai e kau; e koua heḡeḡe bona e tuari henia;

³⁵una dina ai e abia, e habuaia tari, hanua taudia iboudiai na dare amo e aladia ore, Lakisi ai e karaia heḡereḡerena.

³⁶Bena Iosua bona Israel taudia iboudiai na Eglon amo ela, Heberon ai e kau, e tuari henia;

³⁷e abia, dare amo e aladia, hanua pavapavana danu e alaia, bona hanua maraḡidia taudia iboudiai na dare amo e aladia ore, ta se roho mauri. Eglon ai e karaia heḡereḡerena, unu ma e kara toma: e habuaia tari, bona taunimanima iboudiai e aladia ore.

³⁸Bena Iosua bona Israel taudia iboudiai na e lou, Debiri ela, e tuari henia;

³⁹bena e abia, mai pavapavana bona mai ena hanua iboudiai ida. Bena e habuaia tari, hanua taudia iboudiai na dare amo e aladia ore, ta se roho mauri. Heberon e kara henia bona Libna mai pavapavana ida e kara henidia heḡereḡerena, Debiri mai pavapavana ida unu e karadia toma.

⁴⁰Taunabunai, Iosua ese tano idoinai e hadarerea: ororo kahadia bona diho kahana, taora bona ororo gabaedia, mai pavapavadia iboudiai ida; ta se hamauria. Mai laḡadia ḡaudia iboudiai e aladia ore, Iehova, Israel Diravana, ese e haḡania heḡereḡerena.