HEREVA LADA-ISIDIA 20:3-29

³Heatu amo e raka sirimu tauna na bae imodaia, a kavakava taudia iboudiai bae heai.

⁴Lahedo tauna ese hadohado negana ai tano se ruaiamu; taboro negana ai baine hetahu, a ḡau ta basine davaria.

⁵Taunimanima ta ena lalo-hadai na ranu dobuna na heto; a lalo-parara tauna ese baine veria lasi.

⁶Taunimanima hutuma ese sibodia edia heabidadama egwauraimu, a kara momokani tauna na daika ese baine davaria diba?

⁷Kara maorormaoro tauna na ena lalo-maoromaoro ai e rakamu; ia murinai natuna danu bae namo.

⁸Hanua pavapavana na hahemaoro gabuna ai helaina ai ia matana ese dika baine tapoa hidi.

⁹Daika baine hereva diba, baineto: Lalogu vada na haḡoevaia, egu dika amo vada name ḡoeva.

¹⁰Metau auridia mai koikoidia bona hahetoho ḡaudia mai koikoidia, ruaosi Iehova ese e inai henidia badamu.

¹¹Mero maraḡina ena kara amo sibona e hahedinaraimu, ena kara na ḡoḡoeva-ḡoḡoeva bona mamaoro-mamaoro eiava?

¹²E hakalamu taiana bona e roharohamu matana na Iehova ese ruaosi vada e karadia.

¹³Mahuta basio ura henia, ba ogoḡami na garina; matamu a hapapadia, bena aniani momo bavabia.

¹⁴Hoihoi tauna na e tomu “Ina na dika, ina na dika”, bena e raka ohomu mai heaḡina ida.

¹⁵Gold bona dava-bada nadidia na mimia; a aonega bibinadia na herahera nadina namo-hereana.

¹⁶Tau ta ese idau tauna dainai bema gwau hamata, ena hahedoki na bavabia; bona idau bese taudia daidiai bema gwau hamata, iena amo gwauhamata toana bavabia.

¹⁷Koikoi amo e abiamu anianina na mai gaihona, iabina tauna uduna ai; a gabeamo ia uduna na miri ai baine honu.

¹⁸Hahealo amo lalo-hata e ginimu; hahekau mai aonegana amo ba tuari.

¹⁹E hesivarai loaloamu tauna ese hereva hehunidia e hahedinaraimu; taunabunai hereva kavakavadia e gwauraimu tauna ida basio hetura.

²⁰Ta ese tamana eiava sinana bema uduguiraia, ena lamepa baine bodo, baine dibura masemase.

²¹Matamana ai e abia haraḡamu ahuna na dokona ai anina namona basine vara.

²²Basioto “Dika baina davalaia”; Iehova ba naria, ia ese baine durumu.

²³Metau auridia mai koikoidia na Iehova ese e inai henidia badamu: bona hahetoho ḡaudia mai koikoidia na dia nanamo.

²⁴Taunimanima ena raka na Iehova ese e reḡuamu; benaini, ena dala ede baine dibaia toma?

²⁵Tau ta baine hereva haraḡa, baineto “Ina na helaḡa”, bena baine gwau hamata murinai baine haeroa, una na idoa ienai.

²⁶Pavapava mai aonegana ese dika taudia na e tapodia hidimu, bona edia dika davadia e henidiamu.

²⁷Taunimanima laumana na Iehova ena lamepa, ia lalona idoinai itahuna.

²⁸Heabidadama bona kara maoromaoro ese hanua pavapavana na e hamauriamu; ena terono na hahemaoro ḡoevaḡoeva ese e ha-aukaiamu.

²⁹Eregabe taudia hairaidia na edia goada, a iahu hairaidia na huidia burukadia.