Sion 17:2-19

²Feinka! Ku nelo auk so kenemeko, kawin dim kaleem kasel kaliilo nem afak keyemselew te. Keyemselew kasike, nelo dunemselew kunum waneng alik alik ilo sunsun finik so bin duyemi te.

³Duyemii, i ibolow kilele dolon kesomi, kal keliwete: ‘Aatim kutaka! Kute kuw fein Sunbin-Got kute te. Nanew got mak banim te.’, kangeko, kal keko, nem dulum elo bokonemomeliw: ‘Namdaselew Yesus nete, fein Mesaya te.’, nangbiliw kunum waneng kebiliw te.

⁴Aatim kutaka! Kom dunemselew aluwbamin alik alik be, ne fein auleweko, banim kelewsomi, kawin dim kakabisi ding dim bakate, kom wiin fian daokemkabi te.

⁵Kawin dim kale talfut kelinba kese ding dim kabalak e, ne kuso bomi, wiin fian so aluwameli te. Keko beli, kame, ku nem wiin fian be iti sua emdiw fian kuw kenemolewka!

⁶Aatim kutaka! Kawin dim kaleem kasel im mutuk kuluko, dunemselew kunum biim kiin dim e ne kom wiin fian fein fitew dim dasi te. Sua e, kunum bi kukalem angin kebisiliw kate, ku kunum bi nelo dunemsomelewi, i kom weng kiliko, aluwkabiliw kunum kebiliw te.

⁷Kame ikati kal keliwete: ‘Dunemselew eisneng alik alik beem mongom kayak e kukalem ete te.’, angeko, fein dolon keliw te.

⁸Nimtew angom? Nolin kukunemselew eisneng mak nakati ilo kukuyemii, i kiliko, ikati dolon kesiliw kasike. I kame kal keliwete: Ku nelo fein namdalewi, ne kulo kokemeko, kaleelo talsi kunum nete te.

⁹Feinka! Ne kawin dim kaleem kasel alik alik im dulum elote kuso weng bokokeminba kebi kate, ne kom dunemselew kunum waneng im dulum elote kuw kuso weng bakakembi te. Nimtew angom? Kunum bi kom angin kebiliw kasike.

¹⁰Feinka! Alik alik nem mesesem eisneng be kukalem kebe te. Beemdiw, kom mesesem eisneng alik alik be nakalem kebe te. Keko beli, nulum num angin kebiliw kunum biim dulum elote ne wiin fian kulabi te.

¹¹Aatim Sunbin-Got ayem kutaka! Ne kawin dim kale koleweko, kom fukun tolomin kebi kate, i kale kel bókoliw te. Bokoliw kasike, ku ilo kom nelo dunemselew wiin beem kitil dim e kilele yetebolewka! Kanesomi, kuso neso nulum makuw kebuluw beemdiw ikati makuw keboliwka!

¹²Iso makuw kakabisi ding dim bakate, ne ilo kom nelo dunemselew wiin kitil nam em dim e kilele yetebisi te. Yetebisi kasike, kunum gel mak mesem so keko, sak kelinba kesiliw te. Kaneko kasike, kom fut tem bokoyemselew weng beem mongom alik alik be ki kese kasike.

¹³Aatim kutaka! Kame akate, ne kom fukun tolomin kemi te. Kate, nem kale kel bisi ding dim bakate, kaneko weng be bakakembi kasike, im ibolow e kalfong fian kuluko, nem duyemkabi kakat bakati im ibolow be gekyemomaka!

¹⁴Ne ilo kom nangew weng alik alik be kukuyemsi kasike kame, nem kunum bi nemdiw keko, kawin dim kaleem kasel kelinba kebiliw te. Kunum bikati kom angin kebiliw kasike, kawin dim kasel i ilo gal keyemeko, ibolow kaim alel keyemkabiliw te.

¹⁵Aatim kutaka! ‘Kame kuw, ku ilo kawin dim kaleem ilum ding be yemde unolewka!’, kanginba kebi kate, ku ilo kilele yetebelew kasike, wa keyemkabe Seten-Ataanim e ilo nam yene te.

¹⁶Feinka! Nakalem emdiw ikati kawin dim im angin bate.

¹⁷Aatim kutaka! Kom weng ete kuw fein weng te. Keko beli, kom fein weng be kunum biim ibolow tem be fewtokoko, kukalem galmoselew kunum keyemboke te!

¹⁸Sua e, ku nelo kawin dim kaleelo namdaselew te. Beemdiw kame, ne kunum biilo kawin dim kaleem aneng aneng angom kalo yamdali te.

¹⁹Im ibolow fukunin biilo dokoyemomin beem mongom ete nakalem kal so ibolow so be alik alik kom teing dim dukuko, atin kuw kom kekembi te. Keko beli, ikati atin kuw kukalem wangweng kunum kebiliw te.