Hosea 13

1

2

3

5

6

10

11

13

14

¹Ed idi, mo mankali din polin Efraim, emegyat din odom ay tribu, tan mabigbigbig din tribun Efraim ed Israel. Ngem binmasol da sin nandayawan da en Baal et nakeddengan da ay matey.

²Yan ed wani, sepsepsepen da din basol da. Tan din nalaing ay manpanpanday et am-amagen da din palata da si didiyosen ay nas-et di amag na. Kanan da, “Man-idaton tako en daida,” dowan dan ongoan din didiyosen da ay sana ay sinan baka.

³Isonga kaman dan liboo sin agsapa ya dono ay sinkaattikan yan mamaga. Kaman dan teg-ap ay itayaw di dagem ya asok ay bomala sin tawa.

⁴Ngem kanan Diyos, “Manipod sin kawada yo ed Egipto, sak-en si Yahweh ay Diyos yo. Magay odom ay Diyos yo tan magay odom ay mangisalakan en dakayo.

⁵Sak-en di nangay-ayowan en dakayo sin lugar ay magay omili ay magay danom na.

⁶Pinakpakan kos dakayo, ngem idi nabsog kayo, nginmato din nemnem yo et niliw-an yos sak-en.

⁷Isonga kamanak layon ono leopard ay mansesseed sin benget di danan si katena ya kanena. Kamanak aben maangat ay oso ay way nangilayaw sin anak na. Enak abten ya peslen dakayo.

⁹“Mo dadaelek sik-a ay Israel, sino pay di makaisalakan en sik-a?

¹⁰Into pay din ari ya tuturay yo ta isalakan das dakayo? Ed idi, nanpakpakaasi kayo ay nankedaw si ari ya odom ay tuturay ay mangituray en dakayo.

¹¹Gapo si bonget ko, indawtak dakayo si ari, ngem gapo met laeng si bonget ko yan tinaolik.

¹²“Naililista din lawa ay inam-amag din Israelita et naidodolin din listaan.

¹³Waday waya koman din Israelita ay matago, ngem baybay-an da. Maiarig das magay nemnem na ay liton. Manpalpaligat si ina na tan dinomteng din timpo na ay bomala, ngem sigaana ay bomala sin eges ina na.

¹⁴“Ay siya mo sobotek daida sin kad-an di natey ta maisalakan da sin panakabalin di pese? Dakayo ay pese ya din kad-an di natey, pawadaen yo di pisti ay makapese tan enggay nakaan di seg-ang kon daida.

¹⁵“Olay mo somiged di biyag di Israelita sin nan-gawaan di iib-a da, pawadaek di man-atong ay dagem ay mapo sin belaan di agew, sin lugar ay magay omili, et mamgaan di sakdoan da. Ilayaw na abe am-in ay nabanol ay sanikwa da sin pangidoldolinan si gameng.

¹⁶Ikaron din taga-Samaria din dosan di nangontraan dan sak-en ay Diyos da. Matey dan to si gobat, mapis-it din an-ak da ya mabotyakan din eges di masikog.”