HEREVA LADA-ISIDIA 23:9-34

⁹Kavakava tauna vairanai basio hereva, badina be emu hereva aonegadia na ia ese baine dadarai.

¹⁰Tano hetoana gunana basio raḡaia oho, bona ihareha edia tano ai basio raka vareai;

¹¹badina be Ihamauridia Diravana na mai goadana; edia gini-kau gabuna ai baine durudia, oi baine laomu ahu.

¹²Lalomu ese hahediba baine tahua, bona taiamu ese aonega herevadia bae hakala henidia.

¹³Mero ta matana ihakanina ai basio daradara; au amo boma kwadia, ia na basinema mase.

¹⁴Au amo boma kwadia, bena ia laumana na mase gabuna amo do ba rauaia.

¹⁵Natugu e, lalomu bema aonega, bena lau lalogu danu bema moale.

¹⁶Udumu bibinadia na hereva maoromaorodia bae gwaurai negana ai, lau laumagu do baine moale.

¹⁷Lalomu ese kara dika taudia basine vaḡeḡe henidia, a dina idoinai Iehova garina ai ba noho.

¹⁸Momokani, vaira dinadia dounu, bona emu helaro na basine doko.

¹⁹Natugu e, a kamonai, bena ba aonega; lalomu na dala namona ai ba hakaua.

²⁰Vine ranuna e inu momomu taudia ida basio inu hebou, bona e ani lavadaemu taudia ida basio aniani hebou;

²¹badina be kekero tauna bona ani-lavadae tauna na bae ogoḡami; bona mahuta momo ese tau ta dabua hedaredia baine hadabualaia.

²²Tamamu, e havaramu tauna, na ba kamonai henia; bona sinamu na e burukamu negana ai basio dadaraia.

²³Hereva momokani ba hoia emu, bona haida ediai ma basio hoihoilaia; aonega bona hahediba bona lalo-parara na ba hoidia emu.

²⁴Kara maoromaoro tauna tamana baine moale hisi dae; bona natuna mai aonegana e havaraiamu tauna ese baine moalelaia.

²⁵Tamamu bona sinamu na ba hamoaledia; e havaramu hahinena ba hamoalea hisi dae.

²⁶Natugu e, lalomu ba henigu; matamu ese egu dala do bae ita.

²⁷Badina be anara hahinena na guri dobuna; lebulebu hahinena na ranu gurina hekahi-hekahina.

²⁸E bani taomu, dadidadi tauna na heto; koikoi taudia e hahutumadiamu.

²⁹Daika etomu “Inaio”? Daika e tomu “Madi ihabaigu”? Daika e heaimu? Daika e maumaumu? Daika na asi badina vada e bero? Daika matana eme kakakaka?

³⁰Vine ranuna e inu daudaumu taudia, bona vine ranudia idau-idau e bulodiamu bena e inu tohomuta udia.

³¹Vine ranuna e kakakakamu negana ai, kehere ai e kimore-kimoremu bona inuna ai e manada-manadamu negana ai, basio raraia.

³²Dokona ai ia na e hekorimu, gaigai na heto; duba na heto e hekorimu.

³³Matamu ese ḡau idaudia bae ita, bona lalomu amo hereva gageva-gagevadia bae dae.

³⁴Oi na davara nuana ai e hekuremu tauna eiava lagatoi au-tubuana dorina ai e helaimu tauna heḡereḡerena ai ba hahelao.