Kaudial 2

1

2

3

4

5

6

7

8

9

10

11

12

13

14

15

16

17

18

19

20

21

22

¹INTIN won tounlan en momodijou en Epijuj: Iet majan en i, me kolekoleta ni lim a pali maun uju iju, o me kin weweid nan pun en lamp kold iju.

²I aja om wiawia kan, o om dodok, o om dadaurata, o duen om jota kin mauki me jued akan, o koe kajaui ir adar, me akawanporon, a me jo, ap diar ir ada me likam.

³O koe kin kanonama on o kadokeki mar ai, ap jota panadar.

⁴A iet me I juedeki re om: Koe muei janer tapin om limpok.

⁵Koe ari tamanda, me koe pupe wei janer, o kalula, o kapwaiada wiawia en maj o; a ma jo, I pan ko don uk, kajau wei jan om lamp jan ni deu a, ma koe jota kalula.

⁶A iet me koe kin wia, koe kin juedeki wiawia en nain Nikolauj akan, me I pil kin juedeki.

⁷Me jalon a mia, i en ron, me Nen o majani on momodijou kan! Me dadaurata, I pan ki on i, en tunole jan tuka en kamaur, me mi nan paradij en Kot.

⁸Intin won tounlan en momodijou en Jmirna: Iet majan en men maj o men mur, me melar ap mauredar.

⁹I aja om kamekam, o om jamama ari jo, koe me kapwapwa, o lalaue en ir, me kin inda, dene irail men Juj, a kaidin irail men Juj, pwe pwin en Jatan eu.

¹⁰Koe der majak, me koe pan kalokolokki. Kilan, tewil o pan kajelon on nan imaten akai komail, pwe komail en kajonejon, o komail pan kalokolok ran eijok. Dadaurata lel mela. I ap pan ki on uk mar en maur joutuk.

¹¹Me jalon a mia, i en ron, me Nen o majani on momodijou kan! Me dadaurata, jota pan kamekam kila mela kariau.

¹²Intin won tounlan en momodijou en Perkamuj: Iet majan en me na kodlaj kon o au riau mia:

¹³I aja, waja koe kaujon ia, ni wajan mol en Jatan, o koe kin podidi on mar ai, o koe jota kamama kida om pojon ia pil jo ni ran oko, me Antipaj, ai jaunkadede melel men, kamekamelar nan pun omail, waja Jatan kin kaujon ia.

¹⁴A ekij tikitik ta, me I juedeki re om: Akai mi re om, me kin apwali lamalam en Pileam, me padaki on Palak, en kajedi on mon kadaudok en Ijrael kajapun par, ren tunole kijin man, me olu oner dikedik en ani kan, o ren nenek.

¹⁵O pil akai mi re om, me pil apwali lamalam en nain Nikolauj akan.

¹⁶Ari, kalula! A ma jo, I pan madan won uk o pepei on irail ki kodlaj en au ai.

¹⁷Me jalon a mia, i en ron, me Nen o majani on momodijou kan! Me dadaurata, I pan ki on i mana jojanjal, o I pan ki on i takai puetepuet eu o nan takai mar kap intinidier, jota amen me dedeki, i eta, me pan ale.

¹⁸Intin won tounlan en momodijou en Tiatira: Iet majan en me Japwilim en Kot, me jilan i rajon umpul en kijiniai o aluwilu a rajon praj linan.

¹⁹I aja om wiawia kan, o om limpok, o om pojon, o om papa, o om kanonama, o duen om wiawia men mur, me toto jan men maj.

²⁰A iet me I juedeki re om: Koe kin mueid on li Ijepel, me kin inda duen pein i, dene i jaukop amen, me kin padaki o kotaue nai ladu kan, ren nenek, o ren tunole, me olu on dikedik en ani.

²¹O I ki on i er anjau en kalula, a a kan kalukila a nenek.

²²Kilan, I pan kajedi i nan loj, o irail me kin kamal re a, nan kamekam lapalap, ma re jota pan kalukila wiawia en Ijepel akan.

²³O I pan kamekila na jeri kan kamekam eu. Ari, momodijou karoj pan ajaki, me nai i, me kin ireron nan mudilik o monion kan, o I pan ki on amen amen komail iran omail wiawia kan.

²⁴A I indai on komail tei kan, me mi Tiatira, karoj me jota apwali lamalam wet, me jo dedeki widin en Jatan, duen ar lokaia. I jota pan ki on komail eu katoutou pa ’mail.

²⁵A me mi re omail, kolekoleta, I lao pwarado.

²⁶O me dadaurata o me kanekid ai wiawia kan lel imwi, i me I pan kajapwilada pon wei kan.

²⁷A pan kaun kida ir jokon mata, due dal en jaupal kin ola kaualap, o due I pil aleer mana jan ren Jam ai,

²⁸I ap pan ki on i uju ran.

²⁹Me jalon a mia, i en ron me Nen o majani on momodijou kan!