HEREVA LADA-ISIDIA 13:7-21

⁷Tau ta sibona taḡa tauna e hegwauraimu, to asi ena ḡau ta; ma ta sibona ogoḡami tauna e hegwauraimu, to ena taḡa na bada.

⁸Tau ta ena mauri ibodohilaina na ena taḡa, a ogoḡami tauna na asi ena mauri ibodohilaina ḡauna.

⁹Kara maoromaoro tauna diarina na mai moalena, a kara dika tauna lamepana na baine bodo.

¹⁰Se henahua tohomu tauna ena ḡadeḡade ese heiri-heiri e havaraiamu, a aonega na sisiba e abia daemu taudia ediai.

¹¹E abi kava kohudia na bae ore haraḡa-haraḡa, a ena kohu taidia taidia amo e haboumu tauna ese ena taḡa baine habadaia.

¹²Helaro mai halahena ese lalo-hisihisi e havaraiamu, a e haḡuḡurua urana na mauri auna.

¹³Hereva e dadaraiamu tauna na sibona e hahedikamu, a haheḡani e matauraiamu tauna ese davana baine abia.

¹⁴Aonega tauna ena hahediba herevadia na e lohilohia dae maurina, mase ena idoa ai basita kau helaoreana.

¹⁵Lalo-parara ese lalo-namo e havaraiamu, a asi edia heabidadama taudia edia dala na e dika vaitanimu.

¹⁶Lalo-parara tauna ese ḡau iboudiai mai aonegana ida e karamu, a kavakava tauna ese ena kavakava e heaḡilaiamu.

¹⁷Gwaukau tauna dikana ese taunimanima na e hahekwakwanaidia dikadikamu, a gwaukau tauna mai momokanina ese hahemauri e mailaiamu.

¹⁸Hahediba herevadia se kamonaimu tauna na e ogoḡamunu bona e hemaraimu, a sisiba herevadia e abi daemu tauna na e matauraiamu.

¹⁹Ura ta anina idavarina na mai gaihona, tau lalona ai; a dika irakatanina na kavakava taudia ese e inai henia badamu.

²⁰Aonega taudia ida e raka heboumu tauna na e heaonegamu, a kavakava taudia e bamodiamu tauna na baine hekwakwanai.

²¹Hahedika ese kara dika taudia e ḡavadiamu, a kara maoromaoro taudia ahudia na taḡa.