HEREVA LADA-ISIDIA 2:4-21

⁴boma tahua, silver na heto; boma tahua goada, e hehunimu kohudia namodia na heheto;

⁵bena Iehova igari-henina ba diba, bona Dirava idibana ba davaria.

⁶Badina be Iehova ese aonega e henimu, ia uduna amo aonega bona lalo-parara na e maimu;

⁷ia ese aonega namona e habouamu, kara maoromaoro taudia edia; ia na dala momokanina ai e rakamu taudia edia kesi;

⁸hahemaoro ḡoevaḡoeva daladia e gimadiamu, bona ena helaḡa taudia edia dala e nariamu.

⁹Bena kara maoromaoro bona hahemaoro ḡoevaḡoeva ba diba, bona ahu korikori ihenina bona dala namodia iboudiai danu

¹⁰badina be aonega na oi lalomu ai baine vareai, bona laumamu ese lalo-parara baine moalelaia;

¹¹kara-balaheni ese baine narimu, lalo-parara ese baine gimamu,

¹²dala dikana amo baine hamaurimu, hereva gageva-gageva taudia edia amo danu.

¹³Idia ese kara maoromaoro daladia e rakatanimu, dibura daladia ai e rakamu;

¹⁴kara dika ikaradia e moalelaiamu, bona kara dika ena dala gageva-gagevana e lalo namo heniamu;

¹⁵idia na dala gagevadia ai e rakamu taudia, edia raka daladia na dia mamaoro-mamaoro.

¹⁶Lebulebu hahinena ena amo baine harohomu mauri, bona ariara hahinena ena hedibaḡani herevadia amo danu.

¹⁷Ia ese eregabena ai e bamoava tauna na e rakataniamu, bona ena Dirava ena taravatu e reaiamu;

¹⁸badina be ena ruma na mase idiho-henina gabuna, bona ena dala na mase laumadia edia gabu ai e dihomu;

¹⁹e lao heniamu taudia na ta se lou maimu, mauri daladia asie davaridia loumu.

²⁰Taunabunai taunimanima namodia edia dala ai ba raka, bona kara maoromaoro taudia edia dala ba badinadia.

²¹Badina be kara maoromabro taudia na tano bae noholaia, bona lalo-maoromaoro taudia na ia lalonai bae noho;