HEREVA LADA-ISIDIA 22:13-25

¹³Lahedo tauna na e tomu “Leona ta na murimuri ai; ariara ai baine alagu mase”.

¹⁴Ariara hahinena uduna na guri dobu-hereana; Iehova ese e badu heniamu tauna na ia lalonai baine moru dobi.

¹⁵Kavakava na meromero lalonai mia; a mata-hakani auna ese baine lulua lasi dauhai.

¹⁶Ogoḡami taudia edia amo e dadidadimu, sibona ena taḡa ihabadana totona, eiava taḡa taudia e harihari henidiamu, tauna na do baine dabu mo.

¹⁷Taiamu a hakala, aonega taudia edia hereva ba kamonaidia, egu diba na lalomu ai bavabia dae;

¹⁸badina be lalomu ai ba dogodia tao, bona bibinamu ai bavabidia hata, una na moale ḡauna.

¹⁹Hari dina ai oi vada na hadibalaimumu, Iehova bavabidadama henia helaoreana.

²⁰Sisiba bona lalo-parara herevadia toi-ahui vada na tore henimu ani,

²¹kara maoromaoro bona kara momokani ihadibalaimu totona, bona haere maorona na e siaimu taudia ba henidia helaoreana?

²²Ogoḡami tauna basio dadia, badina be ia na ogoḡami; hisi e animu taudia na hahemaoro gabuna ai basio taodia tao;

²³badina be Iehova ese edia gini-kau gabuna ai baine durudia, bona edia kohu e dadi ohomu taudia na edia mauri baine dadi oho.

²⁴Badu haraḡa tauna ida basio hetura, bona badu ḡaraḡara tauna ida basiola;

²⁵ena dala ba manadalaidia, bona sibomu idoa ai ba heidoa na garina.