Hosea 13

1

2

3

4

5

6

7

8

9

10

11

12

13

14

¹Ephraim tah rhihnah neh cal tih anih te Israel khuiah a pomsang. Tedae Baal rhangneh a boe dongah ni a duek.

²Tedae tholh te a koei uh coeng dongah amamih ham amamih cak te a lungcuei tarhing ah mueihloe la a saii uh. Te boeih te kutthai rhoek kah kutci muei mai. Te te amih loh, “Aka nawn hlang loh vaitoca te mok uh,” a ti uh.

³Te dongah mincang cingmai bangla, thoh hang neh aka hma buemtui bangla, cangtilhmuen lamkah aka thikthuek cangkik bangla, bangbuet lamkah hmaikhu bangla om uh ni.

⁴Tedae Egypt khohmuen lamkah pataeng na Pathen tah Yahweh kamah ni. Kai phoeiah pathen a tloe na ming noek moenih kai mueh ah khangkung khaw a om moenih.

⁵Rhamling khohmuen kah khosoek ah pataeng kai loh nang kan ming coeng.

⁶Amih kah rhamtlim neh hah la hah uh tih a lungbuei a pomsang. Te dongah ni kai n'hnilh uh.

⁷Te dongah amih soah sathuengca bangla ka om vetih kaihlaeng bangla longpuei ah ka mae.

⁸Amih te dueidah laehong vom bangla ka doe vetih a lungbuei kah a pahuep ka phen pah. Te vaengah sathuengnu loh kohong mulhing a baeh bangla amih te pahoi ka dolh ni.

⁹Nang kah bomkung kamah taeng lamloh Israel nang te m'phae ni.

¹⁰Na khopuei boeih ah nang aka khang ham na manghai neh nang kah lai aka tloek bal te ta? Te la, “Kai hamla manghai neh mangpa la m'pae,” na ti dae.

¹¹Manghai te nang taengah ka thintoek neh kam paek tih ka thinpom neh kan lat.

¹²Ephraim kah thaesainah loh puen a cak tih a tholhnah te a khoem pah coeng.

¹³Ca cun bungtloh loh anih taengah pai coeng. Anih tah camoe khaw a cueih moenih. Ca om tue vaengah khaw a om moenih.

¹⁴Amih te saelkhui kut lamloh ka lat ni. Amih te dueknah lamloh ka tlan ni. Dueknah nang kah duektahaw te melae? Saelkhui nang kah lucik te melae? Suemnah khaw ka mik lamloh thuh uh ni.

¹⁵Anih te pacaboeina lakli ah a thaih rhah mai cakhaw BOEIPA kah kanghawn yilh ha pai ni. Khosoek lamloh a khuen vetih a thunsih khaw kak ni. A tuisih khaw a khah pah. Anih te thakvoh khuikah sahnaih hnopai boeih a rheth pah ni.

¹⁶A Pathen te a koek dongah Samaria boe coeng. Cunghang dongah cungku uh vetih a camoe rhoek te a til uh ni. A bungvawn khaw a boe pah ni.