HEREVA LADA-ISIDIA 29:5-13

⁵Dekena tauna e hanamoa koikoimu tauna ese huo e otoamu, ia sibona ihatoalaina.

⁶Kara dika tauna na ena kara dika ese e idoaiamu, a kara maoromaoro tauna na ane e abimu bona e moale hisi daemu.

⁷Kara maoromaoro tauna na ogoḡami taudia ahudia korikori mai dibana, a kara dika tauna na lalo-parara unuhetomana asi dibana.

⁸Heḡonaḡonalai taudia ese hanua e ha-araiamu, a aonega taudia ese badu e laoa ahumu.

⁹Aonega tauna na kavakava tauna ida bema hepapahuahu negana ai, kavakava tauna na e badumu bona e kirimu mo, a asie mainomu.

¹⁰Rara ihahebubuna e uramu taudia ese asi ena kerere tauna e inai heniamu, a kara maoromaoro taudia ese ia ihamaurina dalana e tahuamu.

¹¹Kavakava tauna ese ena badu e halasiamu, a aonega tauna na badu ai e haheaukamu.

¹²Pavapava ese hereva koikoidia bema abidia dae negana ai, ia henuna taudia iboudiai na bae kara dika.

¹³Ogoḡami tauna bona ia e hahisiamu tauna raruosi e hevaira hehenimu, bena Iehova ese raruosi matadia e hadiaridiamu.