Yohane 17:2-19

²Kwaapfila kumwing'a Imwanagho uwetso kwe iwanu wose, ili yaweng'e ughima wa ghamatsuwa ghose wose waumwing'ile.

³Auno iwo ughima wa ghamatsuwa ghose, iwanu wakumanye ghweghwe Imulungu uliyeka wa kweli, na wammanye Yesu Kiristu yaumtumile.

⁴Niulangusa utunitso wako mne isi kwa kuimalitsa ng'onde yungaile niisang'ane.

⁵Aba! Lelo unitunye, utunitso uhula yaning'ali nawo hamwe naghwe hala ng'ana iisi ilumbighwe.

⁶“Nilitenda taghwa lyako limanyike kwa iwanu wala yungaile muisi. Tsawakala wako, naghwe kungaya nene nawo waikinda imbuli yako.

⁷Sambi womanya ipfinu pfose pfaungaile pfolawa kuna ghweghwe.

⁸Kwaapfila niweng'a mbuli tsaungaile nawo watsitoghola, na wamanya ghendo ndawa kuna ghweghwe, watoghola ghweghwe kunituma.

⁹“Nowalombela. Siwalombela bae iwanu we iisi, ila nowalombela iwanu wala yungaile, kwaapfila awano iwo wako.

¹⁰Iwanu wose wanilinawo wako, na wose yaulinawo wangu. Na utunitso woneka kubitila wawo.

¹¹Sambi nakutsa kuna ghweghwe, sili muisi keli bae, lekeni wawo wang'ali muisi. Aba Mwenzeluka! Walolese kwa ngupfu ya taghwa lyaungaile, ili wawe wamwe ka ghweghwe na nene pfatuli wamwe.

¹²Haning'ali nawo, niwalolesa kwa ingupfu ya taghwa lyako lyaungaile. Kuduhu imunu yaghile ila yula iyasaghulighwe kwagha, ili Ghamaandiko Mahenzeluka ghatimile.

¹³“Sambi nakutsa kuna ghweghwe, tsanonga ghano ghose haning'ali muisi, ili wameme ndeng'elo yangu mne mimoyo yawo.

¹⁴Niweng'a imbuli yako na iwanu wa iisi wawahila, kwaapfila wawo si wa iisi ino bae, na nene si wa iisi ino bae.

¹⁵Sikulomba bae uwalapfe muisi, ila nokulomba uwalolese na ayula Yehile.

¹⁶Nene si wa iisi ino, nawo pfipfila si wa iisi ino bae.

¹⁷Uwatende wawe wako kwa kweli yako, imbuli yako iyo kweli.

¹⁸Niwatuma muisi, ka ghweghwe pfaunitumile muisi.

¹⁹Nelapfa imwenyegho kwaajili yawo, ili nawo welapfe ghendo kuna ghweghwe.