IOANE 17:2-19

²Badina be oi ese siahu oi henia vadaeni, ia ese taunimanima ibounai do ia biagua karaia, bona oi ese ia dekenai oi henia taudia ibounai be ia ese mauri hanaihanai do ia henia idia dekenai.

³Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.

⁴“Lau ese tanobada dekenai oi lau hanamoa vadaeni, lau dekenai gaukara oi henia danu be lau karaia haorea vadaeni.

⁵Egu Tamana e, harihari oiemu hairai dekena amo do oi hanamoa lau dekenai, tanobada do ia vara lasi neganai, oiemu vairana dekenai lau abia hairaina.

⁶“Tanobada dekenai oi henia lau dekenai taudia be oiemu ladana lau hadibaia vadaeni idia dekenai. Idia be oiemu, oi ese oi henidia lau dekenai, idia danu oiemu hereva idia badinaia vadaeni.

⁷Harihari idia be idia diba, lau dekenai oi henia gaudia ibounai be oi dekena amo idia mai.

⁸Badina be lau dekenai oi henia herevadia lau henia vadaeni idia dekenai, vadaeni idia ese idia abia dae, bona idia diba momokani, lau be oi dekena amo lau mai, ma idia hamomokania danu oi ese lau oi siaia.

⁹“Idia totona lau noinoi oi dekenai, tanobada taudia totona lau noinoi lasi oi dekenai. Lau dekenai oi henia taudia totona lau noinoi oi dekenai, badina idia be oiemu.

¹⁰Lauegu taunimanima ibounai be oiemu, oiemu taunimanima ibounai danu be lauegu. Bona idia dekena amo lauegu hairaina ia hedinarai momokani vadaeni.

¹¹“Harihari lau be tanobada dekenai do lau noho lasi, idia be tanobada dekenai do idia noho, to lau be oi dekenai do lau mai. Egu Tamana Helaga e, lau dekenai oi henia taudia be oiemu ladana ena siahu dekena amo do oi dogoatao, vadaeni idia be do idia tamona, ita ruaosi ita tamona hegeregerena.

¹²Idia danu ai noho neganai, lau dekenai oi henia taudia lau naria, bona lau dogoatao, oiemu ladana dekenai idia noho. Lau naridia namonamo, idia ta ia boio lasi, dika ia davaria tauna sibona mo, Buka Helaga ena hereva hamomokania totona.

¹³Harihari lau mai oi dekenai. To tanobada dekenai lau noho neganai, inai hereva lau gwauraia, lauegu moale ese edia kudoudia do ia hahonua momokani totona.

¹⁴“Oiemu hereva lau henia vadaeni idia dekenai, bona tanobada ese ia badu henia vadaeni idia dekenai, badina idia be tanobada ena lasi, lau hegeregerena, lau be tanobada ena lasi.

¹⁵Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria.

¹⁶Idia be tanobada ena lasi, lau hegeregerena, lau be tanobada ena lasi.

¹⁷Hereva momokani dekena amo idia do oi hahelagaia, oiemu hereva be hereva momokani.

¹⁸Tanobada dekenai lau oi siaia vadaeni hegeregerena, lau ese danu idia lau siaia vadaeni tanobada dekenai.

¹⁹Bona idia durua totona lau sibona egu mauri lau henia inai, oi dekenai lau helaga, idia danu be oi dekenai do idia helaga momokani totona.